ဆၧလၧခိၪနါနီၪ ကဘၪတီၩလီၩ့ဝ့ၫ

လၧဖျိၩ့ဖျိၩ့အိၩ ခိၪလီၩ့ထိၩ့ချိၬကဒုၩအဖၧၩ့နီၪ ထိၪအီၪဝ့ၫအၪမၬနီၪလီၫႉ ထိၪၥံၪလဖၪနီၪ ကအီၪက့ၪထၪ့အခိၪနါအကၠီၩ့ ရွံထၪ့အီၪကီၪ့ဎိၭလၩ့ကၠၭဝ့ၫနီၪလီၫႉ အထီနီၪ ထိၪကျၭကဘံၪ့ လီၩၦဂူၫဂၩၥံၪ အဝ့ၫကမိကဲၪခိၪနါအကၠီၩ့တၭ ထိၪၥံၪလဖၪနီၪ ဘဲၫအဝ့ၫၥံၪမၩထၬၥနိၫအၥိၭ ဆၧလၧခိၪနါနီၪ ကဘၪတီၩလီၩ့ဝ့ၫႇ အၥုၪ့ဂ့ၩၥၭဘွၩကဘၪအီၪဒဲ ကဘၪမွဲၦလၧ ကိၪ့တဲၩ့ဆၧအဂ့ၩနီၪလီၫႉ ထိၪကျၭနးဆ့ အုၩ့လၩ့အၥၭလၧ ၦဂူၫဂၩၥံၪအမ့ၬယၫ လၧၥနိၫယီၩအဖၧၩ့ ကဖီၪ့ထၪ့ဖံၭထၪ့ဝ့ၫဂ့ၩဂ့ၩဒဲ ကကဲၪ့ထၪ့ခိၪနါအဂ့ၩလၥၨၩႉ ထိၪအဂူၫဂၩၥံၪလဖၪနီၪ ကဘၪလီၩ့ဎွါအ့ၪ အခိၪနါအဂး ဆၧအၪ့ဆၧအီၩ့ အလၧၫ့အဎွ့ၩနီၪလီၫႉ

            ထၧၫ့ဖုဝဲမုၪခွၫၥံၪဧ့ မုဂၪလၩ့အခၫ ထိၪၥံၪလဖၪနီၪ ဂဲၫထဲၩ့န့ ဆၧအၪ့ဆၧအီၩလၧအခိၪနါ ထိၪကျၭအီၪဂီၩ့ အၪ့ဎိၭလၩ့ကၠၭဝ့ၫ ကၠၧၫ့ကၠၧၫ့လီၫႉ ထီးလၧမုနၩခီၫအခၫ မံၫကၠၭကၠၧၫ့ကၠၧၫ့လီၫႉ ထီးလမုနၩခီၫအခၫ ထိၪပူၩဖိၪကဘံၪ့နီၪ ယိဂူၫအစဎွၩထိၪကျၭနီၪအခၫ ဒၪဝ့ၫ ကိၭနၩဒ့ၭ ထိၪကျၭနီၪ မွဲလမံၫဘၪလီၫႉ

            ကနၩနီၪတၭ ထိၪစဎွၩနီၪ မံၫအ့ၬတၭ ဒၪစိၩဝ့ၫလၧ ၥံၪ့ခၪ့ထံၭနီၪ ထွံၪကဒုၩဂဲၫအ့ၪလၩ့ထၬတၭ အဝ့ၫလ့ၩစဲၪ့လၩ့အၪ့နီၪလီၫႉ ထိၪပူၩဖိၪနီၪ မွဲလီၩ့ယိဂူၪ အဝ့ၫအစဎွၩကိၭနၩဒ့ၭတၭ ဒၪဝ့ၫဘဲၫယီၩၥိၭအခၫ ကိၭၡၭအလူ စဎွၩအၪ့ဆၧအအ့ၪ စဎွၩအၪ့ဆၧအအ့ၪနီၪလီၫႉ ကထံၪဎး မံၫကၠၭကၠၧၫ့ကၠၧၫ့ထိၪၥံၪလဖၪနီၪ နၪ့ဖျးအၥၭတၭ ဒၪလၩ့စိၩအဝ့ၫၥံၪအစဎွၩ အၪ့ဆၧအအ့ၪနီၪလီၫႉ လၧခဲၫ့ထုၬ စဎွၩထိၪကျၭနီၪ အဆၧတီၩဆၧလီၩ့ လအီၪဘၪလီၫ လကၭဘၪဒဲ အဝ့ၫလဖီၪ့ဂုးခၧၫ့ဘၪ အတခ့ၭဖဝၭအကၠီၩ့ ဘၪစဲၪ့လၩ့လၧ စဎွၩအလးဂီၩ့ ၦၡၩနၪ့စဲၪ့လၫ့ခွံၬအလးထနီၪနီၪလီၫႉ

            ထၧၫ့ဖုဝဲမုၪခွၫၥံၪဧ့ႇ မုကနွ့ၫယီၩ ၦၡါဖိၪယီၩနီၪ မွဲဒၪထီးယီၩလီၫနဲၪႉ ၡါဖိၪယီၩ ဖ့ၪလၫ့ပၧၩ ဆၧကိၪ့ၥ့ၪ ဆၧလၧခိၪနါနီၪ ကဘၪတီၩလီၩ့ႇ  အၥုၪ့ဂ့ၩၥၭဘွၩကဘၪအီၪဒဲ အတခ့ၭဖဝၭဂ့ၩမၬ ကကဲၪထၪ့ ခိၪနါအဂ့ၩကဂၩနီၪလီၫႉ ဆၧခိးဆၧတၩ