ဂါဇာထံၫခးအဂး ခးပယၩ့အဂး ဒဲ ယူၫကရံၩ့ထံၫခးအဂး ၥၫ့ခိၪဒိၪ လေအို အၪ့ကံၩ့ဘၩဆိၪဖၪအ့ၪဝ့ၫအဂဲး ဘၫတံၫကၫ့ ဆၧပရၧၫ့နီၪ ထုၬဖျီၪ့ထၪ့ထၬဝ့ၫလီၫႉ
လၧဂၫဇၫထံၫခးဖၧၩ့ ပထၧၫ့ဖုဝဲလဖၪ ဘၪဒၪဆၧၫ့ယၫလၧ ဆၧနိၫ့ဆၧနၭအၪမံၩ့အဂဲးႇ အဝ့ၫၥံၪနီၪ ပၥၭနၪ့ထၬလန့ဘၪအဂဲးႇ ဘဲၫနီၪအၥိၭ ခးပယၩ့ဖၧၩ့ဆ့ ဆၧတုၩ့ထၪ့တုၩ့လၩ့လဖၪအီၪဝ့ၫဒၪဂီၩ့ ၥၭဘၪ့ၥံၪလဖၪ ဘၪၥံၫဂီၩ့ ၥံၫစၪအၪမၬလ့ၬအဂဲးႇ လကၭဘၪ ဘၪထွ့ၫလၧ ယူၫကရံၩ့ထံၫခးအဂဲးဆ့ ဆၧဒုၭဆၧခၭလဖၪကအီၪပထုၬခွံၬဂီၩ့ ကဂုးခၧၫ့ဝ့ၫယံၭယံၭ ဆၧဎူၫဆၧဎၩ့အဂး ဆၧဒၪခီၩ့ကၩ့ကၩဎိၭလၩ့ဆၧနီၪ ကြၨၭမၩဝ့ၫဒၪအဂဲး ၥၫ့ခိၪဒိၪ လေအိုယီၩ ဒၪခီၩ့ လိၬၥၭလၧၦခမျၧးအထီ လီၩလၩ့လါလၩ့ဝ့ၫဒၪလၧ အီတလီထံၫခး၊ ရောမဝံးႇ စိန့်ပီတာလးပျၩ့ဖၧၩ့နီၪလီၫႉ
လကၭဘၪအဝ့ၫယီၩ ဆုးထဲၩ့အၪ့ကံၩ့ဘၩဆိၪဖၪ အ့ၪဝ့ၫဒံၭနီၪလီၫႉ လၧဆၧ ထံၪလၩ့ဒီၪလၩ့နီၪအဖၧၩ့ အမ့ၫရံကၫ့ထံၪခးခိၪနါနံၫဂၩလဂၩႇ ယူၫကရံၩ့ထံၫခးခိၪနါ ဇလန်းစကီး ဒဲ ခးၥဲၪထၧၫ့ဘံၪ့ယၫ ခိၪနါလဖၪ ဂဲၫထၪ့ကၠၭဝ့ၫအဂဲး ပၥ့ၪယၫနီၪလီၫႉ
ၥၫ့ခိၪဒိၪလေအိုနီၪ လၧအဖီၩ့ခွံၬ လၩမ့ၫ၈ၥၫ့ဒၪအိၩ ယွၩရွံထၪ့ဘဲၫ ၥၫ့ဎွၩဒိၪၦ အဘၪယူၬ ယွၩအၥိၪကဂၩၥိၭဂီၩ့ အဝ့ၫယီၩနီၪမွဲလၧ ၂၆၇ဂၩလဂၩ ၥၫ့ဎွၩဒိၪကဂၩ နီၪလီၫႉ
လၩမ့ၫ၁၉ၥၫ့ႇ၂၀၂၅နံၪ့