နံၪ့ ၁၉၁၄နံၪ့နီၪ အဆိၪထုၬလဘျၩ့ ဂၪ့ခိၪဆၧဒုၭၥုၭဖၭဒိၪကဲၪထၪ့ဝ့ၫဒၪလီၫႉ ဂၪ့ခိၪဆၧဒုၭၥုၭဖၭဒိၪ ကဲၪထၪ့ဝ့ၫ အဆိၪထုၬလဘျၩ့နီၪ ဖျိၩ့ဖိၪၥံၪလဖၪ နုၬလၩ့လၧ ခိၪလၩဘွၩအၥုၭဖၧၩ့ဂီၩ့ ကဲၪထၪ့ၥုၭဖိၪၥံၪနီၪလီၫႉ နံၪ့ ၁၉၁၇နံၪ့ နီၪ ဆၧဒုၭၥုၭဖၭဒိၪယီၩဂီၩ့တၭ ခိၪလၩဘွၩၥံၪနီၪအုၩ့လၩ့ထၬအၥၭလၧ ကဖ့ၪလၫ့အ့ၪ အံၫ့ဒံၩယါခးဒီၪ့ အဆၧပၧၩ့ဒၪဝ့ၫအနၫ့ဆါၥံၪ (ကိုယ်ပိုင်အုပ်ချုပ်ရေး)နီၪလီၫႉ လၩ အီဂုၭ ၂ၥၫ့နီၪ မွန်တေဂူလဂၩ ကဂဲၫအၪ့ဎၬဆၧပၧၩ့ဆၧအဂး ဂဲၫထီၩ့လၧ ခးအံၫ့ဒံၩယါနီၪလီၫႉ

            ခးပယၩ့နးဆ့ ဘဲၫပပၧၩ့ဒၪပၧၩ ပထံၫခးကန့ ကအၪ့ကံၩ့ဝ့ၫအဂး  လ့ၩဒၪမွန်တေဂူ လၧခးအံၫ့ဒံၩယါနီၪလီၫႉ ခးပယၩ့ (YMBA)  ကိၫ့စၩလဖၪမွဲဝ့ၫ အူၩဖ့ၫႇ အူၩဘၭဖ့ၫႇ အူၩစု ဒဲ အူၩမ့ၫအီၫ့ၥံၪ လ့ၩကၠၭနီၪလီၫႉ လၧအဝ့ၫၥံၪကၠၧၫ့ကၠၧၫ့ ၦဖျိၩ့ဆၨၩဖိၪၥံၪမွဲ ဒီၭတၫ စၫ့စံၫဖိၩႇ စီၩဆ့ၭဒနံၫလူၫနံၫဒဲ မၩၡွ့ၫဘၭၥံၪနးဆ့ ထိးရွံအၥၭဂီၩ့ မွဲလ့ၩဆ့နီၪလီၫႉ အီၪလ့ၩစဲၪ့လၫ့လၧ ခးပယၩ့ဖၧၩ့ လၧ၁၉၁၇နံၪ့ လၩ နိၫဝ့ၫဘၫ ၂၈ၥၫ့နီၪလီၫႉ စၭထၪ့လၧ အထီနီၪ ပကဒၪဘၪ ၦဖျိၩ့ဆၨၩဖိၪၥံၪနီၪ လၧခပယၩ့အဂး စၭထၪ့ခိးဂဲးခိးဘၭကျ့ၭစၨၭထၪ့ဝ့ဒၪကၠၧၫ့ကၠၧၫ့လၧ ဒိၩ့ဝိၩခိၪနါၦလၧအဖီၪ့ထၪ့ထံၫဂဲးခးဂဲးၥံၪလဖၪနီၪလီၫႉ လါနၫ့ ခိၪလၩဘွၩဆၧပၧၩ့ဆၧအခိၪလဖၪနီၪ ဖ့ၪလၫ့အ့ၪမွဲ အံၫ့ဒံၩယါၥံၪလီၫဂီၩ့ အီၪက့ၪထးခးပယၩ့နီၪလီၫႉ

            လၧခဲၫ့ လၧခးလၫ့ဒၫ့ ခိၪလၩဘွၩပဒိၪၥံၪလဖၪ လၧအဆၧဖံၭဆၧမၩအၪဝ့ၫအကျၩ အၪ့ဎၬထၪ့အ့ၪ ခးပယၩ့ထံၫခး အဂးနီၪလီၫႉ နံၪ့ ၁၉၂၁နီၪ ဖိၬလိၬထၪ့ ဝဲၭခမံတံၫ (Whyte) ဂီၩ့ ဂဲၫအၪ့ဎၬ ခးပယၩ့ထံၫဂဲးခးဂဲး အဆၧၫ့အထီနီၪလီၫႉ လၧခမံတံၫယီၩအဖၧၩ့ ၦလၧအပၫဝ့ၫလဖၪနီၪမွဲ ဒီၩ့ဝိၩကိၫ့စၩနံၫဂၩႇ ခးအံၫ့ဒံၩယါဖိၪကဂၩဒဲ ၦဖျိၩ့ဆၨၩကိၫ့စၩ ပၫဝ့ၫကဂၩနီၪလီၫႉ ၦဖျိၩ့ကိၫ့စၩအလးနီၪ မွဲဒီၭတၫစၫ့စံၫဖိၩ ဘၪအၪ့န့ထၪ့မူၩဒၩနီၪလီၫႉ ဒီၭတၫစၫ့စံၫဖိၩနီၪ ဘဲၫဝဲၭခမံတံၫဒဲ ၦဖျိၩ့ဆၨၩခရၧၫ့ ကအီၪကီၪ့ဎိၭလၩ့ဆၧကန့အဂး မၩထၪ့ဝ့ၫနီၪလီၫႉ ၦဖျိၩ့ဆၨၩဖိၪၥံၪလဖၪနးဆ့ ၦလၧအရ့ၩဒိၪလဖၪနီၪ ဖံၭၥိၭဝ့ၫၥ့ၪဂ့ၩဂ့ၩဘၪဘၪတၭ ဝဲၭခမံတံၫခိၪနါလဖၪ ဘၪအၥၭအၪမၬဒဲ ကယဲဖျိၩ့ၥံၪအၪ့ကံၩဆၧလဖၪ ဖ့ၪလၫ့အ့ၪဝ့ၫ အခွးအရ့ၩနီၪလီၫႉ လါနၫ့ ဒိၩ့ဝိၩအခရၧၫ့ (YMBA) နီၪစံၭဝ့ၫ ဖျိၩ့ၥံၪနီၪ မွဲကပၧၩ့ထၪ့ ထီကိၪ့ၥ့ၪလဖၪကန့အ့ၬအကၠီၩ့ ဒိၩ့ဝိၩအဆၨၩ ထီကိၪ့ၥ့ၪလဖၪ လ့ၩခိၪလ့ၩနါဂီၩ့ ဖိၬလိၬထၪ့အဝ့ၫၥံၪအခရၧၫ့ဖၭဒိၪ ၦခမျၧးၥံၪပၫဝ့ၫဒၪ ဒိၩ့ဝိၩ စ့ၭစ့ၭရဲၫ့ရဲၫ့ကီၫ့စံၫ (GCBA –The General Council of Burmese Associations)နီၪလီၫႉ