https://youtu.be/ahbXpftoJ9U

…အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ ဘိၪ့လ့ၩဖၭမုနံၩယီၩႇ ပကဘၪအၪ့န့ဒီၩ့ဂ့ၩထ့ၬဘၪလဖၪ ယ့ၫၡုၬအထံၩအဖျဲ ၥၧၫ့ဂၩအအီၪနီၪလီၫႉ စစဲမၧၫ့ပံတၧၫႇ စယီဟၫ့ႇ ဒဲနးမၫရံၫယၩမၫဒလ့ၫနၩၥံၪ အဆူနဲၩႇ အဆၧအဲၪႇ အဆၧၥၧၫ့ဒူၩၥၭဒူၩလဖၪနီၪလီၫႉ

နးမၫရံၫယၩမၫဒလ့ၫနၩယီၩႇ လမွဲဘၪ ဆၧအၪ့မၧၫ့ဖိၪၥံၪ ၁၂ဂၩအကျၩလါနၫ့ႇ မွဲဝ့ၫဆၧဒဲၩဘၭဖိၪ လၧအနီၫ့ယါလၩ့ထဲၩ့ၥၭႇ ယ့ၫၡုနၫ့ထၪ့ခွံၬ ဆၧနၪနွ့ၫဒုၩလအလီၩ့ႉ ခီၫလၧအဝ့ၫစၭဒၪခီၩလိၬလၧကဆါဎြံၬနီၪ အဝ့ၫအၪ့လဲၩအၥၭမၧၫ့ႇ ကဲၪယ့ၫၡုၬအထံၩအဖျဲလဂၩႇ ကၠၧၫ့ကၠၧၫ့လၧၦမုၪၥံၪအဂူၫဂၩ လုအၪ့လုအီၩ လၧအဝ့ၫၥံၪအဆၧဖိၪဆၧလံၩလီၫႉ

Jn 19;25 နးမၫရံၫဖိၬထၪ့ယ့ၫၡုၬအခဲၫ့ႇ ထီၩ့စိၩ လၧထုၪ့စူၪယၫအခၪ့ထံၭႇ လၧကၭလၧၩ့ႇ လၧၥွၪခိၪႇ ဒဲလၧဆၧဂဲးထုၪ့ထဲၩ့ႇ

ၦလၧအလ့ၩ လၧၥွၪခိၪႇ ဒၪဘၪဆၧၥွၪခိၪအအီၪပျီၩဖျ့ၭအဆိၫထုၬနီၪ မွဲနးမၫရံၫအၥိၭႇ ယ့ၫၡုၬဒုၭနဲၪဖျီၪထၪ့ၥၭအဆိၫထုၬႇ အၪ့မၧၫ့အဝ့ၫ လ့ၩလီၩဘၪအထံၩဖျဲၥံၪနီၪ မွဲဝ့ၫနးမၫရံၫယၩဆ့လီၫႉ

ကဆါယ့ၫၡုၬကမၧၫ့ထဲၩ့လၧဆၧၥံၫအဂဲးနီၪ အဝ့ၫၥ့ၪထၬဝ့ၫဒဲဆူနဲၩဝ့ၫအကၠီၩ့ လ့ၩလၧဆၧၥွၪခိၪဧၪနီၪ ပၥ့ၪယၫအ့ၬႉ  ၦလၧအနါဂၧၫ့ ယ့ၫၡုၬလီၩ့ဆိၫထၬ အဆၧထိးၥံၫၥၭႇ ဒဲအဆၧဂဲးထုၬမၧၫ့ထဲၩ့အဂဲး မွဲယ့ၫၡုၬအထံၩအဖျဲလဖၪလီၫႉ

လၧထီအဖီၩ့ခွံၬႇ ထီဘဲၫယီၩႇ လၧလၧယၫႇ ၦလၧအမၩနၧၩ့ ဆၧၥံၫမၩစၪဆၧၥံၫ အ့ၪလမွဲဘၪလၧယ့ၫၡုၬဎြံၬနီၪ ၦၡၩအီၪနးဂၩအ့ၬႉ

ယ့ၫၡုၬအီၪၥၭမၧၫ့လၧဂၪ့ခိၪချိၫ့ယီၩအထီႇ အဝ့ၫလထိးၥံၫဒံၭဘၪအၥၭနီၪႇ မၩမၧၫ့ထၪ့ထဲၩ့ ၦၥံၫလဖၪလီၫႉ

မၫကၧၭ ၅:၃၂ စယၫအရၭအဖိၪမုၪ, လုကၭ ၇:၁၁ ၦမုၪမဲၪလဂၩအဖိၪခွၫႇ စယီဟၫ့ ၁၁: ၁၇ စလၭဇရၧၭနီၪလီၫႉ

မၩမၧၫ့ထၪ့ထဲၩ့ၦၡၩအၥိၭႇ အဝ့ၫအစီၩ့အမၩ့အီၪ လၧမၩမၧၫ့ထၪ့ထဲၩ့ၥၭန့ဝ့ၫဒၪလီၫႉ

ၦကလီၫစံၫဖိၪၥံၪ ၂:၁၂-

နၥံၪဘၪဆၧခုၪ့လၩ့ဘၧၩ့ဎုၬ လၧအဝ့ၫနီၪအၥိၭ လၧဆၧဒိၭဘၭတံၫဇၫ့အဖၧၩ့ႇ ဒဲ နၥံၪဘၪဆၧဂဲထုၪ့ထဲၩ့ဎုၬ လၧအဝ့ၫၥိၭနီၪဆ့ႇ လၧဆၧနဲၩဘၪဆဲၫ့လၧယွၩအဆၧမၩ လၧအဒုၭဂဲထုၪ့ထဲၩ့အဝ့ၫ လၧဆၧၥံၫအဖၧၩ့လီၫႉ

ၦကလီၫစံၫ ၃:၁-၄ႇ နၥံၪအ့ၪဂဲထုၪ့ဎုၬလၧဎြံၬနီၪႇ အၪ့ဎၬန့ဆၧလၧထၭႇ ထီးအလးလၧဎြံၬအီၪဆၧၫ့နၩ့ လၧယွၩအစူၪထွ့ၪနီၪဆံၭႉ

အီၪက့ၪနၥံၪအၥၭ လၧဆၧလၧအအီၪလၧထၭနီၪဆံၭႇ မွဲဆၧအီၪလၧဂၪ့ခိၪချိၫ့ယီၩလဂ့ၩႉ

ယ့ၫၡုၬနီၪ မွဲယွၩလၧအအီၪလၧထၭႇ လၧအၥၫ့လၧအခၪ့ထံၭႇ ဂဲၫလၩ့လၧဂၪ့ခိၪချိၫ့ဖၧၩ့ႇ ဂဲၫလၩ့လၧလၭႇ အီၪပၥိၭကၠၧၫ့ကၠၧၫ့ႇ ၥီၪ့လိၪနဲၪလိၪအ့ၪ ဆၧလၧအအီၪလၧထၬႇ ယွၩအဂဲးႇ ၥၭမုဆံၫ့ဎံၪအဂဲးနီၪလီၫႉ

ပဝ့ၫဒၪ ၦဂၪ့ခိၪဖိၪလဖၪ အၪဒၪဆၧႇ ပအဲၪအၪ့ဎၬ ဆၧအီၪလၧလၭလဖၪနီၪလီၫႉ ဂၪ့ခိၪအဆၧမုၬဆၧလၩႇ ကျိၪစ့ၩႇ စူၪလးခၪ့ခိၪ လဖၪလီၫႉ လါနၫ့ဂ့ၩ ဆၧအီၪလၧလၭလဖၪယီၩ အီၪဂုးန့ယံၬအ့ၬႉ ဂၪ့အဎံၪအလၩႇ ဆၧမုၬဆၧလၩႇ ဆၧလ့ၩထၪ့လ့ၩထီၫလဖၪနီၪ အထုၬအီၪဝ့ၫလီၫႉ အ့ၪပအဲၪန့ၫ ဆၧအီၪလၧလၭနီၪ ႇ ပထီးလၧထၭအလးႇ မူၭခိၪအဘၩ့အမုးဖၧၩ့ၥ့ၪအ့ၬႉ

အဲၪကွံၩဘၪထၧၫ့ဖုဝဲၥံၪဧ့ႇ ပအီၪလၧဂၪ့ခိၪချိၫ့ယီၩအထီ ပအီၪၥၭမၧၫ့ဒံၭ လၧလၭယီၩအထီႇ ဘဲၫၦဆံၫ့ဎံၪမၪလူၬထၬပၧၩအၥိၭႇ ပကဘၪအၪ့ဎၬဆၧလၧထၭလဖၪနီၪလီၫႉ…