ထၧၫ့ဖုဝဲထံၩၥိၭဖျိၩ့ဖိၪၥံၪဧ့ အီၪဆီၪ့အီၪချဲၫ့ကိၭဂၩဒ့ၭလါဆံၭနဲၪႉ လၧခးပယၩ့ဖၧၩ့ယီၩ ပကဒၪဘၪၦဖျိၩ့ဆၨၩဖိၪၥံၪလဖၪ အီၪဎံၩ့လးနီၪလီၫႉ အၡါမၪနီၪ ဖျိၩ့ဒဲ ကယၩနီၪ မွဲဂဲၫထဲၩ့အီၪလၩ့ ကဆၨၩလီၫလါနၫ့ ထီးလၧ ဖဆပလပဒိၪအစူၪဖၧၩ့အခံၫ့နီၪ ဖျိၩ့ဝီၩ (ကယ့ၫနံၫ) နီၪ အၪ့လဲၩ့ကိၭထၪ့ထဲၩ့ဝ့ၫလၧ ကယၩနီၪလီၫႉ စဎွၩၥံၪလၧဖျိၩ့ဖျိၩ့အိၩနီၪ ကိၭဝ့ၫမွဲ ဖျိၩ့နီၪလီၫႉ ကုန်းဘောင် အထီ မင်းတုန်းမင်း ပၧၩ့အခံၫ့နီၪ ပကစၭထၪ့ဒၪဘၪ ဖျိၩ့ဆၨၩထၧၫ့ဖုဝဲအမံၩ့မွဲဝ့ၫ ဂေခို၊ဘွဲဒဲ ဇယိန်းၥံၪနီၪလီၫႉ မွဲအီၪထဲၩ့စဲၪ့လၩ့လၧ ဟီးဘရူး (ဆီးမိုက်) ဆၨၩဖိၪလမွဲဘၪလီၫႉ

            လၧဖးဖီၩ့ဖၧၩ့ ဖျိၩ့နီၪ မွဲအီၪဒၪလၧ ခိၪလီၩ့ခိၪဒဲ ခိၪလီၩ့ဖၫ့လၬ ဖံၬဒၩလးလီၫ  မွဲအ့ၬႉ ခီၫလၧ ဖးဖီၩ့အၥၫ့ခၫ့ထံၭ ဖျိၩ့ဖျိၩ့အိၩ လၧကျောက်ဆည်လးကျဲၩ့ မိၫဆၨၩၥံၪလဖၪမွဲဂ့ၩႇ ဖျိၩ့ဆၨၩၥံၪနးဆ့ လၧမင်းဘူး လးကျဲၩ့မွဲဂ့ၩႇ အီၪပျံၩပျၩလၩ့ ဎံၩ့လးနီၪလီၫႉ ထၧၫ့ဖုဝဲမုၪခွၫၥံၪဧ့ႇ လၩ့ဆၫ့ဝ့ၫဒၪကမံၩ့နီၪ ၁၈၈၅နံၪ့ လၩဖ့ၫဖီၫဝၫရံၫ ၇ၥၫ့ ဆၧထူၭထၪ့ ဘျၪ့ဒိၪ လံမံနံၬ (လွတ်တော်မှတ်တမ်း)အဖၧၩ့ လၧကခၠ့ၫဆၨၩခးဒီၪ့ႇ ဝံးဘမီၫမုထၪ့ခိၪလီၩ့ခၪ့ထံၭနီၪ ဖျိၩ့အတဝၫ့အီၪအကၠီၩ့နီၪလီၫႉ လကၭဒံၭဘၪ ၁၇၈၈နံၪ့ လၩ မၭ ၂၆ၥၫ့  ပယၩ့စဎွၩအဆၧထူၭထၪ့အလူအဖၧၩ့ မိၩကီၩ့ဝံးဒီၪ့ တဝၫ့ဝၬဝၬနီၪ ခၠ့ၩဆၨၩႇ ကၠၧၫ့ကၠၧၫ့လၧၥဲၫ့ၥံၪဒဲ ဖျိၩ့ဆၨၩၥံၪလဖၪ မွဲအီၪဆ့အကၠီၩ့ ပၥ့ၪယၫဘၪနီၪလီၫႉ မွဲဆၧဘဲၫနီၪ ၦဖျိၩ့ဆၨၩဖိၪၥံၪယီၩ မွဲဆၨၩဖၭဒိၪကဆၨၩအကၠီၩ့ ပၥ့ၪယၫဘၪနီၪလီၫႉ

            ထီမုဆၫကနံၩယီၩ ၦဖျိၩ့ဆၨၩဖိၪၥံၪအီၪအအၪထုၬ ခးဒီၪ့ဒဲ ဆၨၩခးဒီၪ့လဖၪနီၪ မွဲဖျိၩ့ဆၨၩခးဒီၪ့ႇ မိၫဆၨၩခးဒီၪ့ႇ တန့ၩၥၫရံၫခးဒီၪ့လးဝၩ့ဖၭဒိၪႇ ပခိၩခးဒီၪ့လးဝၩ့ဖၭဒိၪႇ ဝံးတခိၩ့ခးဒီၪ့လးဝၩ့ဖၭဒိၪ ဒဲ ထံၫထၪကျိၩ့ခးဒီၪ့လးဝၩ့ဖၭဒိၪဂီၩ့  ၦဖျိၩ့ဆၨၩခၩ့ဒိၪလဖၪ အီၪဝ့ၫအလး (၅) လးနီၪလီၫႉ ဆၨၩခးဒီၪ့ဒဲ ခးဒီၪ့လနၩ့နၩ့နီၪ ပကဒၪဘၪ ၦဖျိၩ့ဆၨၩလဖၪ အီၪဎံၩ့လးနီၪလီၫႉ မွဲဆၧဘဲၫနီၪ ဖျိၩ့ဆၨၩနီၪ မွဲဆၨၩအဆံၭကဆၨၩဖိၪလမွဲဘၪဒဲ ၦမွဲဝ့ၫ ဆၨၩဖၭဒိၪကဆၨၩနီၪလီၫႉ