လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆိၬၥၫထနၫဖိၪၥံၪအဂး ၥၫ့ဎွၩဖရၫ့စ့ၭ ဘၩဆိၪဖၪန့ဆၧအဂဲး အကၠီၩ့နီၪလီၫႉ ၥၫထနၫဆၧမၩအဂး ၦလၧလုထၪ့လၩ့ၥၭလၧ ကဆါယွၩအီၪၥံၪဧ့ႇ ယဘၩဆိၪဖၪန့နၥံၪအဂး ကိၭနံၩကိၭနၩနီၪအကၠီၩ့ ၥၫ့ဎွၩဖရၫ့စ့ၭ လီၩဝ့ၫဒၪဘဲၫယီၩၥိၭနီၪလီၫႉ ၥၫထနၫဆၧမၩအဂး ၦလုထၪ့လၩ့ၥၭ အီၪအကၠီၩ့နီၪ ၥၫထနၫကဲၪထၪ့န့နီၪလီၫႉ
အဲၪကွံၩဘၪဆိၬၥၫထနၫဖိၪ ထီးအလူၬၥံၪဧ့ႇ ၦလၧလုထၪ့လၩ့ၥၭ ၥၫ့ခၫၥံၪႇ မံၭထၬမုၪၥံၪ ဒဲၦယိၩယိၩဖိၪၥံၪအဂး ပကဘၪအၪ့က့ၩဘၩဆိၪဖၪန့ အဝ့ၫၥံၪအဂးနီၪလီၫႉ ၦၡၪ့ဖိၪၥံၪအဂးမွဲဂ့ၩႇ ၦလၧဘၪထိး အီၪက့ၪပဲၩခွံၬၥၭၥံၪအဂးမွဲဂ့ၩႇ ၦလၧဘၪထိး အၪ့ဆၫအၪ့ၥၭဂီၩ့ ဘၪကဲၪ ၦၡၩဎီးၡၩၥံၪအဂးမွဲဂ့ၩ အဝ့ၫၥံၪအဂး နၥံၪကဘၪမၩဆၧၩ့ လိၪအၪမၬဒ့ၭအကၠီၩ့ ယအၪ့ယၫ ပဂၨၪထၪ့နၥံၪနီၪလီၫႉ နၥံၪမၩ ဆၧအယီၩကန့အဂး ယအၪ့က့ၩဆိၪဖၪန့ နၥံၪအဂးနီၪလီၫႉ လကၭဒ့ၭဘၪ ဆၧလတီၩလဘၪအီၪ နၥံၪဒၪစွါဘဲၫ နၥံၪကဘၪဒၪဆၧၫ့ယၫ ပဒၩ့ထၬနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫထနၫဆၧမၩဖၧၩ့ အ့ၪနၥံၪဒၪ ဆၧကၪဆၧဂဲၩအခံၫ့နီၪ ဂုၩ့ထဲၩ့လးခဲၫ့လဂ့ၩ မၩနၧၩ့ခၪ့ဖျီၪထီးအလူၬနီၪလီၫႉ နၥံၪမၩၥၫထနၫဆၧမၩနီၪ မွဲဝ့ၫ နၥံၪတရါလၩ့ ကဆါယွၩ ဆၧပရၧၫ့နီၪလီၫႉ ဆိၬၥၫထနၫဆၧဖိၪၥံၪဧ့ႇ ယဒိၭနဲၩ့နၥံၪႇ ယဖ့ၪဂဲးဖ့ၪဘၭနၥံၪႇ ယဘၩဆိၪဖၪန့နၥံၪအဂး ကိၭနံၩကိၭနၩ နီၪအကၠီၩ့ ၥၫ့ဎွၩဖရၫ့စ့ၭ လီၩၥ့ၪယၫထၬ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ