လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆၧမၩကၪထဲၩ့ဆၧနီၪ မၩလီၩပျၩ့ ဆၧကၪဆၧဂဲၩ လန့ဘၪ အဂဲးအကၠီၩ့နီၪလီၫႉ ဆၧလၧၦဖျါခွံၬဆၧနီၪ ၦဆၧဘၪမၪ ဖီၩ့ဖျ့ၭထီးအလူၬ လမွဲဘၪနီၪလီၫႉ ဆၧအယီၩ့နီၪ မွဲဝ့ၫဒၪ ပယုၭယၪ့ၦဂူၫဂၩႇ ပအဲၪဒိၭဘၪလိၬဎွ့ၩဎီၩ့ႇ ပဂၭဎ့ၭ ဆၧအၧၩ့ဆၧၥၫ့ နီၪလီၫႉ ဆၧလၧ မၩကၪထဲၩ့ ဆၧနီၪ ဆၧၥၭထၪ့အဂး မွဲဝ့ၫဒၪ စဲၪ့ထၪ့ဖိး နီၪလီၫႉ ၦဖျါခွံၬဆၧနီၪ မွဲဝ့ၫဒၪ ပလီၩ့ဎွါ ဘၪလိၬဎွ့ၩဎီၩ့ နီၪလီၫႉ လၧခဲၫ့ကမံၩ့နီၪ ၦဖျါခွံၬဆၧနီၪန့ လါနၫ့ႇ ပၥၭနၫ့လန့ဘၪ ကအီၪဝ့ၫဒၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧၦဖျါခွံၬဆၧကမံၩ့နီၪ ဂ့ၩဒိၪဂီၩ့ မၩဖျီၪကျၩ ကဆါယွၩ အဆၧဖျါခွံၬနီၪလီၫႉ ဆၧလၧ မၩကၪထဲၩ့ဆၧနီၪ ဖ့ၪအ့ၪၦၡၩ မံၫ့ၥၭလန့ဘၪနီၪလီၫႉ ဖ့ၪအ့ၪၦၡၩကန့ဝ့ၫဒၪ ဆၧဂၭဂီၩ့နီၪလီၫႉ ဆၧလၧပကဲၪၦၡၩနီၪ ဆၨၩဆါခံးဂးႇ ထံၫဂဲးခးဂဲးႇ ဆၧဘိၪ့ဆၧဘၩဒဲ ဆၧဎံၫဆၧလၩဖၧၩ့ ဆၧအီၪက့ၪပဲၩ ထီးအလူၬနီၪ ပကဘၪမၩနၧၩ့ခၫ့ဖျီၫ့ နီၪလီၫႉ ဘၪမနီၪလဲၪစွါဘဲၫႇ ဆၧအယီၩၥံၪအီၪအကၠီၩ့နီၪႇ ဆၧဘၪလိၬဎွ့ၩဎီၩ့ လအီၪဘၪၥံၪ ကဲၪထၪ့ၥ့ၪဝ့ၫဒၪနီၪလီၫႉ ပအီၪၥၭမၧၫ့လၧ ဂၪ့ခိၪဖၧၩ့ယီၩ လဂၩဘၪလဂၩ ဆၧဖျါခွံၬကအီၪအဂး ပကဘၪ အၪ့က့ၩဘၩဆိၪဖၪလၧ ကဆါယွၩအီၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဂၪ့ခိၪဖိၪၥံၪ အဆၧဘၪမၪႇ လဂၩဘၪလဂၩ ဘၪထံၭဘၪဆၫလိၬၥၭဖၧၩ့ အဝ့ၫၥံၪန့ထၪ့ ဆၧဆၫထီးအလူၬနီၪ ကဆါယွၩကဘၠၩ့အ့ၪအဂး ပကဘၪ ဘၩဆိၪဖၪန့နီၪလီၫႉ လကၭဒ့ၭဘၪႇ ပလီၩ့ဎွါ ဆၧမုၬဆၧၡူၪဖၧၩ့ၥၭ ကန့အဂး ပကဘၪ အၪ့က့ၩကဆါယွၩ အဆၧမၩဆၧၩ့ အခိးအတၩ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ