ဆၧမၩလၩမၩဖၩ့ ယွၩအမိဆံၫ့ဎံၪဘၪဆၧဆိၬထၪ့လၧမူၭခိၪဖၧၩ့ ဘိၪ့မုနံၩယီၩ မွဲဝ့ၫဒၪ ဆၧမၩလၩမၩဖၩ့ ယွၩအဆၧယၫ့ၥုၪ့ယၫ့ၥၭအဘိၪ့မုနံၩလီၫႉ

နးမၫရံၫဘၪဆိၬထၪ့ လၧမူၭခိၪအဂဲးယီၩ ဖ့ၪလၫ့ပၧၩ ဆၧယိလါ လၧမုနံၩအလးခဲၫ့ထုၬကကၠၪႇ ယွၩကဒုၭဂဲးထုၪ့မၧၫ့ထၪ့ထဲၩ့ပၧၩဂီၩ့ႇ ပနးခီၫ့ဒဲပနးၥၭ ကဘၪဆၧဆိၬထၪ့လၧမူၭခိးဘၩ့မုးအဖၧၩ့နီၪလီၫႉ

ခၫ့ဖျီၫ့ယၧယွၩ အခိးအတၩႇ ဒဲပဆၧၥၭမၧၫ့အဂ့ၩတၭႇ ကနံၩကကၠၪႇ ပကစံၭထၪ့အၪ့အူၭႇ ပမၩလၩမၩဖၩ့ယွၩ ကၠၧၫ့ကၠၧၫ့လၧကဆါမုၪနးမၫရံၫယၩလီၫႉ

ဘိၪ့မုနံၩယီၩ ဖံၭၥိၭပၧၩ ဘဲၫၥိၭ ပဖိၬထွ့ၫယိဒီၩ့ ယွၩအမိဆံၫ့ဎံၪ အဆၧဆူနဲၩ ဒဲအဆၧခိၭနၪယွၩအလူအထၫႇ ဒဲမၩလၧၫ့ထၪ့ဎွ့ၩထၪ့ ယွၩအၥၭနီၪလီၫႉ

ၦမုၪနၩ့ၥံၪ့ဆ့ၭနးမၫရံၫယၩ အီၪက့ၪဆံၫ့ဎ့ၪလၩ့ၥၭ ဒဲ ဆၪ့လၩ့ၥုၪ့ဆၪ့လၩ့ၥၭ လၧအဆၧၥၭမၧၫ့ဖၧၩ့အကၠီၩ့ႇ အဝ့ၫဒိၭန့ဘၪခိၪဖၭႇ ဘၪဆၧဆိၬထၪ့ဝ့ၫ လၧမူၭခိၪအဖၧၩ့လီၫႉ ပဝ့ၫၥ့ၪလဖၪယီၩႇ ဘဲၫကဆါမုၪနးမၫရံၫအၥိၭႇ ပကဘၪအီၪက့ၪဆံၫ့ဎံၪ ပနးခီၫ့ဒဲပနးၥၭ လၧပၥၭမၧၫ့မုကိၭနံၩဒ့ၭအဖၧၩ့လီၫႉ

ယီဟၫ့ ၈:၃၄ စံၭထၬဝ့ၫႇ ၦလၧအမၩမၪဆၧနီၪ မွဲဝ့ၫဒၪ ဆၧဒဲၩဘၭအဎီးအၡၩလီၫႉ ဂလ့ၡၫဖိၪ ၅:၁ ကဆါဎြံၬမၩဖီၩ့ဖျ့ၭအကၠီၩ့တၭႇ ပလကြၨၭမွဲလၧၩ့ဘၪ ဆၧဒဲၩဘၭအဎီးအၡၩလီၫႉ  

ဘိၪ့မုနံၩယီၩ ဖ့ၪဂဲးဖ့ၪဘၭပၧၩႇ  ဘဲၫၥိၭ ပကဖီၩ့ဖျ့ၭလၧဆၧအၧၩ့ဆၧၥၫ့ႇ ဆၧစံၪစၪႇ ဆၧလတီၩဘၪႇ ဒဲဆၧဆီၫ့မီၪ့ႇ ဒဲတခ့ၭဖဝၭ လဂ့ၩလတီၩဘၪႇ ဒဲ ပကဖီၩ့ဖျ့ၭဆၧဒဲၩဘၭကိၭမံၩ့ဒ့ၭအဂးႇ ပကဘၪ ဒိၭနဲၩ့ၥၭလၧယွၩအအီၪနီၪလီၫႉ

ဘိၪ့မုနံၩယီၩႇ ကိၭဖံၭၥိၭပၧၩႇ ပကဖိၬထွ့ၫယိဒီၩ့ႇ ကဆါမုၪနးမၫရံၫ အဆၧအဲၪဆၧကွံၩႇ ဆၧဆူနဲၩဂုးခၧၫ့ႇ အဆၧခိၭနၪလီၩ့ဖိၬ ကဆါယွၩနီၪလီၫႉ

ဆၧနီၪအကၠီၩ့ ယွၩအမိဆံၫ့ဎံၪနးမၫရံၫ ဘၪဆၧဆိၬထၪ့ လၧမူၭခိၪဘိၪ့မုနံၩယီၩႇ ပကလုထၪ့ပၥၭဒဲ ပကအၪ့ကံၩ့အၪ့ယၫ အဝ့ၫအဆၧမၩဆၧၩ့ႇ အဆၧယိထဲၩ့ခွါထဲၩ့ႇ ဘဲၫၥိၭ ပအီၪက့ၪဆံၫ့ဎံၪ ပနးခီၫ့ပနးၥၭ လၧပၥၭမၧၫ့မုကိၭဒ့ၭအဖၧၩ့နီၪလီၫႉ