ထၧၫ့ဖုဝဲၥံၪဧ့ မိဖါကနၩ့နၩ့နီၪ လၧဖိၪဒံၪၥံၪအမ့ၬယၫ ချဲၩ့အၪလူအၪလိၬၥၭနးဆိၭအ့ၬ ဘၪထံၭဘၪ နဲၪ့လိၬၥၭအလူဆီၪ့ဆီၪ့ ဎၪလိၬဎၪဆံၫ့လိၬၥၭဘဲၫနီၪ အီၪနးကၠၪအ့ၬ မိဖါဘဲၫနီၪအၥိၭ အီၪဝ့ၫဒၪအၡါမၪနဲၪႉ
ဘဲၫနီၪအၥိၭလမွဲဘၪဂီၩ့ လၧဖိၪဒံၪၥံၪ အမ့ၬယၫ ချဲၩ့အၪလူအၪလိၬၥၭ ဎၪလိၬဎၪဆံၫ့လိၬၥၭ ဘၪ ထံၭဘၪနဲၪ့လိၬၥၭ စံၭၥိၭလၩ့ဂၩလိၬၥၭ မိဖါလဖၪဆ့ မွဲအီၪအၪမၬဆ့ႉ ပယိထၪ့အယီၩစွါဘဲၫ ပကဒၪဘၪ မိဖါနံၫမံၩ့ယူၭ ဘဲၫနီၪအၥိၭ ဖိၪဒံၪလဖၪဆ့ ကဂဲၫလၩ့ဖၭကၠၭအၥၭနံၫမံၩ့ဆ့နီၪလီၫႉ
ဖိၪဒံၪလၧအဘၪဂဲၫဎိၩထၪ့လၧ မိဖါအၡူၪအဘၩလဖၪအစူၪဖၧၩ့နီၪ ကအီၪၥ့ၪချံၫ့ချံၫ့ ကအီၪၥ့ၪ ၡူၪၡူၪဘၩဘၩဖိၪဂီၩ့အဝ့ၫၥံၪယီၩ လၧနဲၩ့ဎီၩ့ဖၧၩ့မွဲကန့ဘၪဆၧအဲၪဆၧကွံၩနီၪလီၫႉ လါနၫ့ ဖိၪဒံၪလၧအဘၪ ဂဲၫဎိၩထၪ့လၧ မိဖါအဘၪထံၭဘၪနဲၪ့လိၬၥၭအစူၪဖၧၩ့လဖၪနီၪ ကကဲၪဒီၩ့မိဖါၥံၪနီၪလီၫႉ လၧၦဂူၫဂၩအဖၫ့ ခိၪ လၧထၧၫ့ဖုထၧၫ့ဝဲအဖၫ့ခိၪ ချဲၩ့ချံၫ့ချံၫ့ဘၩဘၩမွဲလၥ့ၪလၧၩ့ဘၪနီၪလီၫႉ လကၭဘၪအဝ့ၫၥံၪယီၩ အဆၧ ဒၪအဂ့ၩကအီၪၡၩၡၩဖိၪလီၫဂီၩ့ အဝ့ၫၥံၪယီၩ အဆၧဘိၪ့ဆ့မွဲကဂ့ၩနၭဧၪအ့ၬႉ လၧနဲၩ့ဎီၩ့ဖၧၩ့ဆ့ မွဲကဒိၭ န့ဘၪ ဆၧအဲၪဆၧကွံၩဧၪအ့ၬႉ အဝ့ၫၥံၪအမိအဖါနီၪ ဂဲၫထဲၩ့အီၪမၧၫ့ဖ့ၪနဲၪအ့ၪအဝ့ၫၥံၪ လၧဆၧၥုၪ့ခိၥၭဝီၩ ဖၧၩ့အကၠီၩ့ အဝ့ၫၥံၪဆ့ကအီၪၥ့ၪခိခိလီၫႉ အ့ၪမွဲပၥၭခိဝီၩနီၪ ဆၧအဂ့ၩအဘၪလဖၪ မွဲကဂဲၫလၧပအီၪအ့ၬႉ ပအီၪက့ၪထၬၥၭ အဂ့ၩအဘွၩအ့ၪၥ့ၪမၬ ပကန့ထဲၩ့ဘၪဆၧအဂ့ၩအဘွၩလဖၪနီၪလီၫႉ
ဆၧနီၪအကၠီၩ့ မိဖါၥံၪဧ့ လၧနၥံၪအဖိၪအဒံၪအမ့ၬယၫနီၪ ဖ့ၪနဲၪဒၪ ဆၧဒီၩ့ဆၧထ့ၬ အဂ့ၩအဘွၩ လဖၪဂီၩ့ ၥုၪ့ထၪ့အ့ၪနၥံၪ အဖိၪအဒံၪဆၧၥၭမၧၫ့အခၪ့ယဲး လၧဆၧဂ့ၩဆၧဘွၩဖၧၩ့ကိၭဂၩဒ့ၭဆံၭႉ