ဆၧအဲၪဆၧကွံၩလၧချဲၩ့လၥ့ၪဘၪ

လၧဆၧဆၧၩ့ဝ့ၫဒၪ မုဂၫကဂၫနီၪ လၫဇရူၩကဂၩ ဆၧမၩစဲၪ့လၩ့အကၠီၩ့ ဂဲၫထဲၩ့ဝ့ၫဒၪလီၫႉ အခံၫ့နီၪ ဆၧဆၧၩ့ချူၭန့အဝ့ၫနီၪလီၫႉ အဝ့ၫနီၪအစီၩ့ပၪအ့ၬႉ လါနၫ့ဆဲၫ့ဒၩ့ထံၫပလူၬနီၪဘိၭ ပၪဝ့ၫဒၪအကၠီၩ့ ၥိၭလၫ့အပလူၬနီၪဂီၩ့ ထဲၩ့ဂၬဖၭဝ့ၫလီၫႉ

        ထီၩ့လၧဖၧၩ့ၥၪထၫကကၠၪ အဝ့ၫယီၩ ဒၪၡူၭအဖါနီၪလီၫႉ အဖါနီၪဂဲၫဆိၭန့စီၩ့ကဘံၪ့ဂီၩ့ ဂဲၫဒၩ့အ့ၪ အဝ့ၫနီၪလီၫႉ အဝ့ၫစံၭအဖါ “ဖါဆၧဆၧၩ့ကျၩ နဘၪဂဲၫနီၪဘၪန့လဲၪ” လါနၫ့ အဖါနီၪ စံၭထဲၩ့အဝ့ၫ နးမံၩ့အ့ၬႉ အဝ့ၫၥံၪအထၧၫ့ဖိၪဖါနံၫဂၩ ထဲၩ့ဂၬဖၭလၧဆၧဆၧၩ့ကျၩကၠၧၫ့ကၠၧၫ့နီၪလီၫႉ ထီၩ့လၧဂံၪ့ကကၠၪ အဖါနီၪ အလီၩ့စီၪထီးကဲၩ့ယၫနီၪလီၫႉ အမိနီၪ ဂဲၫစိၪ့လၫ့ခိၭထၬအဝ့ၫၥံၪ လၧဂံၪ့မ့ၬယၫ လၧခိၪဖံၭ ကဘံၪ့နီၪလီၫႉ “နဖိၪခွၫနီၪ အဆဲၫ့ဒၩ့ပလူၬပၪ နဘၪလ့ၩလိၪအ့ၬႉ ယလီၩနီၪ ခိၭနၪယၧၩအ့ၬႉ လ့ၩဂၬဖၭ လၫ့ဒၪဝ့ၫႉ” အမၪလီၩၡိအဝ့ၫဘနီၪလါနၫ့ လီၩထဲၩ့အမၪနးမံၩ့အ့ၬႉ

     အဝ့ၫယီၩထဲၩ့အၪ့လူလၫ့အၥၭဂီၩ့ လၧအလူဆံၭဆံၭဖၧၩ့ “နဖိၪခွၫနီၪ ခီၫလၧအဆံၭဆံၭအိၩ အ့ၪမွဲ ဆၧချံၫ့ဘၪ ဆူၪဂိၬလၫ့ၥ့ၪနီၪ နၥ့ၪယၫဆ့နဲၪႉ” ချဲၩ့ထၪ့ဘဲၫနီၪအၥိၭလီၫႉ

     ထီၩ့လၧမုနၩကကၠၪ ဖိၪခွၫနီၪ အၪ့ဎၬထၪ့ထဲၩ့ဆၧ, အဖါနီၪခီၫလၧအဝ့ၫအဆံၭဆံၭအခံၫ့အိၩ စံၭအဝ့ၫ “ဖိၪခွၫဧ့ ယအဲၪနၧၩ” ဘနီၪ အီၪနးကၠၪအ့ၬႉ လါနၫ့ ထံၭလၩ့ဂူၪအ့ၪအဝ့ၫ ကိၪဎွ့ၩၥံၪႇ အဝ့ၫနုၬ လၩ့ဆၧမၩဖၧၩ့အခၫ ထံၭလၩ့န့အ့ၪအဝ့ၫၥိၪၥံၪႇ ကလ့ၩဆိၭန့အၪ့မ့ၩအဂး လၧအဝ့ၫဘၪအၥၭလဖၪနီၪ ဂဲၫထဲၩ့ထံၭလၫ့ဂူၪထၬဝ့ၫ လၧစပွဲဖၫ့ခိၪၥံၪနီၪ အဝ့ၫၥ့ၪယၫဝ့ၫလီၫႉ

     ကနၩနီၪ ဖိၪခွၫယီၩ လ့ၩနုၬလၩ့စိၩလၧ အဖါအဒူၭဖၧၩ့ဂီၩ့ ဒၪထၪ့ထဲၩ့အဖါအဆၧအဲၪဆၧကွံၩလဖၪ အကၠီၩ့ ဆၧမုၬဘၪအၥၭဒဲ ဒုၭလုၬလၫ့အ့ၪအဖါၡၪ့တၩ့နံၪ့ဂီၩ့ လၧအဝ့ၫအမ့ၬၥ့ၪဖၧၩ့ အမ့ၬထံၫဂဲၫအုၪ့လၫ့ နီၪလီၫႉ

       ဖါၥံၪနီၪ ထုၬဖျီၪထၪ့အဆၧအဲၪ လၧဆၧချဲၩ့လၥ့ၪဘၪလါနၫ့ လၧဖိၪၥံၪအဖၫ့ခိၪ အဝ့ၫၥံၪအီၪ က့ၪထၬအဆၧအဲၪနီၪ ၡၩန့မိလဖၪအ့ၬႉ