ဆၧအူၭဒဲချံၭကိၪ့ၥ့ၪ (၂)

ချံၭနီၪ ၥိၪ့စိၩဆၧပရၧၫ့လၧ စဎွၩအီၪ အဝ့ၫနီၪ ဂၪ့ခိၪယီၩ အနၧၩ့ကၠၪထုၬ ထံၫနၧၫ့မၧၫ့အီၪအကၠီၩ့တၭ စဎွၩနီၪ ကိၭဖံၭၥိၭ ချံၭနီၪလၧ နီးဖၧၩ့ဂီၩ့ အၪ့မၧၫ့ဝ့ၫ နထံၫနၧၫ့မၧၫ့နီၪအီၪခလဲၪအခၫ ချံၭကိၪ့ၥ့ၪနီၪ စံၭဆၧၫ့ထဲၩ့ ယထံၫနၧၫ့မၧၫ့နီၪ မွဲအီၪဂဲၫလၧ ယနိၭဖၧၩ့ လံၩနီၪလီၫႉ ကထံၪဎး စဎွၩနီၪ စံၭဆၧၫ့ထဲၩ့ ချံၭဧ့ႇ အ့ၪနအၪ့လီၫယၧၩ ယကမၩၥံၫနၧၩဂီၩ့ ယကအၪ့ဖီၫ့အၪ့နၧၩ လါနၫ့ ချံၭအနိၭနီၪ စဎွၩနၧၫ့ယိစိၩအခၫ မွဲနၧၫ့မၧၫ့ဝ့ၫတၡါအကၠီၩ့ စဎွၩဖ့ၪလၫ့အ့ၪ အလူအဎွ့ၩဎိၩဒိၪဝ့ၫဒၪ စ့ၩၥံၪထီၫ့ၥံၪအၪမၬ နီၪလီၫႉ

ချံၭနီၪ ဒၪထဲၩ့အထံၩၥိၭ ဆၧအူၭအခၫ လီၩအ့ၪဝ့ၫ စဎွၩဖ့ၪလၫ့အ့ၪအဝ့ၫ စ့ၩၥံၪထီၪ့ၥံၪအၪမၬအကၠီၩ့လီၫႉ ထီးနီၪ စံၭဝ့ၫ မၩယိ စိၩခိၭယၧၩ ဘၪမနီၫလဲၪ ဆၧကၪနးမံၩ့အ့ၬ အၪ့မၧၫ့စဎွၩနၧၫ့ယိစိၩနနိၭ အၪ့ဆၧၥူၪဆၧၥၪဂီၩ့ ခိၪဂီၩ့ နနိၭကနၧၫ့ဆၧၥူၪဆၧၥၪ အစီၩ့ ဖ့ၪကိၪ့ဝ့ၫဘဲၫယီၩၥိၭလီၫႉ ဆၧအူၭနီၪ လၧစဎွၩအီၪကမိမၩ စ့ၩၥံၪထီၪ့ၥံၪအကၠီၩ့ အၥၭဝၭထိၬ အမ့ၬၥၪလဲးထၪ့နီၪလီၫႉ အနီၪတၭ ဘဲၫချံၭၥိၪ့စိၩ ဆၧပရၧၫ့လၧ စဎွၩအီၪအၥိၭ အဝ့ၫမၩဒီၩ့နီၪလီၫႉ

လၧခဲၫ့ စဎွၩနီၪ အၪ့မၧၫ့ဆၧအူၭဂဲၫန့ အထံၫနၧၫ့မၧၫ့လီၫႉ စဎွၩဒိၪနီၪ လီၩဆၧအူၭ အ့ၪမွဲနအၪ့လီၫယၧၩ ယကမၩၥံၫနၧၩဂီၩ့ ယကအၪ့ဖီၫ့အၪ့နၧၩအကၠီၩ့ ဖ့ၪလၫ့အ့ၪဝ့ၫဆၧထုၪ့ၥုၪ့ထုၪ့ၥၭနီၪလီၫႉ အနီၪတၭ ဆၧအူၭနီၪ ဝဲထၪ့အနိၭဂီၩ့ အၪ့မၧၫ့စဎွၩနၧၫ့ယိစိၩလီၫႉ လါနၫ့ ဆၧအူၭအနိၭနီၪ နၧၫ့အူၪစွါဘဲၫႉ ဘၪနီၫလဲၪစွါဘဲၫ အဝ့ၫအၪ့ထၬ ဆၧၥူၪဆၧၥၪ အနံၩအၥၫ့ယံၬယူၭလါနၫ့ မွဲလၧမၩဆံၫ့ဖျ့ၪဘၪအနိၭ နးကၠၪလီၫႉ

ဆၧအူၭအနိၭနီၪ နၧၫ့ဎွ့ၩပၥ့ၪလဲၪစွါဘဲၫ ဎွ့ၩစဎွ့ၩၥၭနၪ့ဆၧလၧခီၫစွါဘဲၫႉ စဎွၩနၪ့ထဲၩ့ဆၧအခၫ ၥၭထၪ့ ဆၧအူၭ ဒိၪဒိၪလ့ၬဂီၩ့ ခွံၬလၩ့အလူၬ အၪ့မၧၫ့အဖျဲၥံၪမၩၥံၫဆၧအူၭနီၪဂီၩ့ အၪ့ဖီၫ့အၪ့ခွံၬနီၪလီၫႉ လၧခဲၫ့ထုၬ ချံၭနီၪ အထံၩၥိၭလၧအၪ့လီၫ အဝ့ၫဆၧအူၭလဒုၩ ဖ့ၪလၫ့ဝ့ၫ ဆၧမၪလံၩ့လဲၪ ဘဲယီၩၥိၭလီၫႉ

ယအဲၪဒိၭလီၩအ့ၪဘၪနၥံၪ ၡါဖိၪယီၩနီၪမွဲဒၪထီးယီၩလီၫႉ ၡါဖိၪယီၩ ဖ့ၪလၫ့ပၧၩ ဆၧကိၪၥ့ၪ ပကဘၪကဲၪထံၩၥိၭအဂ့ၩ လါနၫ့ ထံၩၥိၭလၧ လဂ့ၩဘၪပဖၫ့ခိၪနီၪ ပကဘၪအီၪက့ၪ ဆၧထုၪ့ၥုၪ့ထုၪ့ၥၭနီၪလီၫႉ