ယ့ၫရှူၬဎရံၬအီၪဖျဲၪထၪ့အဂဲး.
ယ့ၫရှူၬဎရံၬအီၪဖျဲၪဝ့ၫနီၪ မၩအၥၭဘဲၫယီၩ, အမိနးမၫရံၫ ဘၪအဲၪတၩ့လိၬယူၭအၥၭ လၧစယိၥၭတၭ, ဘိၩ့အလချႃၭ အီၪဎုၬဒံၭဘၪနီၪ, ဆၧဖျီၪထၪ့လၧအဒၧၩ့ထၪ့ဝ့ၫလၧၥၭမုဆံၫ့ဎံၪလီၫ. အဝၩစယိၥၭနီၪ မွဲၦအတီၩအလီၩ့တၭ, မိမၩဂၭဂီၩ့ဖျီၪဘၪအၥၭလၧ အလၩအဖၩ့အ့ၬ. အၥၭအီၪလၧ အမိမၩလၩ့ၡၪၥူၪဝ့ၫလီၫ. အဝ့ၫဒၪကိၪ့ထၪ့ဖၭလၩ့ ဆၧနီၪလဖၪ အဘိၩ့ဘၭတၭ, ယိခွါ,ကဆါအၥီၫ့လဂၩ မၩဖျီၪထၪ့အၥၭလၧ အမ့ၬယၫလၧဆၧမံၫမးအဖၧၩ့တၭ, စံၭဝ့ၫဒၪ, စဒၫဝံၭအဖိၪခွၫစယိၥၭဧ့, နမၩန့နမၫနးမၫရံၫနီၪ, ထီးအၪ့ယိၪဆၧလဂ့ၩ, အဂဲးဘဲၫယီၩ ဆၧလၧအဒၧၩ့ထၪ့န့ဝ့ၫနီၪ, မွဲအအီၪထၪ့လၧၥၭမုဆံၫ့ဎံၪလီၫ. အဝ့ၫဒၪမိအီၪဖျဲၪန့အဖိၪခွၫတၭ, နမိဘၪဖျိၬအမံၩ့ ယ့ၫရှူၬလီၫ. အဂဲးဘဲၫယီၩ မွဲအမိမၩဖီၩ့မၩဖျ့ၭအခ့ၫအၡၩၥံၪလၧ အဆၧဒဲၭဘၭလီၫ. ဆၧနီၪလဖၪထီးအလူၬမၩအၥၭဘဲၫၥိၭ ကဆါအလူအထၫလၧမီၪလဂၩနီၪ, မိလၧၫ့ထၪ့ဎွ့ၩထၪ့ဝ့ၫလီၫ. စံၭဝ့ၫဒၪ, ယိခွါ, ၦမုၪနၩ့နးဂၩမိဒၧၩ့ထၪ့, ဒဲမိအီၪဖျဲၪန့အဖိၪခွၫတၭ, ဆၧမိဖျိၬအမံၩ့အမၫ့နုၫအ့လၭ, ဘဲၫပစံၭဆၧအၥိၭ, ယွၩအီၪလၧပၥိၭလီၫ. စယိၥၭမံၫဝ့ၫနၪ့ထၪ့အၥၭတၭ, မၩဝ့ၫဘဲၫကဆါအၥီၫ့မၪလူၬဝဲၩဝ့ၫအၥိၭတၭ, မၩန့အမၫလီၫ. ဘိၩ့အလချႃၭအီၪဖျဲၪန့ဒံၭဘၪအဖိၪခွၫဝဲၡါနီၪ လၥ့ၪယၫဘၪဝ့ၫတၭ ဖျိၬဝ့ၫအမံၩ့ ယ့ၫရှူၬ နီၪလီၫ.
