ဆၧအူၭဒဲချံၭကိၪ့ၥ့ၪ (၁)

ထၧၫ့ဖုဝဲထံၭၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ႇ နံၩလၧအမုၬ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိအဲၪဒိၭလီၩအ့ၪဘၪနၥံၪ ၡါဖိၪအခိၪတၩ့နီၪမွဲ ဆၧအူၭဒဲချံၭ ၡါဖိၪနီၪလီၫႉ လၧကကၠၪအိၩ ဆၧအူၭကဒုၩဒဲ ချံၭအီၪဝ့ၫ ကဘံၪ့ နီၪလီၫႉ ဆၧအူၭဒဲ ချံၭနီၪ အဲၪလိၬၥၭနဲၪဒ့ၭ မွဲဝ့ၫ ထံၭၥိၭလီၫစွါဘဲၫႉ အဝ့ၫၥံၪ အီၪကၠၭကၠၧၫ့ကၠၧၫ့လၧ ၡိၬကျၩဖၭဒိၪကဒုၩနီၪလီၫႉ

ကနံၩနီၪတၭ ဆၧအူၭနီၪ လ့ၩကိၭန့ချံၭလၧ ၡိၬကျၩဖၧၩ့ဂီၩ့ လီၩဝ့ၫကလ့ၩလီၩ့ဎွါအၪ့ဆၧၥူၪဆၧၥၪနီၪလီၫႉ ဆၧအူၭဒဲ ချံၭနီၪ လ့ၩကၠၧၫ့ကၠၧၫ့ဂီၩ့ လ့ၩလီၩ့ဎွါ ဆၧၥူၪဆၧၥၪလၥၨၩႉ ဆၧအူၭနီၪ ထၪ့လၧၥံၪ့ခံၫဂီၩ့ အၪ့မၧၫ့အထံၭၥိၭ ချံၭနီၪ ခိၭလၧ ၥံၪ့ခၪ့ထံၭလီၫႉ ဆၧအူၭနီၪအဝ့ၫအၪ့မၩန့ ဆၧအၥၪလဖၪနီၪ အၪ့ဒၪဝ့ၫအနၫ့ဆါဂီၩ့ ခွံၬလၩ့အ့ၪအထံၩၥိၭ ချံၭနီၪ နးဖျိၪ့အ့ၬႉ လၧခဲၫ့ ချံၭနီၪ စံၭစိၩ အထံၩၥိၭဆၧအူၭ ခွံၬလၩ့စိၩအ့ၪယၧၩ ဆၧၥူၪဆၧၥၪၥံၪခလူၬဘီၪအခၫ ဆၧအူၭနီၪ ခွံၬလၩ့စိၩအ့ၪအထံၩၥိၭချံၭမွဲ အဝ့ၫအၪ့ထၬ ဆၧအၥၪလဖၪအဖံၭလီၫႉ ထီးနီၪ ချံၭနီၪ ၥ့ၪယၫဝ့ၫလၧ အထံၩၥိၭဆၧအူၭ အၪ့လီၫအဝ့ၫတၭ အဝ့ၫအၥၭမုၬအ့ၬ ဒိၪဒိၪလ့ၬနီၪလီၫႉ လၧခဲၫ့ ချံၭနီၪ အၪ့ဎၬထၪ့ဝ့ၫလၧ ကမၩကၪထဲၩ့ ဆၧအူၭလၧလဂ့ၩဘၪအဝ့ၫအဖၫ့ခိၪလီၫႉ

အီၪယံၬကဆိ ချံၭနီၪ ထဲၩ့စဲၪ့လၫ့လၧ ၥံၪ့ဖၭဒိၪ အဖၫ့လၬနီၪလီၫႉ ချံၭနီၪ မၩလၩ့နုၬထဲၩ့အခိၪဎွံၪလၧ အဘံၪ့ကူၩဖၧၩ့ဂီၩ့ အီၪက့ၪၥူၪအၥၭလၧ ဖၧၩ့ၥၭနီၪလီၫႉ လၧမုနၩခီၫအခၫ ချံၭနီၪ မၩအၥၭဘဲၫ လိးခိလီၫ့နီၪလီၫႉ ဆၧအူၭနီၪ ဂဲၫထဲၩ့စဲၪ့လၩ့လၧ ၥံၪ့ခံၫအခၫ ဒၪအထံၩၥိၭချံၭလၧၩ့အ့ၬတၭ လီၩ့ဎွါချံၭနီၪလီၫႉ ဆၧခံၭယူၭအကၠီၩ့ ချံၭနီၪအီၪလၧ ဖၧၩ့ၥၭလါနၫ့ ဆၧအူၭဒၪအ့ၬလီၫႉ လၧခဲၫ့ ဆၧအူၭနီၪ ထၧၩ့ဘၪချံၭတၭ လၩ့ထံၩဖၬကထံၪတၭ အဝ့ၫဂဲၫထဲၩ့ယိၬထၬ ဆၧၥူၪဆၧၥၪလဖၪ လၩ့ထ့ၬလၬလၧ ဖၧၩ့ၥၭဖၫ့ခိၪ ထီးအလူၬလီၫႉ ကထံၪဎး ဆၧအူၭနီၪ ၥၭမဲၪဆၧ ဂၭထၧၫ့လၫ့အဖျဲၪဂီၩ့ ထဲၩ့စဲၪ့ကထံၪလီၫႉ ချံၭနီၪဘိၭ လီၩ့အၪ့ထၧၫ့အၪ့ ဆၧအူၭ အဆၧၥူၪဆၧၥၪလၥၨၩႉ

ဆၧလၧချံၭနီၪ လၧဆၧဖိၪဆၧဎါၥံၪအဖၧၩ့ မွဲဆၧဖိၪဆၧဎါလၧအၥၭအထီၪ့ထုၬတၭ အဝ့ၫၥံၪ အဆၧကိၪ့ၥ့ၪကိၪ့ဘၪမွဲဂ့ၩ ဆ့နီၪလီၫႉ အနီၪတၭ ချံၭနီၪ ၥိၪ့စိၩဆၧပရၧၫ့လၧ စဎွၩအီၪ အဝ့ၫနီၪ ဂၪ့ခိၪယီၩ အနၧၩ့ကၠၪထုၬ ထံၫနၧၫ့မၧၫ့အီၪအကၠီၩ့လီၫႉ