ယ့ၫရှူၬမၩဘျၪထဲၩ့ၦလၧဆၧနၪအီၪအလီၩ့နံၫဂၩ.(စမၭၥူၫ(၈:၂၈-၃၄) )

အဝ့ၫဒၪလ့ၩထီၩ့လၧဝါလခီၫ, လၧဂၭဒရၫအခးနီၪတၭ, ၦလၧဆၧနၪအီၪလၧအလီၩ့နံၫဂၩဒူၩနၭနၭ လ့ၬ, ထီးၦလ့ၩလၧဖၧၩ့ၥၭနီၪ လၥ့ၪဘၪနးဂၩတၭ, ဂဲၫထၪ့ဝ့ၫလၧလီၫ့ဖၧၩ့နီၪအၪ့ဂၬအဝ့ၫဒၪလီၫ. ယိခွါ, အဝ့ၫၥံၪကိၭၡၭထၪ့ဝ့ၫတၭ, စံၭဝ့ၫဒၪ, ယွၩအဖိၪခွၫဧ့, ဆၧဘၪဆဲၫ့လိၬပၥၭလၧပၧၩဒဲနၧၩ, မွဲဆၧနီၪလဲၪ. အမုအလၩလဘၪဒံၭဘၪတၭ, မွဲနဂဲၫမၩအၧၩ့မၩနၭပၧၩဆ့ဧၪ. ထိၭခမျၧးလဒီၪ့အၪ့ဆၧလၧအယဲၩ့နီၪတၭ, ဆၧနၪလဖၪနီၪ အၪ့ကံၩ့အၪ့ယၫဝ့ၫတၭ, စံၭဝ့ၫဒၪ, နအ့ၪနၫ့ထၪ့ခွံၬပၧၩတၭ, ဒုၭလ့ၩနုၬပၧၩ လၧထိၭလဒီၪ့နီၪအဖၧၩ့ဆံၭ. အဝ့ၫနီၪလီၩဘၪဝ့ၫ, လ့ၩကဒၪဘီၪ အဝ့ၫၥံၪစဲၪ့ထၪ့ခွံၬတၭ, လ့ၩနုၬဝ့ၫလၧထိၭလဒီၪ့အဖၧၩ့လီၫ. ယိခွါ, ထိၭခမျၧးထၧၫ့ဒီၪ့ယၫနီၪ စဲၪ့ဖုၫလၩ့လၧၡၭမ့ၬထုး ထၪ့ထီၫအလီၩ့လၧကွံၩဖၧၩ့တၭ, လၩ့အုၭၥံၫဝ့ၫလၧထံၫကျၩနီၪလီၫ. ၦယူၬထိၭလဖၪ စဲၪ့ဝ့ၫတၭလ့ၩနုၬလၧဒိၩ့ဖၧၩ့, လီၩဘၪဆၧထီးအလူၬ, ဒဲဆၧလၧအဘၪဆဲၫ့လၧ ၦလၧဆၧနၪအီၪလၧအလီၩ့ နီၪလီၫ. ယိခွါ, ၦဒိၩ့ဖိၪဂဲၫထၪ့လၧယ့ၫရှူၬအအီၪ ထၧၫ့ဒိၩ့ယၫတၭ, ထီးအဒၪဘၪဝ့ၫနီၪ အဝ့ၫၥံၪ အၪ့ကံၩ့အၪ့ယၫဝ့ၫ ဘဲၫၥိၭအမိစဲၪ့ထၪ့ခွံၬလၧအဝ့ၫၥံၪအခးလီၫ.