အ့ၪၥၭနၪ့ခွံၬ ဆၧအီၪမၧၫ့ ဖးဖီၩ့ကကၪလီၫ – ၂

လၧဂၪ့ခိၪချိၫ့ယီၩ ဆၨၩကဆၨၩ ဘဲၫလလၩ့ဘၪအဂး လံၬလဲ ဆၧဆၧးဎံၫဆၧးလၩနီၪ အရ့ၩဒိၪဝ့ၫတၡါလီၫႉ လံၬလဲ ထီၪ့မၬ ဆၨၩကဒိၪထၪ့လီၫႉ မွဲဆၧဘဲၫနီၪ ပလံၬလဲနီၪ ပကဘၪမၩလိၪ ထီးပၥ့ၪ လိၫဝ့ၫလီၫႉ ပကဘၪမၩလိၪ ထီးပၥ့ၪလီၫ မွဲအ့ၬ ပကဘၪမၩ ထီးအဘၪနီၪလီၫႉ ပလံၬလဲယီၩ ဂၪ့ခိၪႇ ထံၫခးအဂး ၦၥိၩ့ထၪ့လန့ဘၪလါနၫ့ ပဆၨၩအဆၧလၩဆၧဖၩ့အဂး လၧဂၪ့ခိၪချိၫ့ယီၩ ပဆၨၩအၥၭ ကဆုးအီၪမၧၫ့အဂး ပကဘၪကျ့ၭစၨၭ လူၬဂဲးလူၬဘၭနီၪ မွဲၦမူၩဒၩလီၫႉ

ဘၪထွ့ၫလၧ လံၬလဲနီၪ ကျ့ၭပအၪ့ဎၬ ဆွံဆွံယိၬယိၬလီၫႉ ပဆၧအၪ့ဎူၫအၪ့ဎၬနီၪ မွဲလ့ၩခိၪလ့ၩနါ ပဆၧၥၭမၧၫ့အကၠီၩ့တၭ ပဆၨၩလံၬလဲအနိၪ့နီၪ ပကဘၪအီၪက့ၪအၪ့ဎၬလၧ ဆၧဆွံယိၭအဖၧၩ့လီၫႉ လၧ Globalization ဆၧၫ့ထီဖၭဒိၪဖၧၩ့ယီၩ အ့ၪပကျ့ၭစၨၭ  ဘဲၫပကျ့ၭစၨၭအၥိၭ ဂၪ့ခိၪၥ့ၪယၫယူၭတၭ အီၪဒၪမွဲ ပကဘၪကျ့ၭစၨၭလီၫႉ အထီဘဲၫယီၩ လၧ Social Media Plaform အဖၫ့ခိၪ ပဖီပလံၬလဲန့ယူၭ နီၪ ဘဲၫပၥ့ၪယၫထၬ ကိၭဂၩအၥိၭ ဆၧယီၩမွဲ ၦလၧအၥ့ၪယၫမူၩဒၩလဖၪ ဆၧယံၩဆၧၡီၩ့ဒဲ အဆၧကျ့ၭစၨၭ အချံၪအၥၪနီၪလီၫႉ

ၦၡၩကိၭဂၩနီၪ မွဲၦၡၩလါနၫ့ မွဲၦၡၩအၥုၪ့အၥၭ လအီၪဘၪအၥိၭ ဖျိၩ့ဆၨၩၥံၪနးဆ့ ကဲၪဖျိၩ့လါနၫ့ ဖျိၩ့အၥုၪ့ၥၭ လအီၪဘၪနီၪ မွဲလလၩ့ဆၫ့ဘၪလီၫႉ ဆၧလၧ ဖျိၩ့အၥၭလအီၪဘၪနီၪ အၥၭဆုးလီၩ့လၧ ဆၨၩဆၬအနိၪ့အ့ၬႇ အဆၨၩဆၬအဂး အီၪၥ့ၪအီၪဒၪဝ့ၫႇ စီၪဆံၭအဆၨၩဆၬဒဲ ဆၨၩဆၬအဂဲး လီၩ့ချဲၩ့ဝ့ၫလဂ့ၩလဘၪဘၪနီၪလီၫႉ

ပမၩလန့ဘၪ ဆၧဖံၭဆၧမၩလဖၪ လၧၦၡၩမၩန့နီၪ  လီၩအၪ့ကီၪဆၧႇ ၥၭခ့ၬဆၧႇ လီၩချဲၩ့အၧၩ့ဆၧလအိၩလယီၩၥံၪနီၪ ကျ့ၭအခံၫ့လူၬအ့ၬ နီၪလီၫႉ ပဆၨၩလံၬလဲဆၧချဲၩ့နီၪ အၪ့ဎၬဝ့ၫဎွံၪဎွံၪလီၫအကၠီၩ့ ဖျိၩ့နီၪ ကဲၪထၪ့ထဲၩ့ ဖျိၩ့ကၭပၠၩ လၧပထံၫခးဖၧၩ့ယီၩ အီၪဝ့ၫအၪမၬလီၫႉ အ့ၪပဒၪဘၪ ဘဲၫယီၩၥိၭအခၫ မွဲပၥၭလမုၬဘၪလီၫ လါနၫ့ အဝ့ၫၥံၪအဂဲးဒၪဝ့ၫအီၪအကၠီၩ့တၭ ပၥၭမုၬအ့ၬနးဆ့ မွဲပမၩလၥ့ၪဘၪနးမံၩ့နီၪလီၫႉ