11နွ့ၫလနွ့ၫ မုအီၪပွံၩနံၩ (ယ့ၫရှူၬယၫ့ၥၭၦခမျၧးလဖၪ.) (စမၭၥူၫ(၉:၃၆-၁၀:၈) )

ယ့ၫရှူၬယၫ့ၥၭၦခမျၧးလဖၪ.—
ယ့ၫရှူၬစဲၪ့ဝံၩ့ဝၩ့ ကိၭဒိၩ့ကိၭတဝၫ့တၭ, ၥီၪ့ထဲၩ့ ဆၧလၧအဝ့ၫၥံၪ အၥရိၬဖၧၩ့တၭ, လီၩလၩ့လၬလၩ့ ဘၩ့မုးအဆၧၥၭထိၬအပရၧၫ့တၭ, မၩဘျၪထဲၩ့ကယဲဆၧဆၫ, ဒဲဆၧဆီၫ့ကိၭဆီၫ့ကဲၩ့ ထီးအလူၬလီၫ. အဝ့ၫနီၪ ဒၪဘၪၦခမျၧးတၭ, ယၫ့ၥၭဝ့ၫလီၫ. အဂဲးဘဲၫယီၩ ၦလဖၪနီၪ လၩ့ပွံၭလၩ့ထၩ့တၭ, လၩ့မုလၩ့ဖၭဝ့ၫ ဘဲၫၥိၪလဖၪလၧၦလအီၪယူၬဘၪဝ့ၫအၥိၭနီၪလီၫ.ထီးနီၪလဖၧၫ့ အဝ့ၫဒၪစံၭအထံၩအဖျဲၥံၪ, ကူၭဆၧအလး အီၪအၪမၬတၭ, အ့ၪမွဲၦမၩဆၧလဖၪနီၪ အီၪၡၩဂၩလီၫ. မၩအၥၭဘဲၫနီၪတၭ, ဘၩဆိၪဖၪအၪ့ကံၩ့ကူၭဆၧအလးအကဆါ, ဘဲၫၥိၭအမိအၪ့မၧၫ့လၩ့ ၦမၩဆၧလဖၪလၧကူၭဆၧအလးအဖၧၩ့နီၪဆံၭ.
ၦဆၧအၪ့မၧၫ့ဖိၪလဆံၫနံၫဂၩ.—
အဝ့ၫဒၪကိၭန့အထံၩအဖျဲလဆံၫနံၫဂၩနီၪ လၧအအီၪတၭ, ဖ့ၪလၫ့ဝ့ၫဆၧစီၩ့ဆၧမၩ့ လၧဆၧနၪအ ဖၫ့ခိၪ, ဘဲၫၥိၭအမိနၫ့ထၪ့ခွံၬဝ့ၫ, ဒဲမၩဘျၪထဲၩ့ကယဲဆၧဆၫဒဲ ကယဲဆၧဆီၫ့ကိၭဆီၫ့ကဲၩ့ ထီးအလူၬအၥိၭနီၪလီၫ.
ၦဆၧအၪ့မၧၫ့ဖိၪလဆံၫနံၫဂၩနီၪအမံၩ့မွဲဘဲၫယီၩ, အခၪ့ထံၭမွဲစစဲမၧၫ့ကိၭဝ့ၫလၧစပံတၧၫ, ဒဲအထၧၫ့ဖုဝဲစအၫ့ဒူၫ,စဇ့ၭဘဒံၫအဖိၪခွၫစယ့မံၭ, ဒဲအထၧၫ့ဖုဝဲစယီဟၫ့ စဖံလံၭဒဲစဘၫၥီလမုၫ, စထီမၭ, ဒဲၦအၪ့ကံၩ့အခီၫ့စမၭၥုၫ စအၫလဖံအၧၭအဖိၪခွၫစယ့မံၭ, ဒဲစလ့ၭဘအၧၭကိၭဝ့ၫအမံၩ့အၥၫ့စၥၫဒံအၧၭ, ၦကၫနအၫ့ဖိၪစစဲမၧၫ့, ဒဲစယုဒၭအံၭစကၫရအၧၭ လၧအဖ့ၪလၫ့ခွံၬယ့ၫရှူၬလီၫ.
ၦဆၧအၪ့မၧၫ့ဖိၪလဆံၫနံၫဂၩအဆၧၥၭထိၬ အပရၧၫ့ဆၧမၩ—-
ၦလဆံၫနံၫဂၩနီၪ ယ့ၫရှူၬအၪ့မၧၫ့ အလ့ၩဆၧတၭ, မၪလူၬဝ့ၫစံၭဝ့ၫဒၪ, လ့ၩဖိၬဖၧၩ့ၥၭလၧၦဆၨၩလဖၪအအီၪလဂ့ၩ, လ့ၩနုၬလၧၦစမ့ရအၫဖိၪ အဒိၩ့ၥံၪနးစီၪ့လဂ့ၩတၭ အ့ၪမွဲ, လ့ၩဆိၫဒၪခလူၬလၧၥိၪလၧအလၩ့မါ, ၦအံၫစရ့လၭအဂံၪ့ဖိၪ အအီၪနီၪဆံၭ. လ့ၩလီၩလၩ့လၬလၩ့ဆၧတၭ, စံၭနၥံၪဝ့ၫ, မူၭခိၪအဘၩ့အမုးနီၪ ဘူၭထၪ့ယူၭ. မၩဘျၪထဲၩ့ၦဆၫၥံၪ, ဒုၭဂဲထုၪ့ထဲၩ့ၦၥံၫလဖၪနီၪ, မၩဆံၫ့ထၪ့ထဲၩ့ၦလၧအခံၫထူၬဆၫအၧၩ့လဖၪနီၪ, နၫ့ထၪ့ခွံၬဆၧနၪလဖၪဆံၭ. နၥံၪဒိၭန့ဆၧပျီၩပျီၩတၭ, ဖ့ၪလၫ့ဆၧပျီၩပျီၩဆံၭ.