ဟားခါး ဒဲ ဖလမ်း RVA ဆၧရၩလၩ့လူလဖၪ စူၭကီၪ့မၩဎိၭလၩ့ RVAမုနံၩ အဆိၪထုၬကဘျၩ့အဂဲး

၂၀၂၆နံၪ့ လၩမ့ၫ၃ၥၫ့နီၪ ဟားခါး ဒဲ ဖလမ်း RVA ဆၧရၩလၩ့လူလဖၪ စူၭကီၪ့မၩဎိၭလၩ့ RVAမုနံၩ အဆိၪထုၬကဘျၩ့ လၧဟားခါးဝံးနီၪလီၫႉ ဖလၩ့ဝံးဖၧၩ့ ဆၧတုၩ့ထၪ့တုၩ့လၩ့လဖၪ ကဲၪထၪ့ဝ့ၫဒၪအကၠီၩ့ စၭထၪ့လၧ၂၀၂၂နံၪ့ အခံၫ့အိၩ RVAဖလမ်းနီၪ ဘၪၥုၭထဲၩ့အလးလၧ ဟၩခၩဝံးနီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪ ဟၩခၩဆၧအီၪကီၪ့ ၥၫ့ခိၪဒိၪ Lucius Hre Kung ဒဲ ၥၫ့မုၥၫ့ခၫ၉ဂၩနီၪလီၫႉ လၧဆၧထံၪလၩ့ဒီၪလၩ့နီၪအဖၧၩ့ မံၭထၭမုၪ ဂဲၫဝ့ၫဒၪ ၁၈ဂၩ ဒဲ ၦဆူနဲၩဖိၪၥံၪ ဂဲၫဝ့ၫဒၪ ကအီၪဖိၭဘိၭ အဂၩ၁၀၀၀နီၪလီၫႉ ၥၫ့ခိၪဒိၪ စံၭဝ့ၫဒၪ “ဆၧၥၭထိၬပရၧၫ့လဖၪ ဘိၩကထီၩ့စိၩ အီၪလၧဂၪ့ခိၪထၧၫ့ဖျိၪ့ ယၫဖၧၩ့ ခၠၩ့ဆၨၩဖိၪၥံၪအအီၪအဂးနီၪ RVAယီၩ မွဲအရ့ၩဒိၪဝ့ၫဒၪအဂဲးႇ ထီဘဲၫယီၩ ၦၡၩအၪဒၪဆၧ လီၩ့ဎွါထၪ့ ဆၧဘိၪ့ဆၧဘၩ ဆၧစံၭဆၧၫ့လဖၪ လၧဆိၫၡဲၫမံၫဒံၫယၫ အဖၫ့ခိၪအကၠီၩ့ ခၫ့ဖျီၪလၧ RVA ဆၧရၩလၩ့လဖၪယီၩ ၦၡၩဂဲၫထဲၩ့ထဲၩ့လၧယွၩအီၪ အီၪဝ့ၫဒၪအဂဲးႇ ၦဆူနဲၩဖိၪကိၭဂၩ ကဘၪၥ့ၪယၫလၩ့အၥၭလၧ ယွၩရွံထၪ့ထၬပၧၩအဂဲးႇ တၭ ပကဘၪလီၩလၩ့လၬလၩ့ ဆၧၥၭထိၬပရၧၫ့လဖၪအဂး ပမူၩဒၩအီၪဝ့ၫကိၭဂၩအဂဲးႇ လၧအိၫလဲၩ့ဖၫ့ခိၪ ပယိထၪ့ဆၧၥၭထိၬပရၧၫ့လဖၪဂီၩ့ ပဖ့ၪလၫ့ like ဒဲ share လဖၪနီၪ မွဲဝ့ၫ ပနုၬလၩ့ပၪဝ့ၫဒၪလၧ ထီအၥၫ့ဆၧအီၪကီၪ့ဆၧမၩဖၧၩ့ဂီၩ့ အယီၩမွဲဒံၭလၧ ပမၩဆၧၩ့ RVAအဂဲး” ၥၫ့ခိၪဒိၪယီၩ လီၩလၩ့လၬလၩ့ ဖ့ၪဂဲးဖ့ၪဘၭ ၦဆူနဲၩဖိၪ ဘဲၫယီၩအၥိၭနီၪ လီၫႉ ဆၧမၩလၩမၩဖၩ့ ဘိၪ့မုနံၩယီၩနီၪ မွဲဖ့ၪနဲၪထၪ့ ဆၧအၪ့ထၩလဖၪအကျၩ အီၪလၧ ခၠ့ၩဆၨၩခးဒီၪ့ဖၧၩ့ ကၭၥလံၬမံၫဒံၫယၫအဆၧဂုးခၧၫ့ဒဲ ဖီၪ့ထၪ့ဖံၭထၪ့ ယွၩအဆၧဖံၭဆၧမၩ လၧ ကၠီၪ့ဖျီၩ့အၪမံၩ့ဒ့ၭအဂဲးနီၪလီၫႉ နးအဲၪဖီၫဘွၩ