ဖျိၩ့ဆၨၩလဖၪအဆၧအီၪပြံၩပြၩ (၃)
ခးပယၩ့ထၬဒဲ ခးပယၩ့လၬအကျၩ ဆၧဆုးကျိၭအၥၭဒဲ ဆၧၥိၪ့ထုၭၥိၪ့လၩ့ဆၧအဂး ထံၫဖၧၩ့ၥၭႇ လဲၪ့မ့ၪဖၧၩ့ၥၭၥံၪ မၩအၪထၪ့ဝ့ၫနီၪလီၫႉ ဆၧမၩလဖၪယီၩ ဘဲၫမၩထၪ့ဝ့ၫကန့အဂး လိၫဝ့ၫဒၪ ၦမၩဆၧဖိၪလဖၪ ခိၪလၩဘွၩ ကိၭနုၬလၩ့ လးကျဲၩ့ထီးအဎံၩ့လီၫႉ အဝ့ၫၥံၪ ကိၭၦၡၩၥံၪအၪမၬဂီၩ့ ဖ့ၪလၫ့အ့ၪဝ့ၫအလးအကျဲၩ့ မၩအ့ၪဝ့ၫကိၭမံၩ့ဒ့ၭနီၪလီၫႉ
ခိၪလၩဘွၩပဒိၪနီၪ ကထုၭအၪထၪ့ဘုၪကန့အဂး ဘဲၫၦၡၩၥံၪကဂဲၫၥုၭအီၪအၥၭလၧ ထံၫထၪကျိၩ့အဂး ဖ့ၪအ့ၪၦၡၩ ဆၧ ၥၭကွံၩဂီၩ့ ကိၭကၠူၭဝ့ၫနီၪလီၫႉ အခံၫ့အထီနီၪ အီၪလၧခးပယၩ့ထၬကကဲၩ့ခီၫ ဒီၩ့ဂိၩၥံၪ ၥၧၫ့ကုၬဘျဲၪနီၪ ဂဲၫၥုၭအီၪအၥၭလၧ ခးပယၩ့လၬယီၩ အကၠီၩ့ ၡၩအဆၧဝံဆၧနၬ နဲၪဖျီၪ့ထၪ့ထၬအီၪနီၪလီၫႉ ခးပယၩ့လၬကကဲၩ့ခီၫမွဲဝ့ၫ မိၫဆၨၩဒဲ ဖျိၩ့ဆၨၩၥံၪအီၪအလး ဘုၪန့ထၪ့ဝ့ၫဒၪအလးနီၪ ဘဲၫလးကျဲၩ့အဂူၫဂၩၦၡၩၥံၪကဂဲၫၥုၭအီၪအၥၭအဂး လၧၥနိၫမွဲဂ့ၩႇ လၧဆၧၥၭကွံၩလဖၪမွဲဂ့ၩ ခိၪလၩဘွၩ ပဒိၪထုၭန့ဂီၩ့ ဖ့ၪလၫ့အ့ၪၦၡၩ အခွးအရ့ၩတၭ အခံၫ့လယံၬဘၪအဖၧၩ့ ၦၡၩၥံၪဂဲၫၥုၭအီၪအၥၭ အၪမၬနီၪလီၫႉ အထီနီၪ မွဲဒီၩ့ဂိၩၥံၪ ဂဲၫၥုၭအီၪအၥၭ အနၭထုၬ နီၪလီၫႉ
ဎံၫလၩဒဲ လဲးဝ့ၫဒၪ ထံၫထၪကျိၩ့လးကျဲၩ့ ဖံၬလးလဖၪနီၪ မၩပျၩ့ထၪ့ဝ့ၫဂီၩ့ အလးခဲၫ့ မွဲကဲၪထၪ့ ကုန်းဘောင်စဎွၩ အဆၧပၧၩ့ဖၫ့လၬ လးကျဲၩ့ကဒုၩနီၪလီၫႉ ၦဖျိၩ့ဆၨၩဖိၪၥံၪ အီၪထၬဝဲၩ ထံၫထၪကျိၩ့လးကျဲၩ့ယီၩ မွဲဂဲၫကဲၪထၪ့ ခီၫ့ၡၩအလးအကၠီၩ့တၭ လးကျဲၩ့ဂူၫဂၩ ၦၡၩၥံၪ အီၪၥုၭအီၪကၠၭအၥၭဂီၩ့ လီၩ့ဎွါထၪ့ ခီၫ့ၡၩအခွးအရ့ၩနီၪလီၫႉ
