ၦဖိၪဎွ့ၪမုၪဖိၪ – ၂

ၦဖိၪဎွ့ၪမုၪဖိၪယီၩ လ့ၩထီၩ့လၧ အဆၧအဲၪခွၫ အတဝၫ့အခၫ ဖနံၬထးကၩအမိနီၪ ဒၪအဖိၪခွၫဂဲၫထဲၩ့ကိၭန့ ၦမုၪတၭ ၥၭထၪ့ စံၭအဖိၪခွၫ ဖိၪခွၫ ဘၪနီၫလဲၪ နဘၪဂဲၫထဲၩ့န့နမၫလၧ ၦၡၩအတဝၫ့ နလီၩၥ့ၪယၫယၧၩနးမံၩ့အ့ၬဂီၩ့ နဂဲၫထဲၩ့ကိၭနီၪ ယဘၪယၥၭအ့ၬႇ နအၪ့န့ထၬ နမၫယီၩ မၦၡၩအမုၪပၥ့ၪလဲၪနီၪ ယယိ ယၥ့ၪယၫ အ့ၪမွဲနကမိမၩ ၦမုၪအဂ့ၩအဘၪနီၪ မိမိကလီၩ့ဎွါအ့ၪနၧၩ ဖနံၬထးကၩ အမိမိလီၩဆၧလဖၪနီၪ ၦဖိၪဎွ့ၪမုၪလဂၩ ၡီၫ့လၩ့ထၬ အခိၪဎွံၪဂီၩ့ ချဲၩ့နးမီၪ့အ့ၬဂီၩ့ ခိၭနၪဝ့ၫဒၪနီၪလီၫႉ အဝ့ၫလီၩဆၧနးမံၩ့အ့ၬ အီၪလၧ အမံၩ့ၡါအဂံၪ့နီၪဂီၩ့ မၩဆၧမၩကိၭမံၩ့ဒ့ၭနီၪလီၫႉ လါနၫ့ အဝ့ၫ မၩဂံၪ့အဆၧမၩကိၭမံၩ့ဒ့ၭတၭ အမံၩ့ၡါမုၪနီၪ မၩဆၧမၩနးမံၩ့လၧၩ့အ့ၬဂီၩ့ ဆၧၫ့နၩ့အီၪဂ့ၩဂ့ၩဘၪဘၪလီၫႉ အမံၩ့ၡါမုၪယီၩ ဘၪမၩဆၧမၩ နးမံၩ့အ့ၬလါနၫ့ ဒၪအဒဲၪနီၪ အိၭနးဆံၭအ့ၬဘိၭ လီၩဝ့ၫမွဲ အဒဲၪနီၪ ဘၪအၥၭအ့ၬလီၫစွါဘဲၫႉ

အဖိၪခွၫအ့ၪမွဲ လအီၪဘၪဂံၪ့အခၫ အဒဲၪနီၪ ဆိၪဝ့ၫ မၩနၧၩ့မၩစၪဝ့ၫအမံၩ့မံၩ့လီၫႉ အဖိၪခွၫအ့ၪဂဲၫထဲၩ့ထီၩ့လၧဂံၪ့အခၫ လီၩၡိၭအဒဲၪအဂဲး လဂ့ၩလဘၪဘၪ လၧအဖိၪခွၫနီၪလီၫႉ  နမၫနီၪ မွဲၦမုၪအဂ့ၩအ့ၬ မၩဆၧမၩ ဘၪခံၩဘၪထံၭနးမံၩ့အ့ၬႇ ကၠုၪ့ခီၫကၠုၪ့ဒံၭ လၧနအီၪဘၪ မၩဆၧၩ့ယၧၩဆၧနးမံၩ့အ့ၬ ယဘၪမၩဆၧမၩ ယၧၩကဂၩလီၫ လါနၫ့ ဖိၪခွၫနီၪ ၥ့ၪယၫအမၫ အဂဲးထီးအလူၬအကၠီၩ့ လနဲၩ့ဘၪအမိအဆၧချဲၩ့ဒဲ လၧယအီၪဘၪဂံၪ့အခၫ မိမိဘၪမၩဆၧမၩနးမံၩ့အ့ၬ ယမၪမၩထီးအလူၬ အနီၪမိမိ ဘၪအၥၭ ယမၫဒံၭအ့ၬ လီၩကၩ့ကၩဝ့ၫအလၩ လဂ့ၩလဘၪဘၪဒံၭ စံၭဆၧၫ့ထဲၩ့အမိမိ ဘဲၫယီၩၥိၭလီၫႉ

ကနံၩနီၪတၭ ဖိၪခွၫနီၪ ကဘၪလ့ၩဆၧတၭ မၪလူၬထးအမိ ထီးမၩနၧၩ့မၩစၪအဝ့ၫအမၫလဂ့ၩနီၪလီၫႉ မိဧ့ႇ အ့ၪမွဲယလ့ၩဆၧ အထီ လၧယလးခဲၫ့ ယိထွ့ၫထၬအ့ၪယၧၩယမၫ အၪ့မၧၫ့ဆၧမၩနၭလဂ့ၩ အ့ၪမွဲနအၪ့မၧၫ့ဒံၭနီၪ ယအီၪကၠၧၫ့ကၠၧၫ့လၧနၧၩလၧၩ့အ့ၬ နီၪလီၫႉ အမိနးဆ့ ဒၪအဒဲၪနီၪ မွဲန့အ့ၬဘိၭ ခိၭနၪအဖိၪခွၫအဆၧချဲၩ့အ့ၬ မၩနၧၩ့မၩစၪအဒဲၪ့အမံၩ့မံၩ့လီၫႉ အဒဲၪမုၪနီၪ အီၪလၧအဒံၪအဒၧၩ့နးဆ့ စီၪဝ့ၫနးမံၩ့အ့ၬႉ အခံၫ့ထီၩ့အခၫ ၦဖိၪဎွ့ၪမုၪဖိၪယီၩ အီၪဖျဲၪန့ ဖိၪခွၫလဂၩနီၪလီၫႉ ၦလၧအအီၪဖျဲၪ အနဲၩ့ထံၭနီၪ မ့ၪကဘၪအီၪဝ့ၫကိၭကၠၪလါနၫ့ဂ့ၩ အမံၩ့ၡါမုၪနီၪ အၥုၪ့ၥၭဂ့ၩအ့ၬအကၠီၩ့ ၡီၫ့လၩ့ဖံၭခွံၬမ့ၪထီးအလူၬလီၫႉ

အနီၫနီၪ ကၭဒံၭအ့ၬ ဆၧၡီၫ့လၧ ထံၫချၪ့ အၪ့မၧၫ့ဝ့ၫ ဒုၪ့ထံၫႇ ဖ့ၬၥံၪ့မုႇ အၪ့ဖီၫ့မ့ၪၥံၪနီၪလီၫႉ အၥုၪ့ၥၭကဲၪ့ဝ့ၫဒၪ မံၩ့ၡါမုၪလဂၩယီၩ ၦအီၪဖျဲၪၥၫ့ လကြၨၭမၩဘၪဆၧမၩလဖၪ အၪ့မၧၫ့အဒဲၪ့ကိၭမံၩ့ဒ့ၭနီၪလီၫႉ အဒဲၪ့မုၪနးဆ့ အီၪဖျဲၪဂီၩ့ၥၫ့ဘဲၫယီၩ လီၫအကၠီၩ့ မၩဆၧမၩန့ဒံၭအ့ၬအကၠီၩ့ စံၭဆၧၫ့ထဲၩ့ အမံၩ့ၡါမုၪနီၪလီၫႉ အဝ့ၫမၩဆၧမၩလနၧၩ့ဘၪ အမံၩ့ၡါမုၪ ၡီၫ့လၧထံၫချၪ့အခိဒဲ ဂုဝ့ၫလၧမ့ၪၥံၪ ထီးအဝ့ၫထီးလန့ဘၪလီၫႉ အနီၭနီၪကၭဒံၭအ့ၬ အၪ့န့အလံၩဂီၩ့ ထံၭလၩ့ဝ့ၫလၧ ဝၪဖၭဒိၪအကဲၩ့ဖၧၩ့ဂီၩ့ အူၭဘံၭထၬ ဝ့ၫလၧ ပလူၭ ထိၪယွၩလၩ့ဝ့ၫလၧ ထံၫကျၩနီၪလီၫႉ