ဂီအထီယီၩအဂးၥၫ့ဎွၩလ့ၫအိၫ ၁၄ ဂၩလဂၩ လီၩလၩ့ဆၧပရၧၫ့အဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ဂီအထီယီၩအဂးၥၫ့ဎွၩလ့ၫအိၫ ၁၄ ဂၩလဂၩ လီၩလၩ့ဆၧပရၧၫ့အဂဲး အကၠီၩ့နီၪလီၫႉ ဂီအထီယီၩနီၪ ပကဘၪမၩဂ့ၩထၪ့ပဆၧဆူၩနဲၩအၥၫ့ဒဲ ပဆၧခိဆၧဂီၩအီၪထီးလူၬ ပလကြၧၭ လၩ့ဘၧၩ့ဘၪအကၠီၩ့ နဲၪဖျီၪထၪ့အ့ၪပၧၩဖၧၩ့ၥၭအခံၫ့နီၪလီၫႉ  

အဆၫ့လၧၫ့ထုၬနီၪမွဲဝ့ၫဆၧခိနၫနီၪလီၫႉ ပခိနၧဆၧၥ့ၪနီၪ လဂၩဘၪလဂၩ ပကကၧၩ့ထၪ့ဆၧဖံၭထံၩဖံၭၥိၭအဂး ဖၧၩ့ၥၭအဂ့ၩထုၬနီၪလီၫႉ ရ့ၩဎိၩထုၬ ပခိနၫကဆါဎြံၬအလူၬအထၫနီၪ ပအီၪၥၭမၧၫ့ဖၧၩ့ ပခိနၫဆၧကၥ့ၪလၧ ဆၧအဂ့ၩဖၧၩ့ႇ ဆၧအမၪဖၧၩ့အဂး ၥီၪ့အ့ၪပၧၩနီၪလီၫႉ ဂီအထီယီၩပကဘၪခိနၫဆၧအဂး မွဲဝ့ၫအခံၫ့အဂ့ၩထုၬနီၪလီၫႉ

လၧခဲၫ့ကမံၩ့နီၪ မွဲဝ့ၫဒုၪဆၧအၪ့နီၪလီၫႉ ဒုၪဆၧအၪ့နီၪပကဒိၭန့ဘၪကဆါဎြံၬအလူအထၫအဂး ပကဘၪတဲၩဝဲၩ့လၩပၥၭအခံၫ့နီၪလီၫႉ ဆၧလၧဒုၪဆၧအၪ့နီၪ ပနးၥၭအဂး ပကဘၪနီၫယါလၩ့ ပဆၧမၪအီၪထီးလူၬနီၪလီၫႉ လၧခဲၫ့ကမံၩ့နီၪ မွဲဝ့ၫ ကၠၧၫ့ကၠၧၫ့နီၪလီၫႉ ဆၧခိနၫဆၧဒဲ ဒုၪဆၧအၪနံၫမံၩ့ယီၩအီၪကၠၧၫ့ကၠၧၫ့စွါဘဲၫ ပဂး လကၭဒ့ၭဘၪၦဂူၫဂၩအဂး အခိးအတၩကန့အၪမၬဒ့ၭအကၠီၩ့ ၥၫ့ဎွၩလ့ၫအိၫ ၁၄ ဂၩလဂၩ လီၩလၩ့ဆၧပရၧၫ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ