ဖိၪၥၪဆံၭၥံၪအၥၭခံဖၧၩ့ဘဲၫအဲၪထၪ့နဲၩ့ဎီၩ့ကၥ့ၪအဂးပကဘၪမၩအ့ၪဘဲၫၥ့ၪလဲၪ (၂)

ၥၧၫ့ထံၪကထံၪနီၪဘိၭ ပကဘၪၥီၪ့လိၪအ့ၪအဝ့ၫၥံၪ ဘဲၫအဲၪကွံၩယူၭယၪ့ဆၧ အၥ့ၪအဂးနီၪလီၫႉ မၩခၬဆၧအထံၭလဖၪလဂ့ၩႇ မၩနၧၩ့မၩစၪ ဆၧဖိၪဆၧဎါၥံၪလဂ့ၩအဂးနီၪ ပကဘၪၥီၪ့လိၪအဝ့ၫၥံၪလီၫႉ ဆၧလၧဂၪ့ခိၪနဲၩ့ဎီၩ့နီၪ ဆုးကျိၭလိၬၥၭထီးအလူၬတၭ အရ့ၩဒိၪဝ့ၫအကၠီၩ့ႇ ၦကဲၪၦၡၩလဖၪ လၧနဲၩ့ဎီၩ့အဖၫ့ခိၪ ၦမူၩဒၩအီၪဝ့ၫဎွ့ပၥ့ၪလဲၪ ပကဘၪလီၩနဲၪအ့ၪ ထီးအဝ့ၫၥံၪနၪၥ့ၪလီၫႉ

လၧခဲၫ့ထုၬကထံၪနီၪ ပကဘၪၥီၪ့လိၪအ့ၪအဝ့ၫၥံၪ လုၫလါလၧ ပၥိၩ့ထၪ့န့လဖၪနီၪလီၫႉ ပအီၪလၧ ဂံၪ့အခၫ ဆၧၥိၩ့ထၪ့ ထံၫႇ မ့ၪ ၥ့ၪၥ့ၪဘၪဘၪႇ ပၥိၩ့ထၪ့ထဲၩ့န့ ဆၧဘံၪၥိၭလဖၪ ၥိၩ့ထၪ့ထဲၩ့ဝ့ၫ (Recycle) ႇ မၩလၩ့ၡၩၥိၩ့ထၪ့ ပလၭစတ့ၭထိၪ့လဖၪ မွဲဝ့ၫ ဆၧပဒၩ့ထၪ့ ဂၪ့ခိၪနဲၩ့ဎီၩ့အဂး ဆၧမၩဆံၭဆံၭဖိၪၥံၪလဖၪယီၩ မွဲဖိၪၥၪဆံၭၥံၪ ပၫဒၪဝ့ၫလီၫႉ ဆၧလဖၪၥံၪယီၩ မွဲအဝ့ၫၥံၪကဂဲၫဎိၩထၪ့ ၥၭဘၪ့ၥံၪလၧ အၥ့ၪယၫမူၩဒၩၥံၪနီၪလီၫႉ

မိဖါၥံၪလဖၪ အဆၧမၩနဲၪအ့ၪႇ ဆၧမၩဆၧၩ့ထၪ့လၧ ကဘူၭထံၭထၪ့လၧ နဲၩ့ဎီၩ့ႇ ကိၭနံၩဒ့ၭဆၧၥိၩ့ထၪ့န့ဝ့ၫ လုၫလါအလ့ၩလဖၪဒဲ ပလဲၩမွံၩဎုၬလၧ ဆၧကိၪ့ၥ့ၪစွါဘဲၫ ဖိၪၥၪဆံၭလဖၪ ကဂဲၫကဲၪထၪ့ ၦလၧ အအဲၪကွံၩ ယူၭယၪ့နဲၩ့ဎီၩ့ၥ့ၪ လဖၪၥံၪနီၪလီၫႉ ဆၧလၧ ဖိၪၥၪဆံၭၥံၪနီၪ မွဲထံၫခး အထီလၧယၫလီၫႉ မွဲဆၧဘဲၫနီၪ ဖိၪၥၪဆံၭလဖၪ ဘဲၫကကဲၪထၪ့ ၦလၧအအဲၪကွံၩယူၭယၪ့နဲၩ့ဎီၩ့ကၥ့ၪအဂးနီၪ မွဲဆရၫႇမုၪဒဲ မိဖါၥံၪလဖၪ အမူၩဒၩအီၪဝ့ၫကိၭဂၩနီၪလီၫႉ