စလုကၭ(၄:၁-၁၃) ယ့ၫၡုၬဘၪဆၧကျဲၩ့ဖစီၩ့

ယ့ၫၡုၬလၧၫ့ဎွ့ၩဝ့ၫလၧၥၭမုဆံၫ့ဎံၪ, ထဲၩ့ခွံၬဝ့ၫလၧယီၫဒၫ့တၭ, ၥၭမုနီၪ လ့ၩၥိၫ့ဝ့ၫ လၧမံၩ့လၬကျၩတၭ,ဘၪဆၧကျဲၩ့ဖစီၩ့ လၧမုၪခီၩလဲး အၥၫ့လံဆံၫလီၫ. လၧအနံၩအၥၫ့နီၪ လအၪ့ဘၪဆၧနးမံၩ့တၭ, ထီးအထုၬဝ့ၫဒၪနီၪ ဆၧၥၭဝံအၥၭလီၫ. မုၪခီၩလဲးစံၭဝ့ၫ, နအ့ၪမွဲယွၩအဖိၪခွၫတၭ, ဘဲၫၥိၭလိးလဖျိၪ့ယီၩမိကဲၪထၪ့ကိၪတၭ, ချဲၩ့ထၪ့ဘီၪ. ယ့ၫၡုၬချဲၩ့ဆၧၫ့ဝ့ၫတၭ, စံၭဝ့ၫ,ဆၧကွ့ၭအၥၭ, ၦၡၩမၧၫ့ဝ့ၫန့ၫကိၪလမံၩ့ယီၩမွဲအ့ၬ. မွဲလၧကယဲယွၩအလူလမံၩ့လါလါနီၪလီၫ. မုၪခီၩလဲးၥိၫ့ထၪ့ဝ့ၫ လၧခိၪလီၩ့ထီၫလဖျိၪ့ အလီၩ့တၭ, လၧလဆိဖိၪအထးဖၧၩ့နီၪ, ဒုၭနဲၪဝ့ၫကယဲဘၩ့ၥံၪမုးၥံၪလၧဂၪ့ခိၪချိၫ့လီၫ. မုၪခီၩလဲးစံၭဝ့ၫ, ကယဲ ဆၧအစီၩ့အမၩ့ယီၩ, ဒဲအလၩအဖၩ့နီၪ ယမိဖ့ၪလၫ့နၧၩလီၫ. အဂဲးဘဲၫယီၩ ဆၧဖ့ၪလၫ့ယူၭလၧယစူၪဖၧၩ့တၭ, ထီးဒၪၦလၧဆၧမိဖ့ၪလၫ့ဘၪ ယၥၭလဂၩဂၩနီၪ, ယဖ့ၪလၫ့ယဝ့ၫဒၪလီၫ. မၩအၥၭဘဲၫနီၪတၭ, နအ့ၪဘိၪ့ထၪ့ဘၩထၪ့ယၧၩတၭ, ဆၧမိကဲၪထၪ့နဆၧထီးအလူၬလီၫ. ယ့ၫၡုၬချဲၩ့ဆၧၫ့အဝ့ၫတၭ, စံၭဝ့ၫဒၪ,ဆၧကွ့ၭအၥၭ, ယွၩနကဆါနီၪနဘၪဘိၪ့ထၪ့ဘၩထၪ့အဝ့ၫဆံၭ နမိဘၪ မၩန့ၫအဝ့ၫဒၪအဆၧလီၫ. အဝ့ၫဒၪလ့ၩၥိၫ့ထၪ့ဝ့ၫ လၧယရုစလံၫ့အဖၧၩ့တၭ, အီၪက့ၪထၪ့ဝ့ၫလၧ ဆၧလုအဂံၪ့အခိၪစီၪ့လီၫ. စံၭအဝ့ၫ,နအ့ၪမွဲယွၩအဖိၪခွၫနီၪ, ခွံၬလၩ့နၥၭဘီၪ. အဂဲးဘဲၫယီၩဆၧကွ့ၭအၥၭဆၧမိမၪလူၬအၥီၫ့လဖၪလၧန ဂဲး ဘဲၫ ၥိၭ အ မိ ယိ ထဲၩ့ ခွါ ထဲၩ့ နၧၩ တၭ,- အ ဝ့ၫ ၥံၪ မိ ဆိၬ ထၪ့ နၧၩ လၧ အ စူၪ လီၩ့ ဘဲၫ ၥိၭ န ခၪ့ ထီး ဘၪ ထံၭ လၧ လိး လ ဂ့ၩ လီၫ. ယ့ၫၡုၬချဲၩ့ဆၧၫ့ဆၧတၭ, စံၭအဝ့ၫ, ဆၧစံၭဝ့ၫ, ထီးကျဲၩ့ဖစီၩ့ယွၩနကဆါနီၪလဂ့ၩ, မုၪခီၩလဲး ကျဲၩ့ဖစီၩ့ဆၧထီးအလူၬဂီၩ့တၭ, စဲၪ့ဖၭလၧအဝ့ၫနီၪ လဆိလီၫ.