ၦဖိၪဎွ့ၪမုၪဖိၪ – ၁

လၧဖျိၩ့ဖျိၩ့အိၩ တဝၫ့ကတဝၫ့နီၪ ၦမုၪမဲၪဒဲ အဖိၪမုၪဖိၪအီၪဝ့ၫကဂၩနီၪလီၫႉ ဖိၪမုၪဖိၪယီၩ အဖါဖါၥၭဘီၩ့ၥံၫဒၪခီၫလၧ အဝ့ၫအဆံၭဆံၭဒံၭအိၩတၭ အမိမိလဂၩ ဘၪကဲၪအဝ့ၫ အမိအလးမွဲမွဲ အဖါအလးမွဲမွဲဆ့နီၪလီၫႉ အခံၫ့ယံၬထၪ့အခၫ ဖိၪမုၪယီၩ ဂဲၫမုၪနၩ့လၫ့တၭ ကနံၩနီၪ မိယီၩ ဘၪမၪလူၬ အဖိၪမုၪဆၧအီၪတၭ စံၭဝ့ၫ ဖိၪမုၪဧ့ႇ မိယီၩ ၡၪ့အကၠီၩ့ ဖိၪမုၪအဂး ကအီၪက့ၪထးအ့ၪ ခီၪ့အဲၩ့ အီၪနးမံၩ့အ့ၬႉ မိမိလအီၪလၧၩ့ဘၪအလးခဲၫ့ ကမိမၪလူၬထး ဖိၪမုၪနးမံၩ့နီၪလီၫႉ ဖိၪမုၪအဂး နံၪႇ ပလူၬႇ ၡၪ့ဒဲ ထိၪ့ၥံၪလဖၪ ဘဲၫနထၬထၪကန့အဂး ၦမုၪၥံၪလဖၪ ကြၨၭအီၪဝ့ၫဒၪ ဆၧပိၭဆၧလၫ့လဖၪနီၪ မိမိကအီၪက့ၪထးအ့ၪနၧၩနီၪလီၫႉ မိမိ လအီၪ လၧၩ့ဘၪကနံၩခိၬနီၪ လ့ၩအီၪလၧ နထၧၫ့မုထၧၫ့ခွၫၥံၪအီၪနီၪလီၫႉ ဖိၪမုၪ လ့ၩအီၪကၠၧၫ့ကၠၧၫ့လၧ အဝ့ၫၥံၪဂီၩ့ မၩဆၧၩ့အဝ့ၫၥံၪ ဆၧမၩ မိယီၩ မၪလူၬအဖိၪမုၪဘဲၫယီၩၥိၭဂီၩ့ အဝ့ၫၥံၫဝ့ၫဒၪနီၪလီၫႉ ဖိၪမုၪနးဆ့ ဘဲၫအမိမိၥၭဘီၩ့မၪလူၬထၪ့အၥိၭ လ့ၩအီၪလၧ အထၧၫ့ခွၫၥံၪ အီၪဂီၩ့ အဝ့ၫမၩဆၧၩ့ၦၡၩဆၧဖံၭဆၧမၩဒဲ အီၪအၪ့ၥ့ၪအကၠီၩ့ အထၧၫ့ခွၫၥံၪဆ့ အဲၪအဝ့ၫအၪမၬလီၫစွါဘဲၫႉ

ကနံၩနီၪတၭ အီၪဂဲၫလၧအယဲၩ့ ဖနံၬထးကၩဖိၪလဂၩ ဂဲၫထီၩ့လၧ ၦဖိၪဎွ့ၪမုၪဖိၪအီၪတဝၫ့နီၪလီၫႉ အခံၫ့ယံၬထၪ့အခၫ ဖနံၬထးကၩဖိၪယီၩ အဲၪတၩ့လိၬၥၭလၧ ၦဖိၪဎွ့ၪမုၪဖိၪယီၩနီၪလီၫႉ ၦဖိၪဎွ့ၪမုၪဖိၪဒဲ ဖနံၬထးကၩဖိၪအဲၪတၩ့လိၬၥၭနီၪ အထၧၫ့ခွၫၥံၪၥ့ၪယၫတၭ စံၭဝ့ၫ နမိမိလအီၪလၧၩ့ဘၪအလးခဲၫ့ မၪလူၬထၬနၧၩ ဂဲၫအီၪကၠၧၫ့ကၠၧၫ့လၧပၧၩ မွဲဆၧဘဲၫနီၪ ပအီၪကၠၭမုၬမုၬလၩလၩႇ အယီၩ နဖိၪၥၪခွၫနီၪ မွဲလၧဖနံၬထးကၩဖိၪ အဝ့ၫနီၪ မွဲအီၪလၧ ပတဝၫ့ယီၩဧၪအ့ၬ ကမွဲဒၪ ကကဲၪနးမံၩ့ အၪ့န့အဝ့ၫလဂ့ၩႇ ထၪ့ၡါလဂ့ၩ ပလီၩနၧၩအ့ၬ လါနၫ့ ဆၧလၧ ဆၧအီၪဎုၬနီၪ မွဲဆၧလၧ ပကဘၪအီၪဎုၬလိၬၥၭ လဆိၩယၫကမံၩ့လီၫႉ

မွဲဆၧဘဲၫနီၪ ဒ့ၩမုၪကထၪ့အီၪဎုၬၦခွၫနီၪ ဘၪထွ့ၫလၧ အဝ့ၫအဘူၭအထံၭလဖၪ အတခ့ၭဖဝၭဒဲ လၧအဘၪဎၬဆၧလဖၪ အ့ၪနၥ့ၪယၫနီၪ ကမငါနၭလီၫႉ ပၥ့ၪယၪမွဲ ပကအၪ့မၩအၪ့ဆၧအၥၪလီၫဂီၩ့ မနီၫလဲၪအထံၭလဲၪ လပၥ့ၪယၫဘၪနီၪ ပဘၪဒၪဎီၩ့ဆၧကၪဆၧဂဲၩ့ၥ့ၪနီၪလီၫႉ ၥံၪ့ထံၭယီၩအဂဲး အ့ၪပၥ့ၪယၫဂ့ၩဂ့ၩမၬ ပအၪ့မၩအၪ့အၥၪနီၪ မငါနၬလၥၨၩႉ ဘဲၫယီၩ ဒ့ၩမုၪၥ့ၪယၫအဝ့ၫအဂဲးခီၫနးမံၩ့ဧၪအ့ၬ လၧခဲၫ့ထုၬ ကဂဲၫကဲၪထၪ့ဘဲၫၥ့ၪလဲၪ ပၥ့ၪယၫအ့ၬႉ အၪ့န့လဂ့ၩ ပလီၩနၧၩအ့ၬ အ့ၪနအၪ့န့အဝ့ၫ ကထဲၩ့ကိၭန့နၧၩလၧ အဝ့ၫအတဝၫ့ နကဘၪအီၪယဲၩ့လၧပၧၩ မွဲဆၧဘဲၫနီၪ နကဘၪအီၪအၪ့ပၥ့ၪလဲၪ ပကၥ့ၪယၫအဂး ကကၪလီၫအကၠီၩ့ ၥီၪ့ၥၫ့ကၠၭဝ့ၫဒၪနီၪလီၫႉ လါနၫ့ ၦဖိၪဎွ့ၪမုၪဖိၪနးဆ့ မွဲလၧခိၭနၪဘၪ အထၧၫ့ခွၫၥံၪ အဆၧလူဆၧချဲၩ့ဂီၩ့ ကအီၪဎုၬလၧ ဖနံၬထးကၩဖိၪယီၩအဂး လ့ၩဖိၬဝ့ၫအခဲၫ့လၧ အတဝၫ့နီၪလီၫႉ