၆နွ့ၫလနွ့ၫမုအီၪပွံၩနံၩ

ဆၧၥီၪ့လိၪဘၪဆဲၫ့ဆၧမၪလူၬအဂဲး.
ဆၧမၪလူၬလဖၪမွဲဂ့ၩ, မီၪၥံၪမွဲဂ့ၩတၭ, ထီးဆီၫ့မီၪ့ လၧယဂဲၫမၩဂၭဂီၩ့နီၪuလဂ့ၩ ယလဂဲၫမၩဂၭဂီၩ့ ဘၪယဝ့ၫတၭ, မွဲယဂဲၫမၩလၧၫ့ထၪ့ဎွ့ၩထၪ့လခီၫလီၫ. အဂဲးဘဲၫယီၩ ယလီၩဘၪနၥံၪတီၩတီၩယီၩ, မူၭခိၪဒဲဂၪ့ခိၪလချႃၭဒံၩခွံၬဒံၩဖျိၭဒံၭဘၪတၭ, လံၬဆၧမၪလူၬအဖျိၪ့ဆံၭလဖျိၪ့မွဲဂ့ၩ, အနိၪ့ဖိၪလနိၪ့မွဲဂ့ၩ,လချႃၭလၧၫ့ထၪ့ဎွ့ၩထၪ့ဒံၭဘၪ ထီးအလူၬတၭ, မွဲအဂၭဂီၩ့ဝ့ၫအ့ၬ.
မၩအၥၭဘဲၫနီၪတၭ,ထီးဒၪၦလၧအလၨၪခၫ့ဖၬ ဆၧမၪလူၬ လၧအဆံၭထုၬ လၧအကျၩလထံၪနီၪ, ဒဲၥီၪ့လိၪၦၡၩဘဲၫနီၪအၥိၭလဂၩဂၩတၭ, မိဘၪဆၧကိၭဝ့ၫလၧအဆံၭထုၬ လၧမူၭခိၪအဘၩ့အမုးအဖၧၩ့လီၫ. အ့ၪမွဲထီးဒၪ ၦလၧအထီးန့ဝ့ၫဒဲၥီၪ့လိၪဝ့ၫလဂၩဂၩနီၪ, မိဘၪဆၧကိၭဝ့ၫလၧအဒိၪ လၧမူၭခိၪအဘၩ့အမုးအဖၧၩ့လီၫ. အဂဲးဘဲၫယီၩ ယလီၩဘၪနၥံၪယီၩ, နၥံၪအဆၧတီၩဆၧလီၩ့အ့ၪလအၪနဲၪ့ဘၪၦကွ့ၭလံၬ, ဒဲၦဖၫရစံၫၥံၪအဆၧတီၩဆၧလီၩ့တၭ, နၥံၪလ့ၩနုၬဘၪလၧမူၭခိၪအဘၩ့အမုးအဖၧၩ့အ့ၬ.

ဆၧၥီၪ့လိၪဘၪဆဲၫ့ဆၧၥၭထၪ့အဂဲး.
နၥံၪနါဂၧၫ့ယူၭလၧၦမွံၩၦၡါစံၭဝ့ၫဒၪ, ထီးမၩၥံၫၦၡၩလဂ့ၩး ထီးဒၪၦလၧအမၩၥံၫဝ့ၫလဂၩဂၩနီၪ ဂ့ၩဘၪဆၧစ့ၩရၫ့ခွးလီၫ.အ့ၪမွဲယဝ့ၫဒၪယီၩ, ယစံၭနၥံၪ ကယဲၦလၧအၥၭထၪ့အထၧၫ့ဖုဝဲပျီၩပျီၩလဂၩဂၩနီၪ, ဂ့ၩဘၪဆၧစ့ၩရၫ့ခွးကိၭအဂၩဒ့ၭလီၫ. ထီးဒၪၦလၧအစံၭ အထၧၫ့ဖုဝဲ, ရၫကၫၬလဂၩဂၩနီၪ,ကြၨၭ ဘၪဆၧလၧ ၦၥၭၡါအီၪကီၪ့တၭ ထီးဒၪၦလၧအစံၭအထၧၫ့ဖုဝဲၦအဂီၩ့ဧ့ လဂၩဂၩနီၪ ကြၨၭဘၪလရၬမ့ၪလီၫ.
မၩအၥၭဘဲၫနီၪတၭ, နအ့ၪလ့ၩဆိၬ နဆၧဘိၪ့လၧ ဆၧလုအလးတၭ, ထီးနီၪနအ့ၪနၪ့ထၪ့ထဲၩ့ လၧနထၧၫ့ဖုဝဲအီၪက့ၪဆၧမၪ လၧနလီၩ့လမံၩ့မံၩ့တၭ, အီၪက့ၪထီ နဆၧဘိၪ့ထီးနီၪလၧဆၧလုလးအမ့ၬယၫတၭ, ထဲၩ့ထဲၩ့ဆံၭ. မၩဘၪလိၬထဲၩ့ဆိၫဒၪခလူၬ နၥၭလၧနထၧၫ့ဖုဝဲနီၪတၭ, ထီးနီၪလဖၧၫ့ ဂဲၫမၩနဆၧဘိၪ့နီၪဆံၭ.နအီၪလၧဖၧၩ့ၥၭ လၧနဒုၪနဒၩအၥိၭအဘိၩ့ဘၭတၭ, မၩဘၪလိၬထဲၩ့နၥၭလၧအဝ့ၫဒၪအ့ၪချဲၫ့ဆံၭ. ဘၪလဘၪနဒုၪနဒၩ မိဖ့ၪလၫ့ဘၪခိၬနၧၩ လၧၦစ့ၩရၫ့ခွးအစူၪဖၧၩ့တၭ, ၦစ့ၩရၫ့ခွးနီၪမိဖ့ၪလၫ့ခွံၬနၧၩ လၧဆၧအခိၪအစူၪဖၧၩ့တၭ, နမိလၩ့ဘၪလၧထီၫ့ဖၧၩ့လီၫ. ယလီၩဘၪနၧၩတီၩတီၩယီၩ, နလချႃၭလိၭထူၬဒံၭဘၪ ထီးလၧအထုၬလဘံၪ့နီၪ, နဂၭဖျ့ၭထၪ့ဘၪအ့ၬ.

ဆၧၥီၪ့လိၪဘၪဆဲၫ့ဆၧမၩမၪမုၪမၩမၪခွၫ.
နၥံၪနါဂၧၫ့ယူၭလၧၦမွံၩၦၡါစံၭဝ့ၫဒၪ, ထီးအဲၪဘိၩ့မၫ အဲၪဘိၩ့ဝၩလဂ့ၩ. အ့ၪမွဲယဝ့ၫဒၪယီၩ ယစံၭနၥံၪ,ကယဲၦလၧအယိၦမုၪလၧအၥၭလဲးၥၭဘျၪ ကိၭဂၩဒ့ၭနီၪ,မွဲအမၩမၪယူၭဆၧလၧၦမုၪနီၪလၧအၥၭဖၧၩ့ယူၭလီၫ. နမ့ၬၥၪအထွ့ၪလခီၫအ့ၪမၩလၩ့ထံၩဖါနၧၩတၭ, အီၩ့ခွ့ၭထၪ့ခွံၬဝ့ၫတၭ, ခွံၬၡိၭခွံၬလၧနအီၪဆံၭ. အဂဲးဘဲၫယီၩ နဂၩ့လမံၩ့အ့ၪဂၭဂီၩ့တၭ,မွဲအဂ့ၩနဲၪ့ဒံၭ လၧနဘၪဆၧခွံၬလၩ့နၧၩ လၧလရၬဖၧၩ့ထၧၫ့ဂၩယၫနီၪဒံၭလီၫ. နစူၪထွ့ၪလခီၫအ့ၪမၩလၩ့ထံၩဖါနၧၩတၭ, ဒၪ့ထ့ၬခွံၬဝ့ၫတၭ, ခွံၬၡိၭခွံၭလၧနအီၪဆံၭ. အဂဲးဘဲၫယီၩ နဂၩ့လမံၩ့အ့ၪဂၭဂီၩ့တၭ, မွဲအဂ့ၩနဲၪ့ဒံၭ လၧနလၩ့ဘၪ လၧလရၬဖၧၩ့ထၧၫ့ဂၩယၫနီၪဒံၭလီၫ.
ဆၧၥီၪ့လိၪဘၪဆဲၫ့ဆၧထုၭလၩ့ၡၪအဂဲး.
(မၭ ၥ၉:၉, မၫ ၥဝ:ၥၥ-ၥ0, လု ၥ0:ၥ0)ၦစံၭဝ့ၫဒၪ,ထီးဒၪၦလၧအခွံၬၡိၭအမၫလဂၩဂၩနီၪ,မွဲအဖ့ၪလၫ့ဒၪဝ့ၫလၧလံၬလၩ့ၡၪလဘံၪ့ဆံၭ. အ့ၪမွဲယဝ့ၫဒၪယီၩ ယစံၭနၥံၪ, ထီးဒၪၦလၧအခွံၬၡိၭခွံၬ အမၫလၧအလမွဲဘၪလၧဆၧအဲၪဘိၩ့အကၠီၩ့ လဂၩဂၩနီၪ မွဲအအၪ့မၧၫ့အမၫအဲၪဘိၩ့ဆၧလီၫ. ၦလၧအအီၪဎုၬလၧ ၦမုၪလၧအဘၪ ဆၧခွံၬၡိၭခွံၬဝ့ၫလဂၩဂၩနီၪ, မွဲအမၩမၪၦမၫလီၫ.
ဆၧၥီၪ့လိၪဘၪဆဲၫ့ဆၧဆိၪလၩ့ၥၭအဂဲး.
မၩဒီၭလဖၧၫ့ နၥံၪနါဂၧၫ့ယူၭ လၧၦမွံၩၦၡါစံၭဝ့ၫဒၪ, ထီးဆိၪလၩ့နၥၭ လတီၩလလီၩ့ဘၪလဂ့ၩ. ဆၧလၧနဆိၪလၩ့နၥၭနီၪမၩတီၩတီၩလီၩ့လီၩ့ လၧကဆါအမ့ၬယၫနီၪဆံၭ. အ့ၪမွဲယဝ့ၫဒၪယီၩ, ယစံၭနၥံၪ,ထီးဆိၪဆၧစံၭဆၧလၩလါလဂ့ၩ. ထီးဆိၪလၩ့နၥၭ လၧမူၭခိၪအမ့ၬယၫလဂ့ၩ, အဂဲးဘဲၫယီၩမွဲယွၩအလးဆီၩ့ဆီလီၫ. ထီးဆိၪလၩ့နၥၭလၧဂၪ့ခိၪအမ့ၬယၫလဂ့ၩ, အဂဲးဘဲၫယီၩ မွဲအခၪ့ယဲးလၩ့အလးလီၫ. ထီးဆိၪလၩ့နၥၭလၧယရုစလံၫ့ အမ့ၬယၫလဂ့ၩ, အဂဲးဘဲၫယီၩ မွဲစဎွၩဖၭဒိၪအဒိၩ့လီၫ. ထီးဆိၪလၩ့နၥၭ လၧနခိၪဎွံၪအမ့ၬယၫလဂ့ၩ, အဂဲးဘဲၫယီၩ န့ၫခိၪၥူၫလဘီၩ့နီၪၥၧၫ့မွဲဂ့ၩ, ဘွၩမွဲဂ့ၩ ,နမၩၥ့ၪအ့ၬ. မွဲနၥံၪချဲၩ့ဆၧမွဲမွဲ, မွဲအ့ၬမွဲအ့ၬနီၪဆံၭ. ဆၧအၪနဲၪ့ဆၧ လဖၪနီၪဘၪဆဲၫ့လၧဆၧအၧၩ့လီၫ.