ၦဖျိၩ့မၫတုရၫပဒိၪမၩ့ၡၪလၩဖၩ့အဂဲးကဆံၭကခ့ၭ

ပဒိၪမၩ့ၡၪလၩဖၩ့နီၪ အီၪဖျဲၪဝ့ၫဒၪလၧ ၁၉၄၃နံၪ့ လၩ ဂၠူၫလဲၩ့ ၅ၥၫ့ ထံၫထၪကျိၩ့ခးဒီၪ့ မအူၪပ့ၫခးရ့ၫ ပၩ့တနီၫဝံးဒီၪ့ တီၩကၠီၩ့တဝၫ့ အဖါဖါၥၭဘီၩ့မၩ့ဘၭၥိၫ့ဒဲ အမိမိၥၭဘီၩ့ ဂါနးတ့ၫ့ နီၪလီၫႉ အထၧၫ့ဖုဝဲအီၪဝ့ၫနံၫဂၩအဖၧၩ့ အဝ့ၫနီၪမွဲ ဖိၪခွၫ နံၫဂၩလဂၩနီၪလီၫႉ အမံၩ့အၡါမၪနီၪ မွဲဝ့ၫ မၩ့ခၠ့ၭၡွ့ၫတၭ ဆၧပိၩ့ထၪ့အမံၩ့နီၪမွဲဝ့ၫ မၩ့ၡၪလၩဖၩ့နီၪလီၫႉ တၩ့ဖုၪ့ဒဲ တၩ့ကျၩဆၧမၩလိၪဖျီၪ့ဝ့ၫလၧ ပၩ့တနီၫဝံးဒီၪ့ တီၩကၠီၩ့ ယ့ၫတဲၭကိၩ့ ဆၧမၩလိၪလး ဒဲတၩ့ထီၫ့ဆၧမၩလိၪနီၪ ဆုးလ့ၩမၩလိၪဝ့ၫလၧ ဝံးတခိၩ့ဂီၩ့ ဆံၫဖုၫဖျီၪ့ဝ့ၫလၧ ၁၉၅၉နံၪ့ နီၪလီၫႉ ဆံၫဖုၫဖျီၪ့ဂီၩ့ ထၪ့ဘျၪ့ကိၪ့ဒိၪလၧ ဝံးတခိၩ့အထီ ဆဲဘ့ၩ ဂၠူၫလဲၩ့အယ့ၩအခ့ၩနီၪ အဝ့ၫမွဲပၫဆ့နီၪလီၫႉ

            ၁၉၆၆နံၪ့နီၪ န့ဘၪဆၧနဲၪ့လၩဖၩ့လၧ ဖးဖီၩ့မ့ၫဂၠၫ နီၪလီၫႉ ၁၉၆၃နံၪ့နီၪ ဆုးကျိၭအၥၭလၧ ခ့ၫအၫ့ယူၫ ၦဖျိၩ့ဆၨၩခရၧၫ့ဂီၩ့ ထီးထီၩ့ ၁၉၆၆နံၪ့အထီ ဘၪအၪ့န့ထၪ့ ခ့ၫအၪ့ယူၫ ဖံၬဖၫ့လၬ ဆၧဂဲၩဝၭမူၩဒၩနီၪလီၫႉ ၁၉၆၇နံၪ့နီၪ လ့ၩထီၩ့လၧ ပခိၩခိၪလီၩ့ ၦဖျိၩ့ဆၨၩဆၧပိၩ့ထၪ့လးကျဲၩ့ဂီၩ့ ခ့ၫအၪ့ယူၫခရၧၫ့ ဖ့ၪလၫ့မူၩဒၩလဖၪနီၪ ဖီၪ့ထၪ့ဖံၭထၪ့ဝ့ၫနီၪလီၫႉ

            ၁၉၇၆နံၪ့နီၪ ထၪ့အီၪဎုၬဝ့ၫလၧ တီၩကၠီၩ နၫဂၭယိၩတဝၫ့ဖိၪ ၦဖျိၩ့ဆၧပိၩ့ထၪ့ၥုၭမုၪ နးၡွ့ၫကျ့ၫ လၧညီၫ့လ့ၩပ့ၫခးရ့ၫနီၪလီၫႉ အဖိၪအီၪဝ့ၫ လံဂၩနီၪလီၫႉ နံၪ့ ၂၀၀၀အဖၧၩ့ ဆၧမၩလၩမၩဖၩ့ၡီၩ့ထၪ့ ၁၂ဘျၩ့လဘျၩ့ ခ့ၫအၫ့ယူၫ ကိၩ့ကရဲၭဒဲ နံၪ့ ၂၀၀၄ အဖၧၩ့ ဆၧမၩလၩမၩဖၩ့ၡီၩ့ထၪ့ ခ့ၫအၫ့ယူၫ ကိၩကရဲၭဆၧထံၫလၩ့ဒီၪလၩ့အဖၧၩ့ ပဒိၪမၩၡၪလၩဖၩ့ယီၩ ဘၪထိးရွံထၪ့အၥၭလၧ ခ့ၫအၫ့ယူၫစ့ၭစ့ၭရဲၫ့ရဲၫ့နဲၪရွဲၪ ခိၪနါဒိၪအလးနီၪလီၫႉ အဝ့ၫအဲၪဒိၭ ကွ့ၭ ဖီလံၬအၪမၬဒဲ အဝ့ၫကွ့ၭထၪ့ထၬ လံၬပရၧၫ့ ထၩၥံၪလဖၪ အီၪဝ့ၫ အၪမၬဒ့ၭနီၪလီၫႉ

            လၧဆၧလၧယိလါဘၪအဖၧၩ့ နံၪ့ ၂၀၀၈နံၪ့ လၩဖ့ၫဖီၫဝၫရံၫ ၁၄ၥၫ့ လဂၫ ၄နၩရံၩ ၄၆မံနံၬအထီနီၪ အဝ့ၫ ဘၪအီၪက့ၪထးလၩ့ခွံၬ အဂံၪ့ဒီၪ့ဖိၪၥံၪလဖၪဒဲ ၦဖျိၩ့ဆၨၩဖိၪၥံၪထီးအလူၬ ဘၪထိးမၩၥံၫအၥၭလၧ ၥဲၫ့ထံၫခး ဝံးမဲဆီၭနီၪလီၫႉ