ပအဲၪလၩ့ထဲၩ့ပၥၭကၥ့ၪအဂး ပကဘၪမၩဝ့ၫ ဆၧအဂဲး(၅)ထံၪ
၁ႉ အီၪပထုၬခွံၬ ဆၧစံၭအၧၩ့လၩ့ၥၭနီၪလါဆံၭႉ ပကဲၪၦၡၩလဖၪယီၩ ၦၡၩအဆၧမၪနီၪ ပကွဲၪ ဖျါခွံၬန့ ယီၫယီၫလါနၫ့ ပၧၩဒၪပၧၩနီၪ ပစၧၩ့လၩ့ထၬပဆၧမၪၥ့ၪနီၪလီၫႉ
ဆၧနီၪအကၠီၩ့ ပကဘၪ မၩဝ့ၫဒၪ တၡါနီၪ အ့ၪမွဲပမၩဘၪမၪဆၧ ကမံၩ့မံၩ့ယူၭစွါဘဲၫ “အိၩယၧၩယီၩ ယအိၭထိၭဆၧနးမံၩ့အ့ၬ” ခီၫခီၫပကစံၭလၩ့ပၥၭဘယီၩနီၪ ပကဘၪစံၭထဲၩ့ “ဆၧဘၪမၪအယီၩနီၪ မွဲဒၪဆၧမၩလိၪကမံၩ့လီၫ နးကၠၪဒီၭကိ ယမၩကန့ နၭန့အယီၩဒံၭႉ” ပကဘၪစံၭလၩ့ပၥၭဘဲၫနီၪလီၫႉ
၂ႉ ကျ့ၭစၨၭစံၭ ၦဂူၫဂၩ ဟၨၫအၨၩ ဆၧချဲၩ့ယီၩလါဆံၭႉ
ပခဲၫ့ကံၭ ၦၡၩအၥၭလမုၬဘၪဂီၩ့ ပလမိမၩဘၪဆၧကမံၩ့မံၩ့နီၪ အ့ၪမွဲပဘၪမၩစွါဘဲၫ ပၥၭ ကဘၪထံၭဒၪပၧၩလီၫႉ ဆၧနီၪအကၠီၩ့ အ့ၪမွဲပၥၭလပၪဘၪမွဲဂ့ၩႇ ပကဘၪမၩဆၧၩ့အဝ့ၫၥံၪအဂး ပလချုၭဘၪမွဲဂ့ၩႇ ဟၨၫအၨၩဆၧချဲၩ့ယီၩ ပကဘၪစံၭဆၧၫ့ၦၡၩ ထၧၫ့အၥ့ၪနီၪလီၫႉ ပၥၭကမုၬအဂးနီၪ မွဲအရ့ၩဒိၪထုၬလီၫႉ
၃ႉ ဖ့ၪလၫ့လၩ့ပၥၭအခံၫ့လါဆံၭ
မုကနံၩအထးဖၧၩ့ အခံၫ့ကဖျါဖိၪနီၪ ယိထၪ့ခွ့ၩဒိၭနါလဂ့ၩႇ ချဲၩ့လၧၦဂူၫဂၩလဂ့ၩဂီၩ့ အီၪဒၪနၧၩကဂၩဎး နးဆိလါဆံၭႉ အခံၫ့နီၪ ပဖီလံၬမွဲဂ့ၩႇ ပခိၭနၪဆၧၥၭအွံၪမွဲဂ့ၩႇ လၧပဘၪပၥၭ ဆၧအၪ့ဆၧအီၪကမံၩ့မံၩ့နီၪ ပအၪ့အီၩဒၪပၧၩလၧ ကယုကစုၩအဖၧၩ့မွဲဂ့ၩ ဖ့ၪလၫ့လၩ့ပၥၭအခံၫ့ လါဆံၭႉ
၄ႉ ယိလၩ့ခွါလၩ့ထဲၩ့နၥၭဒဲ နနးခီၫ့မိၡါနီၪဆံၭႉ
ဆၧအဲၪဆၧကွံၩနီၪ ပဘၪဖ့ၪနဲၪလၧ ပဆၧမၩဒၪမ့ၬလီၫႉ ပယိလၩ့ခွါလၩ့ထဲၩ့ ပၥၭ ဒဲ ပနးခီၫ့ မိၡါနီၪ မွဲပအဲၪလၩ့ပၥၭ ကၠီၪ့ဖျီၩ့အဂ့ၩဒိၪထုၬကမံၩ့နီၪလီၫႉ
မံၫဘျဲၩဘျဲၩႉ အီၩထံၫအၪအၪႉ ၥိၭကီၩ့ဆံၫ့ဆံၫ့ဖျ့ၪဖျ့ၪႇ ယိလၩ့နၥၭလၧနွၩဖၧၩ့ဂီၩ့ “ကနံၩယီၩ နဖျီၪဎံၪလၩအၪမၬလ့ၬ” စံၭလၩ့နၥၭဘဲၫနီၪအၥိၭဆံၭႉ
၅ႉ လီၩ့ထိၪနၥၭလၧၦဂူၫဂၩလဂ့ၩ
လၧဆိၫၡဲၫမံၫဒံၫယၫအဖၫ့ခိၪ နလီၩ့ဒၪၦၡၩအဆၧလ့ၩထၪ့လ့ၩထီၫအဂ့ၩ ကကဲၩ့လီၫဂီၩ့ အ့ၪမွဲနကလီၩ့ထိၪလၩ့နၥၭ လၧအဝ့ၫၥံၪစွါဘဲၫ အီၪဒၪနၥၭကလၩ့လီၫႉ
အဝ့ၫၥံၪဆ့ မွဲအဝ့ၫၥံၪအဆၧကၪဆၧဂဲၩအီၪဆ့ဂီၩ့ နၧၩဆ့ လၧနအီၪနီၪ မွဲဆၧၥၭမၧၫ့ဖၧၩ့ၥၭ အဂ့ၩထုၬအီၪဆ့အဂဲး နၪ့ထၪ့ထဲၩ့လါဆံၭႉ ခီၫခီၫနကလီၩ့ယိထၪ့ ၦဂူၫဂၩအဆၧၥၭမၧၫ့နီၪ ယိလၩ့ဒၪ နဆၧလ့ၩထၪ့လ့ၩထီၫ အဆံၭခိၬဖိၪလဖၪနီၪလါဆံၭႉ
အကၧၩ့ဒိၪထုၬ ပကဘၪထီးန့ထၬကမံၩ့နီၪ အီၪလၧဂၪ့ခိၪချိၫ့ဖၧၩ့ ၦကိၭဂၩဒ့ၭအကျၩ ၦလၧ အကြၨၭန့ဘၪ ပဆၧအဲၪကွံၩဒဲ ပဆၧယိထဲၩ့ခွါထဲၩ့အဒိၪထုၬနီၪ မွဲဒၪ ပနၫ့ဆါဒၪပၧၩလီၫႉ
