ၦဖျိၩ့ဆၨၩမုနံၩ ဂဲၫကဲၪထၪ့အဂဲး

စၭထၪ့လၧ ဂၪ့ခိၪ ဆၧဒုၭၥုၭကဲၪထၪ့ နံၫဘျၩ့လဘျၩ့ဂီၩ့အထီနီၪ ၦဖျိၩ့ဖိၪလဖၪ ဘဲၫၦဖျိၩ့ဆၨၩခးဒီၪ့ကန့အဂး အၪ့ကံၩ့ဒုၭထၪ့ဝ့ၫနီၪလီၫႉ နံၪ့ ၁၉၄၈နံၪ့ လၩ ဖ့ၫဖီၫဝၫရံၫ ၃ၥၫ့နီၪ ဘဲၫဖဆပလ ပဒိၪလဖၪ ကဖ့ၪလၪ့ ၦဖျိၩ့ဆၨၩခးဒီၪ့အဂး ခ့ၫအၪ့ယူၫ ကွ့ၭထၪ့လံၬပရၧၫ့ အၪ့ကံၩ့ထၪ့ဝ့ၫဂီၩ့ ဖဆပလ ပဒိၪ ဆၧအီၪၥုၪ့အီၪက့ၪၥၭနီၪ အီၪက့ၪထၬဝ့ၫ လၧခဲၫ့ထုၬအခံၫ့ ထီးထီၩ့ လၩမၭ၃ၥၫ့တၭ ကမိၥ့ၪယၫဝ့ၫ ဆၧပရၧၫ့အကၠီၩ့ အၪ့ကံၩ့ထၬဝ့ၫနီၪလီၫႉ အ့ၪမွဲ ဖဆပလ ပဒိၪအီၪ လံၬပရၧၫ့လန့ဘၪ လမွဲဘၪ ကဖ့ၪလၫ့ ၦဖျိၩ့ဆၨၩခးဒီၪ့အဂး လထိးဆၧၫ့ဘၪဝ့ၫစွါဘဲၫ ၦဖျိၩ့ဆၨၩလဖၪ ကဘၪဆုးလ့ၩဝ့ၫဒၪလၧ အမ့ၬယၫကခၫအကၠီၩ့ ဖ့ၪလၫ့စိၩဝ့ၫ ဆၧထုၪ့ၥုၪ့ထုၪ့ၥၭနီၪလီၫႉ

            ဆၧအၪ့ကံၩ့ထၪ့ ၦဖျိၩ့ဆၨၩခးဒီၪ့ လံၬပရၧၫ့ယီၩ ဘဲၫကယိၬထၪ့အဂး လၩ ဖ့ၫဖီၫဝၫရံၫ ၁၁ ၥၫ့နီၪ ခးပယၩ့ ထၧၫ့ဘံၪ့ယၫ ၦဖျိၩ့ဆၨၩဖိၪၥံၪလဖၪ လ့ၩထၪ့ကၠၭလၧ ဝံးတခိၩ့ဂီၩ့ ပမိမၩ ၦဖျိၩ့ဆၨၩခးဒီၪ့အကၠီၩ့ နဲၪဖျီၪ့ထၪ့ၥုၪ့ၥၭနီၪ လီၫႉ ၦဖျိၩ့ဆၨၩဖိၪၥံၪနီၪ နဲၪဖျီၪ့ထၪ့ၥုၪ့ၥၭ နံၫၥၫ့ ထီးထီၩ့စိၩ ၥၧၫ့ၥၫ့နီၪလီၫႉ ၦဖျိၩ့ခမျၧးၥံၪ ပၫဝ့ၫဒၪ လံကုၬနီၪလီၫႉ

            ၁ႉ ဖ့ၪလၫ့ ဖျိၩ့ထံၫခးဘဲၫယီၩႉ ၂ႉ ဒုၭနဲၪ ဖျိၩ့ကဘၭ ပယၩ့ကဘၭ ဘဲၫယီၩႉ ၃ႉ ဆၨၩဆၬ ဆၧတုၩ့ထၪ့တုၩ့လၩ့ ပအဲၪဒိၭအ့ၬႉ ၄ႉ ထံၫခးဖၧၩ့ ဆၧဒူၭဆၧယၩ ပအဲၪဒိၭအ့ၬႉ ဆၧကိၭၡါထၪ့လဖၪယီၩ ဖးဖီၩ့အီၪထးဝ့ၫဒၪနီၪလီၫႉ