ထံၩလၧ ထံၫလအီၪဘၪ

အဎံၪနီၪ လၧနဲၩ့ဎီၩ့ဖၧၩ့အမံၩ့ဎိၩဝ့ၫဒၪ ၦမုၪၥၭအီၪဖိၪကဂၩနီၪလီၫႉ အဝ့ၫယီၩ အ့ၪမွဲအထံၩၥိၭ ၥံၪ အၥၭအုၭအီၪကမံၩ့မံၩ့စွါဘဲၫ ခိၭနၪအ့ၪဝ့ၫႇ အဆၧဖံၭဆၧမၩဖၧၩ့ အ့ၪမွဲၦၡၩဘၪဒၪ ဆၧကၪ ဆၧဂဲၩစွါဘဲၫ မၩဆၧၩ့အ့ၪဝ့ၫႇ လၧအဖိၪၥၪခွၫအဖၫ့ခိၪဆ့ ယိထဲၩ့ခွါထဲၩ့ဝ့ၫကိၭမံၩ့နီၪလီၫႉ လါနၫ့ လၧအဝ့ၫအၥၭဖၧၩ့နီၪ ကဲၪထၪ့ခိၭဆၧလအီၪဘၪနးမံၩ့ၥိၭလီၫႉ လၧၦဂူၫဂၩအဂး အဝ့ၫယီၩ ဖ့ၪဆၧၫ့လၩ့ၥၭအၪလၨၪအကၠီၩ့ အဝ့ၫယီၩ မံၫဘၪဘျဲၩအ့ၬႉ အၪ့ဘၪဘျဲၩအ့ၬႉ အဝ့ၫဘၪန့ အၥၭ ကၠူၭဆၧဂၩ့နီၪနးဆ့ အဝ့ၫယီၩ ကၠူၭဝ့ၫကဲၪလၫ့လၧၩ့ဧၪအ့ၬႉ ယံၭထၪ့ကဆံၭ အဝ့ၫယီၩ အၥၭဂဲၫဖုၫလၪ့ကဆံၭႉ ဂဲၫပွံၩလၪ့ကဆံၭႉ ဂီၩ့နီၪ “ယလီၩ့မၩအ့ၪထဲဎွ့ၩယီၩယူၭနီၪ ၦၡၩအဲၪယၧၩ နးဂၩအ့ၬ” အၪ့ဎၬထၪ့ဝ့ၫဘဲၫနီၪဂီၩ့ အၥၭအုၭဝ့ၫဒၪလီၫႉ ကနံၩတၭ အဝ့ၫယီၩ လ့ၩဂၬကွ့ၭစိၩလၧ အဖံၫအီၪဂီၩ့ ဂၪ့ကထံၪလီၫႉ “ဖံၫ ယအဲၪၦၡၩကိၭဂၩ ကမၩဆၧၩ့ၦၡၩကိၭဂၩလါနၫ့ ဘၪနီၪလၧယၥၭဘၪအုၭလဲၪဖံၫ” စံၭအဖံၫဘဲၫနီၪအခၫ အဖံၫနီၪ နံမွံၫထၪ့ဂီၩ့ ဖ့ၪနဲၪအ့ၪအဝ့ၫ ထံၩအပျီၩကဖျိၪ့နီၪလီၫႉ “စလံၩမုၪဧ့ ထံၩဖၧၩ့ယီၩ ထံၫအီၪဧၪႉ” “အီၪအ့ၬဘီၪဖံၫႉ” “အၨၫထံၩဖၧၩ့ယီၩ ထံၫအီၪအ့ၬဘိၭ ပဒုၪ့လၪ့အ့ၪၦၡၩထံၫန့ဧၫႉ” “ကန့ဧၪဖံၫႉ” အၨၫ ပကဲၪၦၡၩန့ဆ့ မီၪ့ဎီၩ့ဒီၪအယီၩလီၫႉ လၧပအီၪယီၩ ဆၧၥၭမုၬၥၭၡူၪ ဒဲ ပအဲၪလၩ့ပၥၭ အ့ၪအီၪမၬ ပလီၩ့ဖ့ၪလၫ့ထဲၩ့ၦဂူၫဂၩကန့မၬဆံၭႉ ပအီၪယီၩ အ့ၪမွဲလအီၪဂုထၬဘၪနီၪ ပလီၩ့ဖ့ၪလၫ့ အ့ၪၦၡၩကန့ဧၫႉ အယီၩ လၧနအီၪနီၪ ထံၫခီၫအီၪအ့ၬႉ နလီၩ့ဖ့ၪလၫ့ၦဂူၫဂၩဘိၭ နၧၩမွဲဆၧပွံၩဂီၩ့နၥၭ ၦၡၩဆ့ န့ဘၪဆၧနးမံၩ့ဧၪအ့ၬဘီၩႉ အဎံၪယီၩ နၪၥ့ၪထၪ့ဝ့ၫယူၭလီၫႉ အဝ့ၫထဲၩ့ထီၩ့လၧ အဂံၪ့ကကၠၪ အဆိၪထုၬ ဖိၭဘံၭထၬ အခွ့ၩဒိၭနါဂီၩ့ မံၫဝံၭနီၪလီၫႉ လဂီၩနၪခုၬအခံၫ့ အဝ့ၫယီၩ ဂဲထုၪ့အီၩကီၫဖံၫကခွၭဂီၩ့ ဖီၪ့ထၪ့ၦကၠူၭ ဆၧဂၩ့ ထီးဘီၩ့လဖၪဂီၩ့ ကၠူၭထဲၩ့ဆၧဂၩ့နီၪလီၫႉ မုနံၩမုၥၫ့အၪ့လဲၩ့ထၪ့ၥၭ ကဆံၭဘၪကဆံၭအခံၫ့ အဎံၫ အမ့ၬခွၩ့ဖၧၩ့နီၪ ဆၧမုၬဆၧလၩလဖၪ ဆၧဎံၫဖံၫ့လဖၪ ဂဲၫဖျီၪထၪ့ထဲၩ့ကဆံၭဘၪကဆံၭနီၪလီၫႉ အဝ့ၫယီၩ အ့ၪမွဲမၩဆၧၩ့ၦၡၩကကၠၪ ဘိၩအဂုအိၩအၥိၭ လအီၪက့ၪထၬလၧၩ့ဘၪဆၧယိလါနးမံၩ့နီၪ လီၫႉ အဝ့ၫအဆၧအဲၪဆၧကွံၩလဖၪနီၪ ဂဲၫဂုးခၧၫ့ထၪ့ ဒဲ အလူဒိၪအဎွ့ၩဒိၪ ဂဲၫအီၪထၪ့ထဲၩ့ကဆံၭ ဘၪကဆံၭနီၪလီၫႉ “ဆၧအဲၪလၩ့ၥၭနီၪ လမွဲဘၪ ပအဲၪလၩ့န့ၫပၥၭလီၫတၭ မွဲဒၪ ပအဲၪဆၧၫ့ထဲၩ့ၦဂူၫဂၩ ဒံၩ့ကန့ထၪ့ ထဲၩ့ဂ့ၩဂ့ၩဘၪဘၪအဂး ပၥုၪ့လၩ့ထၬဆၧအခၪ့ယဲးကမံၩ့နီၪလီၫႉ”