ခိဆၧၩ့ချံၪ့အၪ့လဲၩ့ထၪ့အၥၭအီၪပဒၩ့ထုၪ့လၩ့ၥၭ (၂)
လၧဂၪ့ခိၪချိၫ့ယီၩ ဆၧခိအဆီၪ့ထုၬ ဝံးစရၫ့ ၁၅ဝံးအဖၧၩ့ ခးပယၩ့ဖၧၩ့ ချောက်၊ မကွေး၊ မင်းဘူး၊ ညောင်ဦး ဝံးလဖၪ ပၫဝ့ၫအကၠီၩ့ ပၥ့ၪယၪဘၪလၧ ဆၧထူၭထၪ့ထၬအဖၧၩ့နီၪလီၫႉ လံၬမၩလိၪ ခိဆၧၩ့ချံၪ့ ဆၧၩ့ဂဲးကိၪ့ၥ့ၪဒိၪ (မိုးလေဝသနှင့် ဇလဗေဒ ညွှန်ကြားမှုဦးစီးဌာန) အဆၧထူၭထၪ့အဖၧၩ့ နံၪ့ ၂၀၂၄ ထီးထီၩ့လၩမ့ၫကျၩထီ ဆၧခိဆီၪ့အကၠီၩ့ လးကျဲၩ့လနၩ့နၩ့ ဆၧကၪဆၧဂဲၩ အီၪဝ့ၫ အၪမၬနီၪလီၫႉ လၧအၫဆံၫယၫ့လးကျဲၩ့အဖၧၩ့ နံၪ့ ၂၀၂၄ ထီးထီၩစိၩလၩမ့ၫနီၪ ဖူၫဆံၫဂူႇ ထံၩဎိၩလၩ့ႇ ၡၩ့လဲးဒဲ မ့ၪခိၪလီၩ့ဖီးဖၭ ကဲၪထၪ့ဝ့ၫဒၪ ၅၃၉ ဘျၩ့အကၠီၩ့ ပကဒၪဘၪ နဲၩ့ဎီၩ့ဆၧလၩ့အၪယိၪ ဂဲၫအၪထၪ့နီၪလီၫႉ
နဲၩ့ဎီၩ့ဆၧလၩ့အၪ့ယိၪအကၠီၪ့အဖျီၩ့လဖၪနီၪ အ့ၪပကယိထဲၩ့စွါဘဲၫ နံၪ့ ၂၀၂၃–၂၄ အထီနီၪ ပကဒၪဘၪနဲၩ့ဎီၩ့ ဆၧလၩ့အၪ့ယိၪ အၪထၪ့ဝ့ၫဒၪ တၡါလီၫႉ လၧပခးပယၩ့ဖၧၩ့ယီၩ နံၪ့ ၂၀၂၃ဒၪအိၩ ဘၪဒၪခီၩ့ဆၧၫ့ယၫ ဆဲၫ့ကလိၩ့လံၩမုလဖုၬ မိၫခၫဂီၩ့ ထီးဆၧဆၧၩ့ခၫခီၫအခၫ လံၩမုလဖုၬဆၧလၩ့အၪ့ယိၪနီၪ လဘၪဘၪပၧၩလါနၫ့ဂ့ၩ နဲၩ့ဎီၩ့အဆၧဘၪထဲးဘၪဎဲးအကၠီၩ့ ကဲၪထၪ့ၥ့ၪဝ့ၫဒၪနဲၩ့ဎီၩ့ဆၧလၩ့အၪ့ယိၪလဖၪနီၪ ပကဘၪထုၪ့ပၥၭနီၪလီၫႉ ဆၧလၧနဲၩ့ဎီၩ့ဆၧလၩ့အၪ့ယိၪနီၪ ကဲၪထၪ့ၥ့ၪဝ့ၫဒၪ ဆၧၫ့ထီကိၭထီဒ့ၭတၭ ဘဲၫပကဖီၩ့ခွံၬလၧ ဆၧလၩ့အၪ့ယိၪ ယီၩအကၠီၩ့နီၪ ပကဘၪအီၪလၧ ဆၧထုၪ့ၥုၪ့ထုၪ့ၥၭအဖၧၩ့နီၪလီၫႉ
မွဲဆၧဘဲၫနီၪ ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ပကဘၪဒၪဎီၩ့ဆၧၫ့ယၫ နဲၩ့ဎီၩ့ဆၧလၩ့အၪ့ယိၪအမံၩ့မံၩ့တၭ ကနံၩ အ့ၪပဘၪဒၪဎီၩ့ ဆၧၫ့ယၫအခၫ ဘဲၫဆၧဆိၫ့ခွံၬကအီၪထၪ့ အၡၩထုၬအဂး ဘၪထွ့ၫလၧ နဲၩ့ဎီၩ့ဆၧလၩ့အၪ့ယိၪ လ့ၩခိၪ လ့ၩနါဝ့ၫဒၪ ၦလၧအမူၩဒၩအီၪလဖၪ ခွံၬလၩ့ထၬဝ့ၫဒၪ ဆၧမၩမူၩဒၩလဖၪဒဲ ဘၪထွ့ၫလၧနဲၩ့ဎီၩ့ခရၧၫ့အဂူၫဂၩလဖၪ ပကဘၪ ဖီၪ့ထၪ့ဖံၭထၪ့ဎုၬကၠၧၫ့ကၠၧၫ့လၧ ဆၧယံၩဆၧၡီၩ့အဖၧၩ့နီၪလီၫႉ
ထၧၫ့ဖုဝဲမုၪခွၫၥံၪဧ့ႇ မွဲနၥံၪ ဖီၩ့ဖျ့ၭဒၪဝ့ၫလၧ နဲၩ့ဎီၩ့ဆၧလၩ့အၪ့ယိၪ ကိၭဂၩဒ့ၭလါဆံၭႉ
