စဎွၩအဖိၪခွၫၥၭဘီၩ့ဒဲနးဖျီၩၥၪ (၂)

စဎွၩအဖိၪခွၫလဂၩ ထဲၩ့အၪ့န့ကဆၫ့ဂီၩ့ ဂဲၫထဲၩ့ထီၩ့ထဲၩ့လၧၥံၪ့ခၪ့ထံၭအခၫ စီၪဘၪၥံၪ့ကလိၭမုၪနီၪ လၧနးဖျီၩၥၪတၭ အၪ့မၧၫ့ဝ့ၫထၪ့လၧ ကဆၫ့လီၩလီၫႉ ကထံၪဎး ကဆၫ့နီၪ ၥ့ၪယၫလၧ ၥံၪ့ကလိၭမုၪအကၠီၩ့ ဝ့ၫဝၬအခိၪဎွံၪလီၫႉ လၧခဲၫ့ ၥံၪ့ကလိၭမုၪနီၪၥ့ၪယၫတၭ ကျဲၩ့အဲၪ့လိၬကဆၫ့နီၪ နၥ့ၪယၫနကဆါအ့ၬဧၪ လါနၫ့ ကဆၫ့နီၪ မွဲထိးဆၧၫ့အ့ၬတၭ ၥံၪ့ကလိၭမုၪယီၩ ဘၪလ့ၩဂၭဖၭထီးထီၩ့နးဖၧၩ့နီၪလီၫႉ လၧခဲၫ့ ၥံၪ့ကလိၭမုၪနီၪ ထၪ့အီၪဎုၬလၧ စဎွၩဖိၪဂီၩ့ အၪ့ၦၡၩကိၭနံၩ လါနၫ့ ဆၧအဂဲးယီၩ မွဲစဎွၩလၥ့ၪယၫဘၪလီၫႉ စဎွၩယီၩ စီၪဝ့ၫမွဲ အမၫၥၭဘီၩ့ နးဖျီၩၥၪလီၫႉ နးဖျီၩၥၪလဂၩ ၥံၫဂီၩ့ ဂဲၫကဲၪထၪ့ထဲၩ့ ဆံၫဖိၬလၧ ကမၫကကမၫအနဲၩ့ထံၭလီၫႉ

လါနၫ့ ဆံၫဖိၬယီၩ ၦၡၩဖ့ၬအၪ့နးဂၩအ့ၬစွါဘဲၫႉ ၥံၪ့ကလိၭမုၪၡါနီၪ ဒၪဆံၫဖိၭနီၪ ကမိအၪ့ဝ့ၫ ဖ့ၬဝ့ၫဂီၩ့ ထဲၩ့န့အၪ့ဝ့ၫလၧ နီးဖၧၩ့လီၫႉ ဆံၫဖိၬနီၪ အၪ့ဝ့ၫအယၪဂီၩ့ အဖံၬနီၪ ခွံၬလၩ့ဝ့ၫလၧ မ့ၪဖၧၩ့ဖၧၩ့လီၫႉ ဆံၫဖိၭအကုၬလၩ့ထ့ၬထးနီၪ မွဲအဝ့ၫလၥ့ၪယၫဘၪလီၫႉ လၧခဲၫ့ ၦမုၪမဲၪလဂၩ လ့ၩအၪ့ကံၩ့အၪ့ဆၧလၧ နီးဖၧၩ့အထီ ဒၪဆံၫဖိၬအကုၬနီၪတၩ ထဲၩ့န့ဝ့ၫလၧအဂံၪ့လီၫႉ ၦမုၪမဲၪယီၩ လအီၪဘၪဂံၪ့အထီ ဆံၫဖိၭအကုၬနီၪ ကဲၪထၪ့ထဲၩ့နးဖျီၩ့ၥၪဂီၩ့ ဒုၪ့ထံၫႇ အၪ့ဖီၪ့မ့ၪ မၩအ့ၪၦမုၪမဲၪဂံၪ့အဆၧမၩနီၪလီၫႉ ၦမုၪမဲၪဂဲၫထဲၩ့ထီၩ့ဂံၪ့အခၫ မပၩမၩထၬအ့ၪဂံၪ့အဆၧမၩလဲၪ စီၪဝ့ၫဘၪအ့ၬတၭ လ့ၩလီၩ့အၪ့စၪ့အဂံၪ့နဲၩ့ထံၭၦၡၩၥံၪလဖၪ မွဲလမွဲဘၪနးဂၩနီၪလီၫႉ

ကနံၩနီၪတၭ လီၩဝ့ၫလၧကလ့ၩမၩဆၧမၩဂီၩ့ အီၪဂူၪအၥၭလၧ တရၫ့အလးခဲၫ့အခၫ နးဖျီၩ့ၥၪလဂၩ ဘဲၫကိနံၩနံၩအိၩအၥိၭ ဂဲၫစဲၪ့လၫ့လၧ ဆံၫဖိၬအကုၬလီၩ့နီၪဂီၩ့ မၩဂံၪ့အဆၧမၩနီၪလီၫႉ ၦမုၪမဲၪဝ့ၫ လၧနးဖျီၩ့ၥၪအၪ့ဖီၪ့မ့ၩအခံၫ့နီၪ ဆံၫဖိၬကုၬနီၪ ဎုလၫ့ခွံၬဝ့ၫလၧမ့ၪနီၪလီၫႉ ကထံၪဎးနးဖျိၩ့ၥၪနီၪ ၡၧးဖျးဂီၩ့ ဝိၩ ဖံၫ ႉႉႉ နဎုလၫ့ခွံၬဆံၫဖိၬဘိၭ ယကလ့ၩအီၪဒၪခလဲၪ အခၫ ဖံၫနီၪ စံၭဆၧၫ့ထဲၩ့ နဘၪလ့ၩအီၪ နးစီၪ့အ့ၬ အီၪလၧယၧၩ အခံၫ့ဘၪနထဲၩ့နုၬလၩ့အီၪလၧ ဆံၫဖိၬအကုၬဖၧၩ့ဘိၭ ဖံၫချဲၩ့အၥိၭအီၪနးဂၩအ့ၬႉ ကနံၩနီၪတၭ ၥံၪ့ကလိၭမုၪနီၪ ၥ့ၪယၫနးဖျီၩၥၪအီၪလၧ ၦမုၪမဲၪအဂံၪ့နီၪတၭ ကျဲၩ့မၩအီၪမုၬအၥၭအ့ၬဂီၩ့ အၪ့မၧၫ့အဝၩလ့ၩမၩၥံၫ နးဖျီၩၥၪနီၪလီၫႉ

ကထံၪဎး စဎွၩဆ့ အဲၪအမၫဘိၭ အၪ့မၧၫ့အဖျဲၪၥံၪ လ့ၩမၩၥံၫ နးဖျီၩၥၪနီၪလီၫႉ စဎွၩအဖျဲၪၥံၪလဖၪနးဆ့ လ့ၩလၧ နးဖျီၩ့ၥၪအီၪအလး ၦမုၪမဲၪအဂံၪ့နီၪဂီၩ့ စဎွၩအလူလၩ့ ကဘၪမၩၥံၫ နးဖျီၩ့ၥၪနီၪလီၫႉ ကထံၪဎး နးဖျီၩၥၪစံၭဆၧၫ့ထဲၩ့ အ့ၪမွဲနၥံၪကမိမၩၥံၫယၧၩနီၪ လ့ၩမၩၥံၫယၧၩလၧ ခိၪလီၩ့ဒၩ့ခိၪ ဆၫ့မံၩ့အီၩ့အိၫအလးနီၪလီၫႉ စဎွၩအဖျဲၥံၪနးဆ့ မၩဝ့ၫဘဲၫနးဖျီၩၥၪ မၪလူၬထၬအၥိၭနီၪလီၫႉ