လၩဇၫ့နွ့ၫရံၫ ၁၇၄ၥၫ့ ဆၧၥၭထိၬပရၧၫ့

ယ့ၫၡုၬကိၭန့စလံဝဲၫ. (မၭ ၉:၉-ၥ0, လု ၅:၂၇-၃၂) အဝ့ၫဒၪစဲၪ့ထၪ့ဒီၭ ထီၩ့လၧကွံၩအနဲၩ့ထံၭတၭ, ၦခမျၧးထီးအလူၬ ဂဲၫလၧအအီၪ မွဲအၥီၪ့ထဲၩ့ၥၫ့ထဲၩ့အဝ့ၫၥံၪလီၫ. အဝ့ၫဒၪစဲၪ့ထၪ့ဝ့ၫတၭ, ဒၪဘၪစအၫလဖံအၧၭအဖိၪခွၫစလံဝဲၫလဂၩ ဆၧၫ့နၩ့လၧ ၦအၪ့ကံၩ့အခီၫ့အလးတၭ, စံၭအဝ့ၫနီၪဖိၬယခဲၫ့ဆံၭ. အဝ့ၫဂဲထုၪ့တၭ, ဖိၬထၪ့အခဲၫ့လီၫ. ဆၧမၩအၥၭလၧယ့ၫၡုၬ ဆၧၫ့နၩ့ဒံၩ့ခံၫ့ လၧစပွဲထံၭလၧဂံၪ့ဖၧၩ့အဘိၩ့ဘၭတၭ, ၦအၪ့ကံၩ့အခီၫ့ ဒဲၦဆၧဒဲၩဘၭဖိၪအၪဂၩ ဆၧၫ့နၩ့ဒံၩ့ခံၫ့ဎုၬဆ့လၧယ့ၫၡုၬ, ဒဲလၧအထံၩအဖျဲၥံၪအၥိၭလီၫ. အဂဲးဘဲၫယီၩအီၪဝ့ၫအၪဂၩတၭ, ဖိၬထၪ့အခဲၫ့လီၫ. ၦကွ့ၭလံၬဒဲၦဖၫရစံၫၥံၪ ဒၪဘၪလၧအအၪ့ဎုၬဆၧလၧ ၦအၪ့ကံၩ့အခီၫ့, ဒဲလၧၦဆၧဒဲၩဘၭဖိၪလဖၪအၥိၭတၭ,စံၭအထံၩအဖျဲၥံၪ, မွဲဘၪနီၫလၧအဝ့ၫဒၪအၪ့ဎုၬဆၧ ဒဲ အီၩဎုၬဆၧလၧၦအၪ့ကံၩ့အခီၫ့ ဒဲၦဆၧဒဲၩဘၭဖိၪလဖၪအၥိၭလဲၪ.- ယ့ၫၡုၬနါဂၧၫ့ဝ့ၫတၭ, စံၭအဝ့ၫၥံၪ,ၦလၧအအီၪဆီၪ့အီၪချဲၫ့လဖၪ မၩၥံၪၥံၪ့ဎွံၫဆရၫအလးအီၪအ့ၬ. မၩဝ့ၫအလးအီၪန့ၫ ၦလၧအဆၫလဖၪလီၫ. ယဂဲၫကိၭထဲၩ့ ၦအတီၩအလီၩ့အ့ၬ. အ့ၪမွဲၦဆၧဒဲၩဘၭဖိၪ ဎလၧဆၧနီၫ့ယါလၩ့ထဲၩ့ၥၭအဂဲးလီၫ.