လၩဇၫ့နွ့ၫရံၫ ၁၆ၥၫ့ ဆၧၥၭထိၬပရၧၫ့

ယ့ၫၡုၬမၩဘျၪထဲၩ့ၦၥံၫလခီၫဖၩလဂၩ. မုနံၩလနၩ့နၩ့ဖီၩ့ခွံၬဝ့ၫနီၪ ယ့ၫၡုၬလ့ၩနုၬဒီၭလၧကပၧနအၫ့အဖၧၩ့တၭ, ၦနါဂၧၫ့ဘၪ လၧအအီၪလၧဂံၪ့ဖၧၩ့လီၫ. ၦအၪဂၩဂဲၫအီၪကိၩ့အီၪကီၪ့ဝ့ၫချဲၫ့မၬ ထီးအလးလအီၪလၧၩ့ဘၪလၧ တရၫ့ထံၭဒၪလ့ၬနီၪ အီၪဝ့ၫဆ့အ့ၬ. အဝ့ၫဒၪလီၩလၩ့လၬလၩ့ ဆၧအလူအထၫလၧ အဝ့ၫၥံၪလီၫ. ၦလဖၪဂဲၫလၧအအီၪတၭ, ၦလံဂၩဂဲၫယိၭ ၦၥံၫလခီၫဖၩလဂၩနီၪ,- လၧၦခမျၧးအကၠီၩ့တၭ, လ့ၩဆိၬစိၩဝ့ၫလၧအဂၩ့ထံၭလၥ့ၪဘၪ အဝ့ၫၥံၪမၩဖိးဆၧလၧ အအီၪဝ့ၫအလးအဖၫ့ခိၪနီၪမၩခွံၬဝ့ၫတၭ, ဆဲၩလၩ့လးမံၫလၧၦၥံၫလခီၫဖၩလဂၩနီၪ မံၫနၩ့လၧအဖၧၩ့လီၫ.- ထီးယ့ၫၡုၬဒၪဘၪ အဝ့ၫၥံၪအဆၧနဲၩတၭ, စံၭၦၥံၫလခီၫဖၩနီၪ ဖိၪခွၫဧ့, နဆၧဒဲၩဘၭဖျါယူၭ. ၦကွ့ၭလံၬလနၩ့နၩ့ဆၧၫ့နၩ့ထီးနီၪတၭ, ဆီၫ့မီၪ့ဆၧလၧအၥၭဖၧၩ့,- အယီၩလဂၩ ချဲၩ့မၪယွၩဘဲၫယီၩ မွဲဘၪလဲၪ.အ့ၪလမွဲဘၪ ယွၩလဂၩဎးနီၪ မွဲပလၫကွဲၪဖျါ ဆၧဒဲၩဘၭၥ့ၪလဂၩလဲၪ.- ယ့ၫၡုၬၥ့ၪယၫဆၧလၧအၥၭဖၧၩ့ချဲၫ့မၬလၧၦလဖၪနီၪဆီၫ့မီၪ့ဆၧလၧအၥၭခံဖၧၩ့ဘဲၫနီၪတၭ, စံၭအဝ့ၫၥံၪ, မွဲဘၪနီၫနၥံၪဆီၫ့မီၪ့ဆၧလဖၪနီၪ လၧနၥံၪအၥၭခံဖၧၩ့လဲၪ.- မွဲအယီၫထံၪထံၪလဲၪ, ၦစံၭၦၥံၫလခီၫဖၩ, နဆၧဒဲၩဘၭဖျါယူၭနီၪ မွဲအယီၫလဆံၭဧၪ, ၦစံၭဂဲထုၪ့ဆိၬထၪ့ နလးမံၫတၭ, စဲၪ့ထၪ့ဆံၭနီၪ,မွဲအယီၫလဆံၭဧၪ,- မွဲလါနၫ့ဘိၩဘဲၫၥိၭနၥံၪ မိၥ့ၪယၫလၧၦၡၩအဖိၪခွၫလဂၩယီၩ အီၪလၧအစီၩ့အမၩ့လၧ အကွဲၪဖျါဆၧဒဲၩဘၭၥ့ၪဝ့ၫတၭ, (စံၭၦၥံၫလခီၫဖၩလဂၩနီၪ,)- ယစံၭနၧၩ, ဂဲထုၪ့တၭ, ဆိၬထၪ့နလးမံၫ,ထဲၩ့ထဲၩ့လၧနဂံၪ့ဆံၭ. အဝ့ၫနီၪဂဲထုၪ့ဝ့ၫချဲၫ့ မၬတၭ,ဆိၬထၪ့အလးမံၫ, စဲၪ့ထၪ့ဝ့ၫလၧၦထီးအလူၬ အမ့ၬယၫ,ထီးၦၡၩထီၫမံၫထီၫမၪ ထီးအလူၬတၭ,စံၭ ထၪ့အၪ့အူၭယွၩ, စံၭဝ့ၫဒၪ, ဆၧဘဲၫယီၩၦဒၪဘၪ နးဆိၭအ့ၬ.