လၩဇၫ့နွ့ၫရံၫ၁၂ၥၫ့ ဆၧၥၭထိၬပရၧၫ့

ယ့ၫၡုၬကိၭန့ၦမၩယၪလံဂၩ.

စယီဟၫ့ဘၪဆၧဖ့ၪလၫ့ခွံၬဝ့ၫအလးခဲၫ့နီၪ, ယ့ၫၡုၬဂဲၫလၧဂၫလလံၫအဖၧၩ့တၭ, လီၩလၩ့လၬလၩ့ယွၩအဘၩ့အမုးအဆၧၥၭထိၬ အပရၧၫ့စံၭဝ့ၫဒၪ,အဆၧၫ့အထီ ဎွ့ၩထၪ့ယူၭတၭ, ယွၩအဘၩ့အမုးနီၪ ဘူၭထၪ့ယူၭ, နီၫ့ယါလၩ့ထဲၩ့နၥံၪအၥၭဒဲနဲၩထဲၩ့ဆၧၥၭထိၬအပရၧၫ့နီၪဆံၭ. အဝ့ၫဒၪစဲၪ့ဝ့ၫလၧကွံၩဂၫလလံၫအနဲၩ့ထံၭ အဘိၩ့ဘၭနီၪ, ဒၪဘၪဝ့ၫလၧၦထၧၫ့ဖုဝဲနံၫဂၩစစဲမၧၫ့ဒဲ စအၫ့ဒူၫခွံၬၡၬလၧကွံၩဖၧၩ့လီၫ. အဂဲးဘဲၫယီၩ မွဲၦမၩယၪလီၫ. ယ့ၫၡုၬစံၭအဝ့ၫၥံၪ ဖိၬယခဲၫ့ဆံၭ. ယမိဒုၭကဲၪထၪ့နၥံၪ ၦခွံၬၡၬလၧအန့ၦၡၩလီၫ. အဝ့ၫၥံၪ စဲၪ့ဒၪခွံၬအၡၬချဲၫ့မၬတၭ, ဖိၬထၪ့အခဲၫ့လီၫ. အဝ့ၫဒၪလ့ၩဖီၩ့ခွံၬ ထီးနီၪလဆံၭတၭ, ဒၪဘၪဝ့ၫလၧစဇ့ၭဘဒံၫအဖိၪခွၫစယ့မံၭ, ဒဲအထၧၫ့ဖုဝဲစယီဟၫ့လဖၪ ဆၭထဲၩ့အၡၬလၧချံၫဖၧၩ့လီၫ. မွဲအကိၭန့အဝ့ၫ ၥံၪချဲၫ့မၬတၭ, အဝ့ၫၥံၪစဲၪ့ဒၪခွံၬအဖါ စဇ့ၭဘဒံၫဒဲၦ လၧအအၪ့လံၩ့ဝ့ၫလဖၪလၧအအီၪထး လၧချံၫဖၧၩ့နီၪ, ဖိၬထၪ့အခဲၫ့လီၫ.