2025ယူၩဘလံၫအနံၪ့ ဖိၭဘံၭထဲၩ့အဂဲး

၂၀၂၅နံၪ့ယီၩနီၪ မွဲလၧယူၩဘလံၫအနံၪ့အကၠီၩ့ ထၧၫ့နံၪ့ယၫအဖၧၩ့ ခးပယၩ့မိကၭၥလံၬဆၧအီၪကီၪ့ထၧၫ့ဘံၪ့ယၫနီၪ မွဲၦၡၩဂဲၫထဲၩ့မၩလၩမၩဖၩ့ထဲၩ့ ယူၩဘလံၫလဖၪနီၪလီၫႉ ဘဲၫယီၩနီၪ နံၪ့လူၬခွံၬဝ့ၫယူၭအကၠီၩ့ ၦၡၩအီၪပထုၬခွံၬထဲၩ့ ယူၩဘလံၫအနံၪ့ယီၩ လၧလၩဇၫ့နွ့ၫရံၫ ၄ၥၫ့အိၩနီၪလီၫႉ ၦၡၩအီၪပထုၬခွံၬထဲၩ့ ယူၩဘလံၫအလးနီၪ မွဲဝံးတခိၩ့ စံၫ့မ့ၫရံၫကၥံၫဒြဲၫၥရိၬလးဖၧၩ့နီၪလီၫႉ ၦအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ကၫဒံၫနဲၫ ခၠၩစဘိၫဂီၩ့ ၥၫ့ခိၪဒိၪၥံၪလဖၪ ၥၫ့မုၥၫ့ခၫလဖၪ ဂဲၫထၪ့မၩလၩမၩဖၩ့ဝ့ၫဒၪအၪမၬလ့ၬဆ့လီၫႉ အဝ့ၫၥံၪယီၩ ဆိၪဖၪလၩ့ဎိၭကၠၭ ယူၩဘလံၫတရၫ့ ဘၪဆၧဖိၭဘံၭထဲၩ့ ဆၧဘၩဆိၪဖၪနီၪလီၫႉ

ဝံးမၫ့တၨၭဆၧအီၪကီၪ့ ၥၫ့ခိၪဒိၪ Bp.မာကုတင်ဝင်း လီၩလၩ့လၬလၩ့ဝ့ၫဒၪ “ယူၩဘလံၫအတရၫ့နီၪ ဖိၭဘံၭထဲၩ့ယူၭႉ ပဝ့ၫၥံၪလဖၪယီၩ လၧၦဂူၫဂၩအဂးႇ ၦဘၪကၪဘၪဂဲၩလဖၪအဂး ပဝဲထၪ့ထၬပၥၭယူၭဧၪႉ ပဂံၪ့ဒီၪ့ဖိၪၥံၪကဂၩဘၪကဂၩ ပကဖျါခွံၬထဲၩ့လိၬၥၭအဂး ပဝဲထၪ့ထၬပၥၭအတရၫ့မန့ယူၭဧၪႉ ၦၡၩကိၭဂၩဒ့ၭ အီၪဝ့ၫဒၪ ယံၩယံၩၡီၩ့ၡီၩ့ဂီၩ့ အဲၪကွံၩလိၬၥၭ ယူၭယၪ့လိၭၥၭအလးဖၧၩ့နီၪ ဆၧယိလါယီၩ အီၪမၧၫ့ဝ့ၫဒၪလီၫႉ ပဆၧယိလါလဖၪနီၪ ထီးၦၡၩဂဲၫအၪ့ဂူၪဘၪနးဂၩလဂ့ၩႉ ပကဘၪ ဆုးလ့ၩဆိၭန့ထဲၩ့ ကဆါယ့ၫၡူၬအမၧၫ့လၧပဂးနီၪအဂဲး ၥၫ့ဎွၩဒိၪ လ့ၫအိၫ၁၄ဂၩ လဂၩဆ့ ၥီၪ့ၥၫ့ထၬပၧၩအီၪနီၪလီၫႉ ဘဲၫစဎွၩ၃ဂၩ လ့ၩဆိၬန့အ့ၪဖိၪၥၪယ့ၫၡူၬ လၭဆီၪ့လဖၪအၥိၭ ပဝ့ၫၥံၪလဖၪဆ့ မုဆၫကနံၩယီၩ လိၪဝ့ၫဒၪအကၧၩ့ဒိၪထုၬ ဆၧဎူၫဆၧဎၩ့နီၪ ဂၪ့ခိၪချိၫ့ယီၩအဂး ပကလ့ၩဆိၬန့အ့ၪလါဆံၭႉ ပၥၫ့ဎွၩဒဲ ပၥၫ့ခိၪဒိၪၥံၪကိၭဂၩဒ့ၭ ပအဲၪဒိၭစံၭဘၪ ၦလၧအဖီၪ့ထၬစူၪဝဲၩ့ၥံၪထီးလူၬ မွဲဆၧဎူၫဆၧဎၩ့အီၪဒၪဝ့ၫလၧ နၥံၪအၥိၭဆံၭႉ ဆၧဎူၫဆၧဎၩ့နီၪမိအီၪလၧနၥံၪကၠၧၫ့ကၠၧၫ့လီၫႉ ဆၧမၩဆီၪ့မၩနီၩ့ကိၭမံၩ့နီၪ ဆၧဎူၫဆၧဎၩ့ယီၩ ဆၫ့ကျဲၭဝ့ၫဒၪလီၫႉ တခၩၦၡၩကမၩဆီၪ့မၩနီၩ့ဆၧနးဂၩ ဆၧဎူၫဆၧဎၩ့ယီၩ မၩအီၪပထုၬခွံၬဝ့ၫန့နီၪလီၫႉ ကနံၩယီၩ ပဖိၭဘံၭထဲၩ့ ယူၩဘလံၫတရၫ့လါနၫ့ ဆၧယိလါအတရၫ့နီၪဘိၭ ၦၡၩဂဲၫဖိၭဘံၭထဲၩ့ မွဲလန့ဘၪနးဂၩနီၪလီၫႉ ဆၧနီၪအကၠီၩ့ ပဝ့ၫၥံၪကိၭဂၩဒ့ၭ ဘဲၫပကကဲၪထၪ့ ၦအမၩကဲၪထၪ့ ဆၧဎူၫဆၧဎၩ့လဖၪအဂး ပကဆုးထဲၩ့ဂၭဖၬကၠၭလါဆံၭႉ” Msgr.အန်ဒရီးယာ့ ဖရန်းတေ ဆုးထဲၩ့စံၭဝ့ၫနီၪ ဆၧလၧယူၩဘလံၫနီၪ မွဲပကဘၪစံၭခိးစံၭတၩထဲၩ့ဆၧဒဲ ပကဘၪစၭထၪ့ထဲၩ့အၥၫ့နီၪလီၫႉ ဂဲၫအၪ့ထၩ ဆၧယိလါ မွဲဝ့ၫဒၪ ဆၧဒုၭဆၧခၭလဖၪဒဲ ဆၧလတီၩလဘၪဘၪလဖၪ ကၥုၭထဲၩ့အလးခဲၫ့အဂး ကဆါဎြံၬနီၪ ပဆူနဲၩဖိၪၥံၪလဖၪအဂး မွဲတရၫ့လၧအဝဲထၪ့ထၬအၥၭ လဆိၩၡၩနီၪလီၫႉ ဆၧဎူၫဆၧဎၩ့ကအီၪထၪ့အဂးဆ့ အၪ့ကံၩ့ဘၩဆိၪဖၪလါဆံၭႉ”