ထွံၪမိဎွါၥၧၫ့ဘံၩဒဲ ဖိၪမုၪနွ့ၫဂၩ – ၂ 

လၧခဲၫ့ လယံၬလမီဘၪအထီ စဎွၩဖိၪယီၩ ဂဲၫထီၩ့ထဲၩ့လၧ ထွံၪမိဎွါၥၧၫ့ဘံၩဒဲ အဖိၪမုၪဒၪဘၨၩအီၪနီၪလီၫႉ စဎွၩဖိၪယီၩ အဲၪတၩ့ဘၪ နးဒၪဘၨၩယီၩအကၠီၩ့ အၪ့ကံၩ့အဲၪဝ့ၫ ထဲၩ့ကိၭန့ဝ့ၫလၧ အနီးဖၧၩ့လီၫႉ လၧခဲၫ့ ဖိၪမုၪဒၪဘၨၩယီၩ စံၭစဎွၩဖိၪနီၪ ယၧၩယမိနီၪ မွဲၦၡၩအ့ၬ မွဲဒၪထွံၪကဒုၩအကၠီၩ့ အ့ၪမွဲ နအဲၪယၧၩ ယမိမိမွဲ နကဘၪအဲၪဆ့လီၫႉ အ့ၪမွဲ ယမိမိလ့ၩဖိၬယခဲၫ့န့စွါဘဲၫ ယကလ့ၩဖိၬနခဲၫ့လီၫ အခၫ စဎွၩဖိၪစံၭဆၧၫ့ထဲၩ့ ယကအဲၪနမိမိ ဘဲၫနအဲၪအဝ့ၫအၥိၭနီၪလီၫႉ ထီးနီၪ ဖိၪမုၪဒၪဘၨၩဒဲ အမိမိလ့ၩဖိၬ စဎွၩဖိၪအခဲၫ့လၧ အနီးဖၧၩ့နီၪလီၫႉ စဎွၩဖိၪယီၩ ထဲၩ့ထီၩ့လၧ နီးဖၧၩ့ကထုၪ့ဎး ထၪ့အီၪဎုၬလၧ နးဒၪဘၨၩ လၧဆၧထံၫလၩ့ဒီၪလၩ့ ဎိၩဒိၪအဖၧၩ့နီၪလီၫႉ ကကၠၪယီၩနီၪ နးဒၪဘၨၩဒဲ အမိမိ အီၪဘၪလၧနီးဖၧၩ့ ဂ့ၩဂ့ၩဘၪဘၪနီၪလီၫႉ

နးဒၪဘၨၩလဂၩ အဝ့ၫအီၪအၪ့ဘၪလၧနီးဖၧၩ့ဂ့ၩဂ့ၩဘၪဘၪနးဆ့ နၪ့ထၪ့စိၩဘၪအဝဲမုၪၥံၪ ကိၭကၠၪဒ့ၭနီၪလီၫႉ အမိမိ ထွံၪမိဎွါနးဆ့ အဖိၪမုၪၥံၪနၪ့စဲၪ့ထၪ့အဝ့ၫလါနၫ့ နၪ့ထၪ့အဖိၪမုၪၥံၪကိၭကၠၪဒ့ၭ ကမိဒၪဝ့ၫလါနၫ့ ဖိၪမုၪၥံၪယီၩ အ့ၪမွဲဒၪအမိ လီၩ့ထးစဲၪ့ဖျိၬဝ့ၫဘိၭ အမိမိ ထွံၪမိဎွါယီၩ ဘၪစဲၪ့ဝ့ၫဒၪ ကိၭကၠၪဒ့ၭနီၪလီၫႉ ကနံၩနီၪတၭ ထွံၪမိဎွါယီၩ လ့ၩလီၩ့ဎွါအၪ့အဆၪလၧ ၡိၬကျၩအထီ ဒၪဂုကဘီၩ့တၭ အဲၪ့ၥံၫဝ့ၫဂီၩ့ ဂဲၫထဲၩ့န့အ့ၪအဖိၪမုၪဒၪဘၨၩ အၪ့မၧၫ့ဝ့ၫဖ့ၬထ့ၬ (၇) ကုၬဂီၩ့ အၪ့ဎွံၪလၫ့ ထီးဆၧဖၩ့ထၪ့ ဖိၪမုၪကဒၪဘၪဆၧဂဲၫကဲၪထၪ့ကမံၩ့မံၩ့နီၪလီၫႉ

ဖိၪမုၪဒၪဘၨၩယီၩ မၩဝ့ၫဘဲၫအမိမိ အၪ့မၧၫ့ထၬအၥိၭတၭ ဆၧဖၩ့ထၪ့အခၫ ဖိၪမုၪယီၩ ဒၪဘၪ ထီၪ့အထံၭဂဲၫကဲၪထၪ့ (၇) ထံၭနီၪလီၫႉ လၧခဲၫ ဝဲမုၪၥံၪလဖၪနီၪ ၥ့ၪယၫဝ့ၫ အဖုမုၪအီၪလၧ နီးဖၧၩ့အကၠီၩ့ ထီၪ့အထံၭၥံၪလဖၪနီၪ လ့ၩအၪ့န့ကၠၭဝ့ၫကဂၩကထံၭဂီၩ့ ဂဲၫထဲၩ့အီၪက့ၪထၬထဲၩ့ဝ့ၫလၧ အဂံၪ့နီၪလီၫႉ လါနၫ့ ဆၧဖၩ့ထၪ့အခၫ ထီၫ့အထံၭၥံၪလဖၪယီၩ ဂဲၫထဲၩ့ထီၩ့ထဲၩ့လၧ အဖုမုၪအနီးဖၧၩ့ နီၪလီၫႉ မွဲဆၧဘဲၫနီၪ ဝဲမုၪၥံၪလဖၪယီၩ လၥ့ၪယၫဘၪအမိအခိးအတၩအကၠီၩ့ ထီၫ့အထံၭၥံၪယီၩ မွဲလကြၨၭဘၪ အဝ့ၫၥံၪအကၠီၩ့ ၥ့ၪယၫထဲၩ့ဝ့ၫနီၪလီၫႉ လၧခဲၫ့ထုၬ ဝဲမုၪၥံၪလဖၪယီၩ နၪၥ့ၪထဲၩ့ဝ့ၫလၧ ထီၫ့အထံၭလဖၪယီၩ မွဲကြၨၭဒၪလၧ အဖုမုၪဒၪဘၨၩ ယိထွ့ၫအမိမိကဂၩလီၫနီၪလီၫႉ

ထၧၫ့ဖုဝဲမုၪခွၫၥံၪဧ့ ယအဲၪဒိၭလီၩအ့ၪဘၪနၥံၪၡါဖိၪယီၩနီၪ မွဲဒၪထီးယီၩလီၫနဲၪႉ မွဲနၥံၪကကဲၪထၪ့ ၦလၧၥ့ၪယၫ မိဖါအခိးတၩကိၭဂၩဒ့ၭလါဆံၭႉ