ကၫဒံၫနဲၫ ချားလ်စ်ဘို တရါလၩ့ဎြံၬအီၪဖျဲၪအဂဲး

အဲၪကွံၩဘၪ ထံၫခးခိၪနါဒဲ ၦမၩထံၫခးဆၧမၩဖိၪၥံၪႇ ၥၫ့ဎွၩအၥီၫ့ Msgr. Andrea Ferrante ဒဲထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါဎြံၬအဆၧၡူၪဆၧမုၬမွဲအီၪဝ့ၫလၧနၥံၪကိၭဂၩဒ့ၭလါဆံၭႉကဆါဎြံၬနီၪဂဲၫအီၪဖျဲၪဘဲၫၥိၭ ဖိၪၥၫကဂၩနီၪလီၫႉ အဝ့ၫယီၩဆၧစီၩဆၧမၩ့အီၪအ့ၬႇ ဘၪအီၪဖျဲၪလၧဆၧဆၫ့လၩ့ၥၭနီၪလီၫႉ ကဆါဎြံၬအီၪဖျဲၪဂီၩ့ ကဘၪထိးၥံၫၥၭအခံၫ့ကထီၩ့ထီ လီၩထၬ အထံၩအဖျဲၥံၪဆၧချဲၩ့နီၪမွဲဝ့ၫ ဆၧၡူၪဆၧမုၬမွဲအီၪဝ့ၫလၧနၥံၪကိၭဂၩဒ့ၭလါဆံၭနီၪလီၫႉ ဆၧနီၪအကၠီၩ့ ကဆါဎြံၬအထံၩ အဖျဲၥံၪနီၪ အီၪဆၧကဆါဎြံၬ ဆၧၡူၪဆၧမုၬဖၧၩ့နီၪလီၫႉ ကဆါဎြံၬ ဆၧၡူၪဆၧမုၬနီၪ စူၪဝဲၩပၪနးဆံၭအ့ၬ နီၪလီၫႉ ဆၧၡူၪဆၧမုၬ အၡါမၪနီၪ မွဲဝ့ၫယိဂ့ၩယိဘၪၦဂူၫဂၩဒဲ မၩဘျၪထဲၩ့ၦဂူၫဂၩ အဆၧဆၫနီၪလီၫႉခီၫခီၫပကစူၭကီၪ့စူၪဝဲၩၥံၪ လဂၩဘၪလဂၩဖၬထၬလိၭၥၭဆၧယူၭယၫ့ဂီၩ့ အၪ့န့ထၪ့ထဲၩ့ ဆၧၡူၪဆၧမုၬနီၪလီၫႉဆၧနီၪအကၠီၩ့ ၦ ၥၫ့ဎွၩလ့ၫအိၫ ၁၄ ဂၩလဂၩယီၩ နၥံၪကအီၪပထုၬထၬ ဆၧဒူၭဆၧခၭဆၧအဂး အၪ့က့ၩအၪ့ရၫထၬနၥံၪႇ နၥံၪကဘၪဆိၪခွံၬ စူၪဝဲၩအဂး ကိၭဖံၭၥိၭထၬနၥံၪနီၪလီၫႉၦဆံၫဎံၪ Augustine လီၩၥ့ၪယၫပၧၩဆၧချဲၩ့ကမံၩ့နီၪ ၦဂူၫဂၩဆၧၡူၪဆၧမုၬကအီၪအဂး နၥံၪကမၩဆၧၩ့စွါဘဲၫ နၥံၪအၥၭခံဖၧၩ့ ဆၧၡူၪဆၧမုၬ ကဘၪအီၪထၬဝဲၩနီၪလီၫႉ

ခးပယၩ့ဖၧ ဆၧၡူၪဆၧမုၬကအီၪအဂးၦလၧ မၩဆၧမၩဆၧဖိၪၥံၪ မွဲနၥံၪဒိၭန့ဘၪကဆါဎြံၬဆၧ ဆိၪဂ့ၩကိၭဂၩဒ့ၭလါဆံၭႉလၧခဲၫ့ ၂၀၂၆ နံၪ့နီၪ ခးပယၩ့ဒဲ ဂၪ့ခိၪထၧၫ့ဘံၪ့ယၫ ဆၧၡူၪဆၧမုၬကန့ထၪ့ထဲၩ့အဂး ပကဘၪဘၩဆိၪဖၪကိၭဂၩဒ့ၭအကၠီၩ့ ကၫဒံၫန့ၫ ချားလ်စ်မောင်ဘို ကိၭဖံၭၥိၭပၧၩ့လၧ ဆၧချဲၩ့ယီၩနီၪလီၫႉ