ပထီးလူၬ အထီလၧယၫႇ ပထီးအလူၬ အနဲၩ့ဎီၩ့

ပဂၪ့ခိၪချိၫ့ယီၩ ၡၩအဆၧဝံဆၧနၬဂဲၫအၪထၪ့ႇ ဆၧလၧအလိၫလဖၪ ဂဲၫအၪထၪ့ႇ ခီၫ့ၡၩအနိၪ့လဖၪ ဆၧပျၧၩ့ထၪ့လိၬၥၭ ဂဲၫထီၪ့ထၪ့မွဲဝ့ၫ ၡၩခမျၧးလဖၪ အဆၧၫ့အထီဒဲ အဆၧဖံၭဆၧမၩလဖၪအကၠီၩ့ နဲၩ့ဎီၩ့နးဆ့ ကနံၪ့ဒဲကနံၪ့ ဂဲၫဂၭဂီၩ့ဂၭစၪ့ထၪ့ယူၭနီၪလီၫႉ ဆၧဂၭဂီၩ့ဂၭစၪလဖၪႇ ဆၧလၧအဘၪထိးမၩဂၭဂီၩ့အၥၭလဖၪ ဘဲၫကဆုးဖီၪ့ဂုးဝ့ၫဒဲ ပဒၩ့ထၬကန့အဂး နဲၩ့ဎီၩ့ကဆုးအီၪဂုးခၧၫ့ လဆိၩၡၩအဂးနီၪ လၧၦၡၩၥံၪအဂး မွဲဝ့ၫ ဆၧအၪ့ထၩ ဎိၩဒိၪကမံၩ့နီၪလီၫႉ

ၦၡၩၥံၪ ဖီၪ့ထၪ့ဖံၭထၪ့ လၧဆၧကလ့ၩထၪ့လ့ၩထီၪ့အဂးနီၪ ကကဲၩ့ခီၫနီၪ လ့ၩထၪ့ထီၪ့ဂီၩ့ ကကဲၩ့နီၪ ဂၭဂီၩ့ဂၭစၪထၪ့စွါဘဲၫ ပကဘၪလီၩလၧ အခိးတၩအီၪဝ့ၫ ဆၧလ့ၩထၪ့လ့ၩထီၪ့ ကကၪဝ့ၫဒၪလီၫႉ လိၫဝ့ၫတၡါနီၪ မွဲဆၧလ့ၩထၪ့လ့ၩထီၪ့လၧ လဘၪထံၭဆၫဘၪနဲၩ့ဎီၩ့နီၪလီၫႉ ဆၧလၧဂၪ့ခိၪနဲၩ့ဎီၩ့နီၪ မွဲဘၪဎၬဒၪလၧ  ကဂၩႇ ကခရၧၫ့ဒဲ ထံၫခးကခးလမွဲဘၪ မွဲဘၪဎၬဝ့ၫဒၪလၧ ၦၡၩထီးအလူၬနီၪလီၫႉ ဘဲၫနီၪအၥိၭ ဆၧၫ့ထီဘဲၫယီၩ ကလ့ၩထီၪ့အဂး ပဘၪဒိၭနဲၩ့ပၥၭလၧ နဲၩ့ဎီၩ့အဖၫ့ခိၪအၥိၭ အထီလၧၫ့ယၫ ဆၨၩၥၫ့ဘၪ့ၥံၪအဂးနးဆ့ ကဘၪယိထွ့ၫပဒၩ့ ဂၪ့ခိၪနဲၩ့ဎီၩ့ဆ့နီၪလီၫႉ ထီမုဆၫကနံၩယီၩ ဂၪ့ခိၪနဲၩ့ဎီၩ့ ဂၭဂီၩ့ဂၭစၪထၪ့ယူၭအကၠီၩ့ ပဂၪ့ခိၪချိၫ့ယီၩ အီၪမုၬအ့ၬယူၭနီၪလီၫႉ

ပကစံၭလၧ ၦၡၩၥံၪအထီလၧယၫနီၪ အၪဒၪဆၧ ကဒၪဝ့ၫမွဲ အမိၡါခံးဂၩ့ႇ အဆၧအၪ့ဎူၪအၪ့ဎၬ အဆၧလ့ၩထၪ့လ့ၩထီၪ့နီၪလီၫႉ လါနၫ့ ၦခမျၧးၥံၪလဖၪ အၥၭကထီၪ့အဂးဒဲ ကလ့ၩထၪ့ထီၪ့အဂးနီၪ နဲၩ့ဎီၩ့လၧ အဆီၪ့ချဲၫ့ လိၫဝ့ၫဒၪလီၫႉ မွဲဆၧဘဲၫနီၪ ၡၩခမျၧးထီးဆၨၩယၫအဂး အရ့ၩဒိၪဝ့ၫဒၪ ပကဘၪယိထွ့ၫ ပဂၪ့ခိၪ နဲၩ့ဎီၩ့နီၪ စၭထၪ့လၧ ၦကဂၩဆုးဆုးမွဲဂ့ၩႇ လၧခရၧၫ့ႇ လၧထံၫခးဒဲ ဂၪ့ခိၪထၧၫ့ဘံၪ့ယၫ ပကဘၪစူၭကီၪ့ ယိထွ့ၫ ပဒၩ့ကၠၭနီၪလီၫႉ

ဘၪထွ့ၫလၧ ဆၧယိထွ့ၫနဲၩ့ဎီၩ့ဆၧမၩလဖၪနီၪ ပၫထဲးဎုၬလၧ ကုလၭၥၭမဂၭ ထံၫခးလဖၪႇ ခရၧၫ့ၥံၪလဖၪ ဖီၪ့ထၪ့ဖံၭထၪ့ မၩလၩ့ဎိၭကၠၭဝ့ၫလါနၫ့ဂ့ၩ နဲၩ့ဎီၩ့ဂၭဂီၩ့ဂၭစၪထၪ့ႇ ဆၧဖိၪဆၧဎါလၧ အီၪၡိၬကျၩလဖၪ လၩ့ၡၩႇ ထံၫအထၧၫ့ႇ လံၩအထၧၫ့ႇ ဖံၬအထၧၫ့ ၥၭလိၪၥၭလံၬထၪ့လဖၪႇ ၥံၪ့ကျိၭလူၭပျီၩ့ခွံၬၥံၪနီၪ မွဲလလၩ့ၡၩဘၪဂီၩ့ ဂဲၫနၭထၪ့ခီၫနီၪလီၫႉ ဆၧအယီၩ ၦခမျၧးၥံၪအထီလၧယၫကအီၪဂုးခၧၫ့အဂး ဎိၩဒိၪဝ့ၫဒၪ ဆၧမၩတုၩ့မၩဎီ ဆၧကမံၩ့ နီၪလီၫႉ