အ့ၪမွဲနၥံၪလၩ့ထၪ့ဘၩယွၩ လၧၥရိၬဖၧၩ့အခၫ

၁ႉ စအဲၪၡီၩ့ နကၠၧၩ့လၫ့ထၬ နၥၭဂီၩ့ နကလ့ၩခလဲၪအနီၪႉ

၂ႉ ကနံၩယီၩ မုအီၪပွံၭနံၩဘိၭ ယကလ့ၩထၪ့ဘၩယွၩဘီၪႉ နၧၩလဲၪ နလ့ၩထၪ့ဘၩယွၩအ့ၬဧၫႉ

၁ႉ အီၩ ပလ့ၩထၪ့ဘၪနီၪဘိၭႉ မွဲအ့ၬဘီၩ နလီၩခီၫ နကလ့ၩထၪ့ဘၩယွၩႉ နဂဲၫၥိၭထၬနဖံၭနခီၫယီၩခီၫနီၪ စူၪဘံၪ့အ့ၬခၪ့ဘံၪ့ အ့ၬနဲၪႉ

၂ႉ ဧၩ နၧၩနးဆ့ အယီၩနီၪ Styleဘီၩယါႉ

၁ႉ Style Style လဂ့ၩ ကကၠၪဒိၪအိၩ ၥၫ့ခၫလီၩလၩ့နဂါဂၧၫ့အ့ၬဧၪႉ

၂ႉ ၥၫ့ခၫလီၩလၩ့မန့လဲၪဘိၭႉ

၁ႉ ကကၠၪဒၪအိၩၥၫ့ခၫလီၩလၩ့ အ့ၪမွဲပဂဲၫလၧၥရိၬအခံၫ့ ပကဘၪဂဲၫထၧၩ့အလၩ့ဂၬပဂဲၫလၧၥရိၬစွါဘိၩႉ အဝ့ၫစံၭဝ့ၫ ၦၡၩ အခွၫၥံၪ အ့ၪမွဲနၥံၪဂဲၫလၧၥရိၬအခၫ ဂဲၫခိၭနၥံၪကလ့ၩယိချီအၥိၭလဂ့ၩႉ ၥရိၬယီၩနီၪ မွဲပဂဲၫယိချီအလးအ့ၬႉ ပဘၪဂဲၫထၪ့ ဘိၪ့ထၪ့ဘၩထၪ့ယွၩအလးႉ ဆၧဘနီၪအကၠီၩ့ ၦၡၩအခွၫၥံၪ ဂဲၫထၪ့ကီၩ့ဖျၪ့ခဲၫ့ဖၨၪလၧၥရိၬဖၧၩ့လဂ့ၩႉ ဂဲၫထၪ့ကီၩ့ၡၪ့ အ့ၪလမွဲဘၪဘိၭ ဂဲၫထၪ့ကီၩ့ဖျၪ့ခဲၫ့ထီၫနီၪႉ  အ့ၪမွဲၦၡၩအမုၪၥံၪနီၪဘိၭ ဂဲၫထၪ့ၥိၭပလူၭလၧ လဘံၪ့လၥူၫဘၪလဖၪလဂ့ၩႉ ဆၧကီၩ့အဖၨၪခိၭလဖၪႇ ပဒၪလဎံၪဘၪလဖၪႇ လကြၨၭလတီၩဘၪလၧၥရိၬ ဆၧကီၩ့ဆၧၥိၭႇ ဆၧကၠၧၫ့ဆၧကၠီၩလဖၪ ဂဲၫထၪ့ ၥိၭကၠၭႇ ကီၩ့ကၠၭလဂ့ၩႉ ၥရိၬနီၪ မွဲNight Club ၥံၪ Barၥံၪအလးအ့ၬ အဂဲး  မၩ့ကၠဲၭလီၩလၩ့ထၬဘနီၪဘီၩႉ

၂ႉ အီၩဘနီၪဧၫႉ အနီၪယၥ့ၪယၫအ့ၬ နးအဲၪဖီၫဘွၩဧ့ႉ ကီၩ့ယါနလီၩအ့ၪယၧၩဒံၭႉ ကဲ အ့ၪမွဲဘနီၪ ယကထဲၩ့အၪ့လဲၩလၫ့ထဲၩ့ ယၥၭဒံၭႉ

၁ႉ အၨၫအၨၫ

၂ႉ ကဲ နးအဲၪဖီၫဘွၩ အယီၩန့ယူၭဧၫႉ

၁ႉ န့ယူၭ န့ယူၭႉ အီၩ ကိနီၪ ယကဘၪလီၩနၧၩဒံၭ နလ့ၩနုၬလၩ့ထီၩ့လၧၥရိၬအခၫ ၥိၩ့ခွ့ၩဒိၭနါနးဆံၭလၧၩ့လဂ့ၩႉ ဖိၭဘံၭထၬဝံၬ နခွ့ၩဒိၭနါအလူနီၪႉ ၦၡၩကနၩ့နၩ့ ဂဲၫထၪ့ဘၩယွၩဂီၩ့ လၧၥရိၬဖၧၩ့ၥိၩ့ခွ့ၩဒိၭနါႉ ပဒၪ ဘၪကံၩဘၪထံၭနးဆံၭအ့ၬႉ လချူၭၥရိၬ လထၪ့ဒံၭဘၪအခံၫ့ ဖိၭဘံၭထၬခွ့ၩဒိၭနါအဂဲး ၦၡၩဆ့ၭဖ့ၪနဲၪထၬထဲလံၬဎွ့ၩနီၪယူၭနီၪ ၦၡၩကနၩ့နၩ့ ခိၭနၪဝ့ၫအ့ၬႉ ကိနီၪ ၥၫ့ခၫ လီၩလၩ့လၬလၩ့ဆၧၥၭထိၬပရၧၫ့အခံၫ့ အခွ့ၩဒိၭနါအလူ ဂဲထုၪ့ဂၪ့ကိၭလၫ့လၧ၁ရိၬဖၧၩ့အလူဖၭဒိၪႉ အနီၪဘိၭ ကဲၪလၫ့ၦၡၩ အဂး ဆၧကၪဆၧဂဲၩမွဲအ့ၬဧၫႉ ၦၡၩကနၩ့နၩ့ဒီၭ ချဲၩ့ယံၫယါနးဆိၭအ့ၬဧၫၥ့ၪယၫအ့ၬႉ ဂဲၫထီၩ့လၧၥရိၬမၬ ဘၪချဲၩ့ထဲလၧၥရိၬ ဖၧၩ့ ထၧၩ့ၥရိၬစဲၪ့လၩ့ကကၠၪႉ ၦၡၩကနၩ့နၩ့ဒီၭ ဂဲၫထၪ့ဘၩယွၩစွါဘိၩႉ လီၩ့ဆိၪဖၪဖိၭၦၡၩအခဲၫ့ဆၧနးမံၩ့အ့ၬႉ ဖိၭဘိၭထၬ ထဲအနိၭနီၪ အီၪန့ချဲၩ့လၥ့ၪဘၪဒံၭႉ အၡါမၪဆၧလဖၪယီၩ ကြၨၭကဲၪအ့ၬယါႉ

၂ႉ အၨၫမွဲနးအဲၪဖီၫဘွၩဧ့ အနီၭနီၪ ယဒၪယံၩယါ ခိၪမၬခိၪမၬဒ့ၭႉ ကိနီၪဘီၩ ယစီၪလဘၪဘၪကမံၩ့နီၪ လၧၥရိၬဖၧၩ့ ၦၡၩအထီး လၩ့မါကထံၪထံၪႇ ၦၡၩအခွ့ၩဒိၭနါလၩ့မါကထံၪထံၪႇ ခၪ့ဖံၭၥံၪ စီၩ့ၥံၪလၩ့မါကထံၪထံၪဒံၭႉ လၧၥရိၬဖၧၩ့ ဆၧလၩ့မါနီၪ မငါ နးဆံၭအ့ၬယါႉ

၁ႉ မွဲဘၪနီၪ ၦၡၩလ့ၩထၪ့ဒိၭန့အၪ့ ကိၪဘိၪ့ဆံၫ့ဎံၪအခံၫ့ အ့ၪမွဲကဖဲထၬထး ထီးၥံၪ ခွ့ၩဒိၭနါၥံၪလၧအလးနီၪစွါဘိၩ လၩ့မါယူၭႉ ဆၧအၪ့ဂူၫလဖၪနီၪနးဆ့ ဂဲၫအၪ့ဂူၫထဲဆၧထၧၩ့ထီၩ့လၧၥရိၬဖၧၩ့ႉ လၩ့မဲၩပူၭဒ့ၭႉ ဆၧဘနီၪအကၠီၩ့နီၪ အ့ၪမွဲ ၦၡၩကလ့ၩထၪ့ ဒိၭန့အၪ့ထီ ကိၪဘိၪ့ဆံၫ့ဎံၪအခံၫ့ ၦၡၩဆ့ၭလၩ့လံၬနဒၪအ့ၬဧၫႉ ဖဲထၬထးနၥံၪအထိၫ့ၥံၪ ခွ့ၩဒိၭနါၥံၪလၧနၥံၪအလးနီၪလဂ့ၩႉ ဆၧအၪ့ဂူၫအၪ့ဘျၪအီၪအဂဲး ဘၪဖ့ၪလၫ့ဆၧထုၪ့ၥုၪ့ထုၪ့ၥၭ ခိၪမၬခိၪမၬဘီၩႉ

၂ႉ အၨၫဘီၩ ဆၧအၪ့ဂူၫကပၫနီၪ ကလၩ့လၧရၬဖၧၩ့ဂ့ၩဘၪစဲၪ့ဒ့ၭႉ လၧၥရိၬဖၧၩ့မၬဂၭဎ့ၬဝ့ၫအ့ၬႉ ဂဲၫလီၩ့အၪ့ဂူၫဆၧနီၪႉ

၁ႉ ကဲကဲ ပချဲၩ့နီၪမုၬ ဂဲၫပကလ့ၩ အီၪယံၭယံၭ ပကစွံဒီၭႉ ပလ့ၩထၪ့ဘၩယွၩမၬနီၪ ပကဘၪလ့ၩ ထၧၫ့အလၩ့ဂၬ ပလ့ၩထၪ့ ဘၩယွၩအီႉ

၂ႉ အၨၫမနါနးအဲၪဖီၫဘွၩဧၫနါ ယၥ့ၪယၫယူၭဘ့ၭႉ

၁ႉ အၨၫ နၥ့ၪယၫမၬနီၪ ဂီၩ့လီၫႉ