ခးၥဲၫထၧၫ့ဘံၪ့ယၫ ဆၧကိၪ့ဘၪကိၪ့ၥ့ၪ ယူၩဘလံၫ
နံၪ့၂၀၂၅နံၪ့ လၩနိၫဝ့ၩဘၧၫ၂၄ၥၫ့နီၪ ဆၧမၩလၩမၩဖၩ့ၡီၩ့ ဂၪ့ခိၪထၧၫ့ဘံၪ့ယၫ ဆၧကိၪ့ဘၪ ကိၪ့ၥ့ၪ ယူၩဘလံၫ အီၪဝ့ၫဒၪလၧ ဝံးပၥံၫ့ စံၫ့ပံတၧၫ ကၥံၫဒရဲၫ ၁ရိၬလးဝၩ့ဖၧၩ့နီၪလီၫႉ မံၩဆၩဆၧ လုထၪ့ စၭထၪ့လၧ လဂီၩ၆နၩရံၫနီၪဂီၩ့ ၥၫ့ခိၪဒိၪ ဟင်နရီမၩ့အဲၪချံၫ့ လ့ၩခိၪလ့ၩနါ ဒဲ ၥၫ့မုၥၫ့ခၫပၪဝ့ၫ ဒၪ၁၃ဂၩနီၪလီၫႉ
“ဆၧကိၪ့ဘၪကိၪ့ၥ့ၪ အ့ၪလအီၪဘၪနီၪ ၡၩအထီလၧယၫမွဲလအီၪဘၪလီၫႉ ပကၭၥလံၭဆၧ အီၪကီၪ့ယီၩ ၥ့ၪယၫထၬဆၧအဂဲးယီၩ ဂ့ၩဂ့ၩဘၪဘၪအကၠီၩ့ ဆၧကိၪ့ဘၪကိၪ့ၥ့ၪယီၩ အရ့ၩဒိၪဝ့ၫဒၪ ဎွ့ၩပၥ့ၪလဲၪအဂဲး ကမိဒုၭဖျီၪထၪ့ဝ့ၫအကၠီၩ့ မၩလၩမၩဖၩ့ မုနံၩယီၩနီၪလီၫႉ ဆၧနီၪတၭ လၧအၥၭ ဆံၭဆံၭအထီယီၩ ၦလၧအထၪ့ဘၪဆၧမၩလိၪ ဖိၪမုၪဖိၪခွၫၥံၪလဖၪ နၥံၪအဆၧဘိၪ့ ဂ့ၩအၪမၬလ့ၬ နီၪလီၫႉ ဆၧအယီၩ မွဲယွၩအဆၧဆိၪဂ့ၩဆိၪဘွၩ အခိးအတၩနီၪလီၫႉ အယီၩနီၪ မွဲပကဘၪ အီၪက့ၪ ဒိၪနီၪလီၫႉ ပကၭၥလံၬ ဖိၪဒံၪဖိၪၥၪ ဒဲ ၥၭဘၪ့လဖၪ အ့ၪမွဲကဲၪထၪ့ ၦကိၪ့ၥ့ၪဖိၪလဖၪစွါဘဲၫ အယီၩ မွဲဒၪလၧ ပမိဆၧအီၪကီၪ့အထီလၧယၫနီၪလီၫႉ ၦကိၪ့ၥ့ၪဖိၪ အဆၧဝံဆၧနၬနီၪ မွဲလၧကဆုးထဲၩ့ ဖီၪ့ထၪ့ဖံၭထၪ့ မိဆၧအီၪကီၪ့ အဆၧဖံၭဆၧမၩ ခိၪနါအဆၧဝံဆၧနၬလီၫႉ ဆၧနီၪအကၠီၩ့ ပကကၧၩ့ ဖျိၪ့ထၪ့ဆၧဝံဆၧနၬဒဲ ဆၧကိၪ့ၥ့ၪလဖၪဂီၩ့ ပကဖျိၭထၪ့ ထီလၧယၫလါဆံၭႉ ဖိၪၥၪဆံၭဖိၪၥံၪလဖၪ မွဲအ့ၪထၪ့ဘၪဒၪဝ့ၫ ဆၧမၩလိၪလါဆံၭႉ လၧပၥၭဆံၭဒံၭအခံၫ့ ပထၪ့ဘၪ ဆၧမၩလိၪနီၪ မွဲဆၧဆိၪ ဂ့ၩဆိၪဘွၩကမံၩ့နီၪလီၫႉ” အဂဲး ၥၫ့ခိၪဒိၪဟင်နရီမၩ့အဲၪချံၫ့ လီၩလၩ့လၭလၩ့ဝ့ၫ ဘဲၫနီၪအၥိၭလီၫႉ
မံဆၩဆၧလုထၪ့ ဂီၩ့ဝ့ၫကကၠၪ လဂီၩ ၈နၩရံၫအခံၫ့နီၪ ၥၫ့ခိၪဒိၪဒဲ ၥၫ့မုၥၫ့ခၫႇ မံၭထၭမုၪခွၫ လဖၪႇ ဆရၫဆရၫမုၪလဖၪ ဒဲ ဆၧမၩလိၪဖိၪၥံၪလဖၪ ဒၪဎိၭလၩ့လိၬၥၭ ဆၧထံၫလၩ့ဒီၪလၩ့ ဆုးထဲၩ့ အီၪဝ့ၫဒၪနီၪလီၫႉ
#24.11.2025
