စိန်ဖရန်စစ်ဇေးဗီးယဲ မံၭထၭမုၪၥံၪအယူၩဘလံၫ
၂၀၂၅နံၪ့ လၩနိၫဝ့ၩဘၧၫ ၁၇ၥၫ့ လဂီၩ၇နၩရံၫအခံၫ့နီၪ ၦၡၩမၩလၩမၩဖၩ့ၡီၩ့ စိန်ဖရန်စစ် ဇေးဗီးယဲ မံၭထၭမုၪၥံၪ အယူၩဘလံၫ မံဆၩဆၧလုထၪ့အီၪဝ့ၫဒၪလၧ ဒိၩ့ပၥံၫ့ စံၫ့ပံတၧၫကၥံၫ ဒရဲၫၥရိၬလးဝၩ့ဖၧၩ့နီၪလီၫႉ
မံၭထၭမုၪလၧအထိးဆၧၫ့ဒိၭန့ ၂၅နံၪ့စ့ၩဘျံၭယူၩဘလံၫအီၪ၉ဂၩ ဒဲ အနံၪ့၅၀ထီၫ့ယူၩဘ လံၫအီၪဝ့ၫဒၪ၅ဂၩနီၪလီၫႉ ၦလၧအလ့ၩခိၪလ့ၩနါ ယူၩဘလံၫမံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ Bp.Henry မၩ့အဲၪချံၫ့နီၪလီၫႉ
“ပဆၧၥၭမၧၫ့ ပအီၪက့ၪဂုးခၧၫ့ပဆၧအုၩ့လၩ့နီၪ အကၧၩ့ဒိၪန့ ဆၧဆူနဲၩအၥံၫဒံၭနီၪလီၫႉ ခီၫခီၫပကဆူနဲၩဒၪ ကဆါယွၩပျီၩပျီၩနီၪ မုကိနံၩအဖၧၩ့ လၧပဘၪမၩဝ့ၫဒၪ ဆၧမၩလဖၪအဖၫ့ ခိၪ လၧပၥုၪ့အီၪၥၭအီၪအဖၧၩ့ ပမၩထၪ့ဂ့ၩဂ့ၩဘၪဘၪနီၪ အခီၫပယီၫအီၪနၭကဆံၭအဂဲး မာ သာရ်ထရေဇား ၥ့ၪယၫထၪ့ဝ့ၫလီၫႉ ၦဂူၫဂၩအ့ၪမွဲ ခွံၬၡိၬထးနၧၩလါနၫ့ ယၧၩယီၩယခွံၬၡိၬ ထးနၧၩနးဆိၭအ့ၬယွၩဧ့ ၦလၧအစံၭယွၩဘဲၫယီၩအၥိၭ ကဆါဎြံၬအထံၩအဖျဲကဂၩနီၪဆ့ လခဲၫ့ ထုၬနီၪ ခွံၬၡိၬထးခွံၬကဆါယွၩဂီၩ့ မၩဂၭဂီၩ့ခွံၬထဲၩ့အဆၧအုၩ့လၩ့နီၪလီၫႉ ကဆါယွၩနီၪဆိၫ့ကၩ ပၧၩလၧအဒီၩ့အမံၩ့မံၩ့နီၪလီၫႉ ကျ့ၭစၨၭနၪၥ့ၪထၪ့ဆၧဆူနဲၩနီၪလဂ့ၩ အုၩ့လၩ့ဆၫ့လၩ့နၥံၪအၥၭ ဂီၩ့ဆုးထဲၩ့ဂၭဖၬဆံၭႉ ဆၧဆံၭခိၬဖိၪလဖၪနီၪအ့ၪမွဲပမၩထၪ့လၧပၥၭဖၭဒိၪစွါဘိၫ ဆၧဆံၭခိၬဖိၪ လဖၪယီၩနီၪ မွဲကကဲၪထၪ့ထဲၩ့ ဆၧဖၭဒိၪလဖၪနီၪလီၫႉ စိန်ထရေဇားလေးနီၪ အဆၧအုၩ့လၩ့ လဂုးခၧၫ့ဘၪအကၠီၩ့ အၥၭအုၭဂီၩ့ အၪ့ကံၩ့အၪ့ယၫထၪ့ကဆါယွၩအခၫ ကဆါယွၩ စံၭဆၧၫ့ထဲၩ့ အဝ့ၫနီၪ ယဖိၪမုၪဧ့ အ့ၪမွဲနဆၧအုၩ့လၩ့လဖၪ ကဂုးခၧၫ့ထီးလူၬစွါဘဲၫ ယကထိးၥံၫလၧၩ့ဘၪ ယၥၭလၧ ထုၪ့စူၪယၫဖၫ့ခိၪလၧၩ့ဧၪႉ လၧနဆၧၥၭမၧၫ့ဖၧၩ့ ဖ့ၪလၫ့ယၧၩအလးဒၪလူၬဘီၩႉ က ဆါယွၩစံၭထဲၩ့အဝ့ၫဘဲၫနီၪလီၫႉ ကဆါယွၩနီၪ ကမိဂဲၫနုၬလၩ့အီၪလၧ ပဆၧၥၭမၧၫ့အၪမၬလ့ၬ အကၠီၩ့တၭ ပကဘၪဖ့ၪလၫ့အ့ၪအဝ့ၫအဂး အလးလၧပဆၧၥၭမၧၫ့အဖၧၩ့ ကလိၪဝ့ၫဒၪတၡါ ၡါနီၪလီၫႉ” အဂဲး ၥၫ့ခိၪဒိၪ Bp.Francis သန်းထွန်း ဖ့ၪဂဲးဖ့ၪဘၭဘၪ ၦဆူနဲၩဖိၪၥံၪ ဘဲၫနီၪအၥိၭ နီၪလီၫႉ
ကၫဒံၫနဲၫခၠၩစဘိၫနီၪ ဆုးထဲၩ့စံၭဝ့ၫဒၪ “ပမၩလၩမၩဖၩ့ ယူၩဘလံၫအခံၫ့ ပကဘၪထုၪ့ ပၥၭကမံၩ့နီၪ ပကဘၪစံၭခိးစံၭတၩထဲၩ့ ထီးအဖီၩ့ခွံၬလဖၪအိၩနီၪလီၫႉ ၦလၧစံၭခိးစံၭတၩထဲၩ့ ဆၧၥ့ၪလဂၩနီၪ မွဲၦလၧအဂ့ၩအဘွၩ မွဲၦလၧအဖျါခွံၬဆၧန့လဂၩ မွဲၦလၧမုၬလၩဘၪဝ့ၫလဂၩႇ ဒဲ မွဲၦလၧအမံၪ့ၥုၪ့မံၪ့ၥၭဆၧၥ့ၪလဂၩနီၪလီၫႉ တခၩပကမၩဆၧနးမံၩ့ ပကဘၪမၩလၧ ၥုၪ့အီၪၥၭ အီၪအဖၧၩ့လီၫႉ ပကဲၪၦဎြံၬဖိၪၥံၪနီၪ မွဲၦလၧအဘၪယိလါဆၧလဖၪလီၫႉ မွဲပၥုၪ့ၥၭကဘၪလၩ့ ဆါအ့ၬႉ ပကဘၪဒိၭနဲၩ့ၥၭလၧယွၩဂီၩ့ ပကဘၪခိၭယိလါဆၧနီၪလီၫႉ ပထံၫခးယီၩ မွဲကဂဲၫလ့ၩ ထၪ့လ့ၩထီၫအၪနဲၪ့အယီၩအဂဲး ပကဘၪယိလါဂီၩ့ ပကဘၪအၪ့ကံၩ့ဘၩဆိၪဖၪဆၧတၭ ပက ဘၪအီၪမၧၫ့ပၥၭနီၪလီၫႉ”
မံဆၩဆၧလုထၪ့ဂီၩ့ဝ့ၫဒၪကကၠၪ ၦလၧအဒိၭန့ စ့ၩဘျံၭယူၩဘလံၫ မံၭထၭမုၪ Sr.နန်း နွယ်ပြုံးနီၪ ချဲၩ့စံၭခိးစံၭတၩထဲၩ့ဆၧနီၪလီၫႉ
