စလုကၭ (၂၃:၃၅-၄၆)
ၦခမျၧးၥံၪဆၧၫ့ထုၪ့ယိဆၧလီၫ. ဒဲၦဒိၪၦၡါၥံၪဒုၪဒွ့ၪဆၧတၭ, စံၭဝ့ၫ, ၦလဂၩယီၩထိးထဲၩ့တၩ့ထဲၩ့မၬၦဂူၫဂၩတၭ, အ့ၪမွဲဎရံၬၦလၧယွၩရွံန့ဝ့ၫလဂၩနီၪ, မွဲအထိးထဲၩ့တၩ့ထဲၩ့ဒၪအၥၭဆံၭ. ၦၥုၭဖိၪလ့ၩလၧအအီၪတၭ, ဒုၭအီၩဝ့ၫဆၧဆဲၪ့ထံၫ, ဒဲဒုၪဒွ့ၪဝ့ၫဆ့တၭ,စံၭဝ့ၫ, နအ့ၪမွဲၦယုဒၫဖိၪအစဎွၩနီၪ, ထိးထဲၩ့တၩ့ထဲၩ့ဒၪနၥၭဆံၭ. လံၬဒုၭနဲၪဆၧအီၪကွ့ၭအၥၭ (လၧဂြံစၭ,ဒဲရိမၫ,ဒဲဟံ ဘြႃၫအဆၧချဲၩ့) ဘၪဆၧအီၪက့ၪထၪ့ဝ့ၫလၧအဖၫ့ခိၪ, အယီၩမွဲၦယုဒၫဖိၪၥံၪအစဎွၩလီၫ. ၦထမျၬၥံၪလၧအဘၪဆၧဖျၩထၪ့ဝ့ၫနီၪ အလဂၩဒုၪဒွ့ၪဆၧတၭ, စံၭဝ့ၫ, နအ့ၪမွဲဎရံၬနီၪ ထိးထဲၩ့တၩ့ထဲၩ့န့ဎုၬလါနၥၭဒၪ နဝ့ၫဒဲပဝ့ၫဒၪယီၩဆ့ဘီၪ. အ့ၪမွဲအဝ့ၫဒၪလဂၩချဲၩ့ဆၧၫ့ဆၧ, အၪ့လၬအဝ့ၫနီၪ, စံၭဝ့ၫ, နဘၪဆၧစ့ၩရၫ့စၪလမံၩ့ဎးလၧၦလဂၩယီၩတၭ,မွဲနၥၭမဲၪယွၩအ့ၬဧၪ. ပဝ့ၫဒၪယီၩပဘၪဆၧစ့ၩရၫ့တီၩတီၩလီၫ. အဂဲးဘဲၫယီၩပထိးဘၪဆၧ ထီးဒၪအကြၨၭ လၧပမၩဆၧအဂဲးလီၫ. အ့ၪမွဲအဝ့ၫလဂၩယီၩ, မၩမၪဆၧနးမံၩ့အ့ၬ. အဝ့ၫဒၪစံၭယ့ၫၡုၬ, ကဆါဧ့, ထီးနအ့ၪနုၬလၧနဘၩ့နမုးအဖၧၩ့တၭ, နၪ့ထၪ့ထဲၩ့ယၧၩဆံၭ. ယ့ၫၡုၬစံၭအဝ့ၫဒၪ, ယလီၩဘၪနၧၩ တီၩတီၩယီၩ, မုဆၫလနံၩယီၩ နမိအီၪလၧယၥိၭ လၧပၫရဒဲၭအဖၧၩ့လီၫ. ယ့ၫၡုၬအဆၧၥံၫအဂဲး. (မၭ ၂၇:၄၅-၅၆, မၫ ၥ၅:၃၃-၄ၥ, ယီ ၥ၉:၂၈-၃ဝ) ဘၪဎူၫနၩရံၩကၪယူၭတၭ, ဆၧခံၭလၩ့ဝ့ၫ လၧခးနီၪထၧၫ့ဘံၪ့ယၫ, ထီၩ့လၩ့လၧခွံၫနၩရံၩလီၫ.- မုခံၭလၩ့ဝ့ၫတၭ, ဆၧလုဂံၪ့အကလကၫနီၪ ထ့ဖၭဝ့ၫဒၪလၧအကျၩလီၫ.- ယ့ၫၡုၬကိၭၡၭထၪ့ဆၧလၧအလူဖၭဒိၪတၭ,စံၭဝ့ၫ, ဖါဧ့, ယဖ့ၪလၫ့ယၥၭလၧနစူၪဖၧၩ့လီၫ. စံၭဆၧလဖၪနီၪဂီၩ့တၭ, အၥၭစဲၪ့ထၪ့ခွံၬဝ့ၫလီၫ.
