ဆၧချဲၩ့ဒီၩ့လၩ့ဘၪဆဲၫ့စ့ၩလမဲနၫ. (စလုကၭ (၁၉:၁၁-၂၈) )

ထီးၦနါဂၧၫ့ဆၧနီၪလဖၪတၭ, မွဲအအီၪဘူၭလၧ ယရုစလံၫ့အကၠီၩ့, ဒဲၦဆီၫ့မီၪ့ဝ့ၫလၧယွၩအဘၩ့အမုး မိအီၪထၪ့ချဲၫ့မၬအကၠီၩ့တၭ, အဝ့ၫဒၪချဲၩ့အၪထၪ့ဆၧချဲၩ့အဒီၩ့တၭ, စံၭဝ့ၫ, ၦဒိၪလဂၩမိလ့ၩလၧထံၫယဲၩ့ခးယဲၩ့ဘဲၫၥိၭအမိမၩန့အဘၩ့အမုးတၭ, မိဂဲၫထဲၩ့ထဲၩ့ဝ့ၫလီၫ. မွဲအကိၭန့အဎီးအၡၩဆံၫဂၩတၭ, ဖ့ၪလၫ့အဝ့ၫၥံၪဆံၫမဲနၫတၭ, လီၩဘၪအဝ့ၫၥံၪ, အၪ့ခၩဆၧထီးယဂဲၫထဲၩ့ဆံၭ. အဎီးအၡၩၥံၪမ့ၬလဲၩဝ့ၫတၭ, အၪ့မၧၫ့ၦလဂၩ လ့ၩဆီးအဝ့ၫတၭ, စံၭဝ့ၫ, အဝ့ၫလဂၩယီၩ ကဲၪစဎွၩလၧပဖၫ့ခိၪ, ဘၪပၥၭအ့ၬ.ဆၧမၩအၥၭလၧအမၩန့အဘၩ့အမုးဂီၩ့တၭ, ဂဲၫထဲၩ့ထဲၩ့ဝ့ၫတၭ, အၪ့မၧၫ့ၦကိၭန့ဆၧအဎီးအၡၩလဖၪ လၧအဖ့ၪလၫ့အစ့ၩလၧ အစူၪဖၧၩ့နီၪ, ဘဲၫၥိၭအမိၥ့ၪယၫဝ့ၫ လဂၩဘၪလဂၩနီၪ, မွဲအမၩအၪထၪ့အဆၧ ဆံၭအၪဆံၭအၪလဲၪနီၪလီၫ. အခၪ့ထံၭလဂၩဂဲၫစိၩတၭ, စံၭဝ့ၫ, ကဆါဧ့, နစ့ၩလမဲနၫနီၪ, န့အၪထၪ့ယူၭ ဆံၫမဲနၫယူၭ.- တၭအဝ့ၫဒၪစံၭအဝ့ၫ, ဘၪယူၭဎီးအၡၩလၧအဂ့ၩဧ့, မွဲနအီၪလၧဆၧၡၩ အဖၫ့ခိၪနလူတီၩယူၭ.အီၪနဝ့ၫလၧဒိၩ့ဆံၫဒိၩ့အဖၫ့ခိၪဆံၭ.- ၦနံၫဂၩလဂၩဂဲၫဝ့ၫတၭ, စံၭဝ့ၫ, ကဆါဧ့, နစ့ၩလမဲနၫနီၪ န့အၪထၪ့ယူၭယဲမဲနၫယူၭ.- တၭအဝ့ၫဒၪစံၭအဝ့ၫနီၪဆ့, အီၪနဝ့ၫလၧဒိၩ့ယဲဒိၩ့ အဖၫ့ခိၪဆံၭ.- အဂူၫဂၩလဂၩ ဂဲၫစိၩဝ့ၫတၭ, စံၭဝ့ၫ, ကဆါဧ့, ယိခွါ, နစ့ၩလမဲနၫနီၪ, လၧယအီၪက့ၪလၧပဝၫအဖၧၩ့နီၪ အီၪဝ့ၫလီၫ. အဂဲးဘဲၫယီၩ ယၥၭမဲၪနၧၩတၭ, နမွဲၦအကၪတၭ, ဆၧလၧနလအီၪက့ၪဘၪနီၪ, နမၩန့နဝ့ၫ, ဒဲဆၧလၧနလဎွံၪဘၪနီၪ, နကူၭနဝ့ၫလီၫ.အဝ့ၫဒၪစံၭအဝ့ၫ, ဎီးအၡၩလၧအအၧၩ့လဂၩဧ့, ယမိစ့ၩရၫ့စၪနၧၩ လၧနနိၭဒၪနဝ့ၫလီၫ. နၥ့ၪယၫလၧယမွဲၦအကၪတၭ, ဆၧလၧယလအီၪက့ၪဘၪနီၪ, ယမၩန့ယဝ့ၫ, ဆၧလၧယလဎွံၪဘၪနီၪ,ယကူၭယဝ့ၫလီၫ. မၩအၥၭဘဲၫနီၪတၭ,ထီးယအ့ၪဂဲၫ ထဲၩ့တၭဘဲၫၥိၭယမိန့ဘၪယစ့ၩ, ဒဲအအ့ၪထၪ့နီၪ,မွဲဘၪနီၫလၧနလဒုၭအၪ့လီးဘၪoယစ့ၩလဲၪ. တၭလီၩ ဘၪၦဆၧၫ့ထုၪ့လၧအနဲၩ့ထံၭနီၪ, မၩန့အဆၧလမဲနၫနီၪ ဖ့ၪလၫ့ၦအီၪလၧဆံၫမဲနၫလဂၩနီၪဆံၭ. အဝ့ၫၥံၪ စံၭအဝ့ၫ,ကဆါဧ့, အဝ့ၫဒၪနီၪအဆၧအီၪယူၭ ဆံၫမဲနၫယူၭ. အဂဲးဘဲၫယီၩယလီၩဘၪနၥံၪလၧကယဲၦလၧ အန့ဘၪဆၧလဂၩလါလါနီၪ, ဆၧမိဖ့ၪလၫ့အဝ့ၫဒၪ လီၫ.ၦလၧအလန့ဘၪဝ့ၫနီၪ, ထီးဒၪအဆၧအီၪဝ့ၫဒၪ လ့ၬတၭ, ဆၧမိမၩန့ထဲၩ့ဝ့ၫလၧ အအီၪလီၫ. အ့ၪမွဲယဒုၪယဒၩလဖၪ လၧအၥၭလအီၪဘၪလၧ ယမိကဲၪစဎွၩနီၪ, ဂဲၫဆိၬအဝ့ၫၥံၪထီးယီၩတၭ, မၩၥံၫခွံၬဝ့ၫလၧယမ့ၬယၫဆံၭ. စံၭဆၧနီၪလဖၪဂီၩ့တၭ, လ့ၩထၪ့ဝ့ၫလၧယၫလၧယရုစလံၫ့အဖၧၩ့ၥၭနီၪလီၫ.