ၥၫ့ဎွၩဒိၪ လ့ၫအိၫ၁၄ဂၩလဂၩ အဆၧအၪ့ကံၩ့အၪ့ယၫလၧ ဆၧဎူၫဆၧဎၩ့အဂး

၂၀၂၅နံၪ့ လၩနိၫဝံၩဘၧၫ ၅ၥၫ့ ပူၬတပၠါမုနံၩအိၩ ၥၫ့ဎွၩဒၪဎီၩ့လိၬၥၭလၧ ၦခမျၧးလဖၪ လၧစံၫ့ပံတၧၫလးဒၩဖၧၩ့အထီ ၥၫ့ဎွၩလီၩလၩ့လၬလၩ့ဆၧဒဲ အၪ့ကံၩ့အၪ့ယၫထၪ့ဆၧ ဘဲၫယီၩ အၥိၭနီၪလီၫႉ

“ထၧၫ့ဖုဝဲမုၪခွၫ ထီးလူၬၥံၪဧ့ႇ လၧဂၪ့ခိၪထၧၫ့ဘံၪ့ယၫအဖၧၩ့ ဆၧဒုၭဆၧခၭကဲၪထၪ့ အလးလဖၪအဂး ပကဝၩ့အၪ့ကံၩ့ဘၩဆိၪဖၪအ့ၪ ကၠၧၫ့ကၠၧၫ့လါဆံၭႉ နၥံၪကအၪ့ကံၩ့ဘၩဆိၪ ဖၪန့အ့ၪအဂးနးဆ့ ယကိၭဖံၭၥိၭဘၪနၥံၪႇ ယအၪ့ယၫဘၪနၥံၪနီၪလီၫႉ အရ့ၩဒိၪထုၬ ယနၪ့ထၪ့ ဘၪ ခးပယၩ့ဂီၩ့ ဂၪ့ခိၪချိၫ့ထံၫခးလဖၪနးဆ့ ထီးၥၭနၪ့ခွံၬဘၪ ခးပယၩ့အဂးလဂ့ၩဂီၩ့ လိၪဝ့ၫဒၪ ဆၧမၩဆၧၩ့လဖၪ နၥံၪကဖ့ၪလၫ့ဘၪအဂးနီၪ ယဆၫ့ထွ့ၫဘၪနၥံၪနီၪလီၫႉ

ကဆါယ့ၫၡူၬနီၪ မွဲလၧပဆၧယိလါနီၪလီၫႉ ဘိၪ့လ့ၩဖၭအဆၧၫ့အထီယီၩနီၪ မွဲလၧမု ကိၭနံၩအဂး ဖ့ၪလၫ့ပၧၩ ဆၧယိလါနီၪလီၫႉ ဆၧဂဲထုၪ့မၧၫ့ထၪ့ထဲၩ့နီၪ ဖးဖီၩ့ထၧၫ့ဖျီၩ့ယၫအဖၧၩ့ မွဲအဂ့ၩဒိၪထုၬႇ အမုၬလၩထုၬ ဒဲ အရ့ၩဒိၪထုၬ ဆၧပရၧၫ့ကမံၩ့နီၪလီၫႉ

လၧၡၩခမျၧးအဆၧၥၭမၧၫ့ဖၧၩ့ ဆၧဂဲထုၪ့မၧၫ့ထၪ့ထဲၩ့ယီၩနီၪ မွဲလၧဆၧယိထဲၩ့ခွါထဲၩ့ဒဲ ဆၧဘၠၩ့ထဲၩ့ဂီၩ့ လၧဂၪ့ခိၪထၧၫ့ဘံၪ့ယၫဖၧၩ့ ဘၪဒၪဆၧၫ့ယၫလၧ အလၩ့ၥၭမဲၪဝ့ၫဒိၪမၬ  ဆၧဒုၭ ဆၧခၭလဖၪႇ ဆၧတုၩ့ထၪ့တုၩ့လၩ့လဖၪအဂးႇ မွဲဖ့ၪလၫ့ပၧၩ ဆၧယိလါဒံၭနီၪလီၫႉ ဘိၪ့လ့ၩဖၭ ဆၧၫ့ထီယီၩ မွဲအၪ့လဲၩထၪ့ထဲၩ့ ထုၪ့စူၪယၫအဖၧၩ့ၥၭ ဘဲၫၥိၭဆၧပျၩ့အဖၧၩ့ၥၭအၥိၭနီၪလီၫႉ

ဆၧၥၭအုၭအလးခဲၫ့နီၪ ဆၧၥုၪ့ဎွံၪၥၭထိၬအီၪအဂဲး ပကဆဲးယိဘၪဂီၩ့ႇ လချူၭထီၩ့ ဒံၭဘၪ ဆၧဂဲထုၪ့မၧၫ့ထၪ့ထဲၩ့အခံၫ့နီၪ ဆၧအဂဲးကိၭမံၩ့နီၪ မွဲပကဘၪလီၩ့ယိထၪ့လၧ ဆၧဖၩ့ အၥၫ့ဖၧၩ့ ကလိၪဝ့ၫဒၪနီၪလီၫႉ

ဘိၪ့လ့ၩဖၭနီၪ လမွဲဘၪ ဆၧခွံၬၡိၬခွံၬ ထုၪ့စူၪယၫဂီၩ့ လၧဆၧလၩ့ဆၫ့လၩ့မဲၩဖၧၩ့ နၧၩ့န့ ထဲၩ့ဆၧၥံၫဒိၪနီၪလီၫႉ ကဆါယွၩ အဆၧဂဲထုၪ့မၧၫ့ထၪ့ထဲၩ့နီၪ လမွဲဘၪဆၧဆီၫ့မီၪ့ယိတၭ မွဲဆၧ ဂဲထုၪ့မၧၫ့ထၪ့ထဲၩ့တၡါၡါနီၪလီၫႉ ကဆါလၧ အဂဲထုၪ့မၧၫ့ထၪ့ထဲၩ့ယီၩနီၪ ဖ့ၪပၧၩဆၧထုၪ့ၥုၪ့ ထုၪ့ၥၭလၧ ၥၭမုဆံၫ့ဎံၪယွၩနီၪလီၫႉ ဘိၪ့လ့ၩဖၭအဆၧယိလါနီၪ ၥၭဂၭဂီၩ့ဒဲ ၥၭလၩ့ဆါ မွဲလအီၪ ဘၪလီၫႉ ပဆၧၥၭမၧၫ့ အဆၧကၪဆၧဂဲၩႇ ဆၧနိၫ့ဆၧနၭလဖၪနီၪ ပကဘၪယိထၪ့ ဘဲၫဆၧဂဲထုၪ့ မၧၫ့ထၪ့ထဲၩ့အဆၧဒၪၥိၭဂီၩ့ ဆၧကၪဆၧဂဲၩလဖၪယီၩ မွဲကအၪ့လဲၩထၪ့ထဲၩ့အၥၭလၧ ဆၧအဂ့ၩ အဂဲးနီၪ ပကဘၪအီၪက့ၪထၬ ဆၧယိလါနီၪလီၫႉ

ဆၧဂဲထုၪ့မၧၫ့ထၪ့ထဲၩ့နီၪ မွဲတၡါၡါတၭ ပကဘၪအီၪက့ၪထၬ ပဆၧယိလါႇ ၦလၧအနဲၩ ဆၧဂဲထုၪ့မၧၫ့ထၪ့ထဲၩ့ ဆၧယိလါလဖၪယီၩ အဆၧၥၭမၧၫ့ကအၪ့လဲၩထၪ့အၥၭဂီၩ့ ဆၧအၪ့လဲၩ ထၪ့အယီၩနီၪ အၪ့လဲၩထၪ့ထဲၩ့ ဂၪ့ခိၪချိၫ့ထၧၫ့ဘံၪ့ယၫန့ အစီၩ့အမၩ့ အီၪဝ့ၫဒၪနီၪလီၫႉ”

ၥၫ့ဎွၩဒိၪ လ့ၫအိၫ ၁၄ဂၩလဂၩ