စလုကၭ အဆၧဂၬဖၭ

စလုကၭနီၪ လၧဆၧမၩလိၪလးဖၧၩ့ အခိၪနုၬဂ့ၩဝ့ၫဒၪအၪမၬနီၪလီၫႉ ဆၧနီၪအကၠီၩ့ အဝ့ၫယီၩ မိဒိၭ နဲၩ့အၥၭလၧၦၡၩနးဂၩအ့ၬႉ မိကျ့ၭစၨၭဒၪဝ့ၫကဂၩနီၪလီၫႉ အဆရၫႇမုၪၥံၪ အ့ၪမွဲဖ့ၪလၫ့အ့ၪအဝ့ၫ ဆၧကိၪ့ ဆၧတဲၩ့စွါဘိၩ အဝ့ၫယီၩ ယိဖၭခွံၬဝ့ၫ ခိၭမၬခိၭမၬနီၪလီၫႉ

ကနံၩအဝ့ၫဘၪမၩဝ့ၫဒၪ ဆၧမၩလိၪကမံၩ့နီၪ ကၪဂဲၩဝ့ၫအၪမၬလ့ၬအကၠီၩ့ အဝ့ၫယီၩ ဆုးလ့ၩထၪ့ လၧအမ့ၬယၫ မွဲလန့ဘၪလီၫႉ လါနၫ့အဝ့ၫယီၩ ကဘၪလ့ၩအၪ့ကံၩ့အဆရၫ ဆၧမၩဆၧၩ့နီၪ စီၪဝ့ၫလၧ ဘၪထံၭအဝ့ၫ အၥၭထၪ့ထီၫအကၠီၩ့ မိလ့ၩအၪ့ကံၩ့ဝ့ၫအ့ၬႉ လၧခဲၫ့ထုၬနီၪအထံၩၥိၭ ဧမန်နူအဲလ် ဂဲၫစံၭအ ဝ့ၫ ဘဲၫကလ့ၩအၪ့ကံၩ့ဆရၫဆၧမၩဆၧၩ့အဂးနီၪလီၫႉ အနီၪအခၫ စလုကၭယီၩ ဆၪ့လၩ့ၥၭဂီၩ့ လ့ၩအၪ့ကံၩ့ ယိ ဆရၫဆၧမၩဆၧၩ့အခၫ အဆရၫနီၪဖ့ၪလၫ့အဝ့ၫ ဆၧကိၪ့ဆၧတဲၩ့အဂ့ၩထုၬလဖၪနီၪလီၫႉ

စလုကၭယီၩ ဘဲၫအဆရၫဖ့ၪကိၪ့ဖ့ၪတဲၩ့အၥိၭ လီၩ့ဖိၬခိၭနၪဝ့ၫကကၠၪ အဆၧမၩလိၪနီၪ မၩဂီၩ့ခွံၬ ဝ့ၫ န့ဂ့ၩဂ့ၩဘၪဘၪနီၪလီၫႉ ပကဲၪၥၭဘၪ့လဖၪယီၩ ဘၪကကၠၪကၠၪ ပစီၪဎိၩလၩ့ဘၪပၥၭဂီၩ့ ပစီၪဆံၭဘၪ ၦခိၪနါဒဲၦဂူၫဂၩၥ့ၪနီၪ ပကဘၪထုၪ့ပၥၭနီၪလီၫႉ

ဒီၩ့လၩ့ ၁:၅-၆

ၦကိၪ့ဆၧၥ့ၪလဖၪမိခိၭနၪ ဒဲ အဆၧၥ့ၪယၫနီၪ မိအၪထၪ့ဝ့ၫတၭ ၦလၧအၥုၪ့ဆၭအၥၭဆၭ မိန့ဘၪ ဆၧၥိၫ့ဝ့ၫနီၪ ဘဲၫၥိၭအနၪမိၥ့ၪဆၧချဲၩ့ဒီၩ့လၩ့ဒဲ ဆၧချဲၩ့အဒိၪအယိၬၥံၪ ၦကိၪ့ၥ့ၪအဆၧချဲၩ့လဖၪဒဲ အဝ့ၫၥံၪ အဆၧချဲၩ့ၡီၩ့ၡါဆၧၥံၪနီၪလီၫႉ