ၦဖျိၩ့ခိၪနါ စီၩဂၠိၫ့ဆ့ၫ ဒံၫဖိၩမ့ၩအဂဲး ကဆံၭကခ့ၭ

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ နံၩလၧအမုၬကိၭဂၩဒ့ၭနဲၪႉ မုကနွ့ၫယီၩ ယမိအဲၪဒိၭအၪ့နၩ့လီၩဖ့ၪနဲၪဘၪနၥံၪ ၦဖျိၩ့ဆၨၩ မံၩ့ဎိၩၥၪဖျီၪ့လဂၩမွဲဝ့ၫ စီၩဂၠိၫ့ဆ့ၫ ဒံၫဖိၩမ့ၩအဂဲး နီၪလီၫႉ အဝ့ၫနီၪ အီၪဖျဲၪထၪ့ဝ့ၫလၧ ၁၉၀၄နံၪ့  ဝံးတီၫ့ငူၫ အဖါဖါၥၭဘီၩ့ စီၩဒၫမ့ၫဖိၩမ့ၩ ဒဲ အမိမိၥၭဘီၩ့ နီၫဆဲၫဖီၩၥံၪ မွဲဖိၪခွၫလၧ အမွဲဝ့ၫ ၥၧၫ့ဂၩလဂၩနီၪလီၫႉ

အဝ့ၫၥံၪနီၪ မွဲၦလၧအဆူၩနဲၪ ဗြဟ္မစိုရ် ဆၧဘိၪ့ဆၧဘၩဂီၩ့ ဆၧကိၭဒံၭဝ့ၫလၧ ဖူၫဒၫမူၩကဇၫဒံၭနီၪလီၫႉ စီၩဂၠိၫ့ဆ့ၫ ဒံၫဖိၩမ့ၩယီၩ ဆၧဒုၭၥုၭကဲၪထၪ့ နံၫဘျၩ့လဘျၩ့ဂီၩ့အခၫ မွဲၦလၧအဘၪလ့ၩခိၪလ့ၩနါလၧ ဗြဟ္မစိုရ် အဆၧဆူၩနဲၪနီၪလီၫႉ လၧအဝ့ၫအဆံၭဆံၭဒၪအိၩ မၩလိၪလံၬလၧ တီၫငူၫႇ ဘၩ့ကၩ ဆၧမၩလိၪလးမွဲဂ့ၩႇ လၧခဲၫ့ ဝံးတခိၩ့ အလိၫ့ ကူရှင် ဆၧမၩလိၪလးၥံၪနီၪလီၫႉ လၧခဲၫ့ ဉပစာ (အိုင်-အေ) နီၪ ဆုးထၪ့ဝ့ၫလၧ ဂျက်ဆင်ကော့လိပ် နီၪလီၫႉ ထီးနီၪ အဝ့ၫထၪ့အီၪဎုၬလၧ နီၫၥ့ၩဖၠူၫတၭ အဖိၪအီၪဝ့ၫဒၪ (၁၁) ဂၩနီၪလီၫႉ စစ်ကြိုအထီ မွဲဝ့ၫ ပါလီမန် လွတ်တော် အမတ် ကဂၩနီၪလီၫႉ

လကၩဒံၭဘၪ အဝ့ၫနီၪ မွဲဒံၭလၧ တီၫငူၫဖျိၩ့ဆၨၩခရၧၫ့ခိၪနါလဂၩဂီၩ့ ကဲၪထၪ့ဆၧဖံၭၥိၭလၧ KNU, KYO ခရၧၫ့လဖၪနီၪလီၫႉ လၧခဲၫ့ အဝ့ၫဂဲၫကဲၪထၪ့ တီၫငူၫဖျိၩ့ဒဲ ၦမၩဆံၬဖိၪ ဆၧရွံအၪ့ထုၪ့ဆၧဖၭလး အမၭ နီၪလီၫႉ ခီၫလၧ စစ်ကြိုအထီဒဲ ဖဆပလအထီ အဝ့ၫ ဘၪအၪ့န့ထၪ့မူၩဒၩလၧ တီၫငူၫဖျိၩ့အမၭနီၪလီၫႉ ဘဲၫၦဖျိၩ့ဆၨၩနံၪ့ထၪ့ၥၫ့ကန့အဂးဆ့ မွဲၦလၧအခိးဂဲးခိး ဘၭလဂၩဆ့လီၫႉ

ၦဖျိၩ့ဆၨၩခးဒီၪ့ကအီၪထၪ့အဂး ဆၧလီၩဎွါအၪ့ဎၬဆၧ ကီၫမၡ့ၫအဖၧၩ့နီၪ မွဲၦလၧအဖီၪ့ထၪ့ဖံၭထၪ့ဆၧ ကၠၧၫ့ကၠၧၫ့လၧ စီၩ ဘၭအူၩကၠံၩနီၪလီၫႉ လၧခဲၫ့ထုၬ လၧတီၫငူၫနီၪ စီၩ ဘၭအူၩကၠံၩ အခ့ၫအၫ့ယူၫ ဆၧပိၩ့ထၪ့ အီၪကီၪ့ဖိၬလိၬထၪ့ ကီၫၥူၩလ့ၫပဒိၪအခၫ စီၩဂၠိၫဆ့ၫဒံၫဖိၩမ့ၩယီၩ ဘၪအၪ့န့ထၪ့ မူၩဒၩလၧ ခၩ့ဒိၪအလးနီၪလီၫႉ