ကဆါဎြံၬနီၪ ထီးန့ထၬပဆၧမၪအ့ၬ ဖျါခွံၬပၧၩကိၭကၠၪဒ့ၭအဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩ Leo ၁၄ ဂၩလဂၩ အဆၧၥီၪ့ဆၧၥၫ့နီၪမွဲဝ့ၫဒၪ ကဆါဎြံၬနီၪ ထီးန့ထၬပဆၧမၪနးမံၩ့အ့ၬဂီၩ့ ဖျါခွံၬပၧၩကိၭကၠၪဒ့ၭအဂဲး အကၠီၩ့နီၪလီၫႉ ပကယိလၧ လံၬဆံၫ့ဎံၪဖၧၩ့စွါဘဲၫ ကဆါဎြံၬမၧၫ့ထၪ့ထဲၩ့နီၪ ကမၩကၪထဲၩ့ ၦဂူၫဂၩအဂး မွဲအ့ၬႇ မွဲဝ့ၫဒၪ ကဖ့ၪအ့ၪ ၦဂူၫဂၩ ဆၧအဲၪဆၧကွံၩအဂး မၧၫ့ထၪ့ထဲၩ့အကၠီၩ့နီၪ ၥၫ့ဎွၩ Leo ၁၄ ဂၩလဂၩ လီၩဝ့ၫဒၪဘဲၫယီၩၥိၭနီၪလီၫႉ ပမိမၩနၧၩ့မၩစၪၦဂူၫဂၩႇ ပမိမၩကၪၦဂူၫဂၩႇ ပမိလၩ့ဎွါ ၦဂူၫဂၩ အဆၧမၪ ပၥၭလူၬအ့ၪအီၪနီၪ ပကဘၪယိထဲၩ့ကဆါဎြံၬနီၪလီၫႉ
ပကဆါဎြံၬနီၪ မၧၫ့ထၪ့ထဲၩ့အခံၫ့ ဂဲၫထဲၩ့လၧပအီၪ လၧဆၧစီၩ့မၩ့ဎိၩဒိၪမွဲအ့ၬႇ ဂဲၫထဲၩ့လၧ ဖုၬလူၭကူၭနီၪလီၫႉ ကဆါဎြံၬနီၪ ဖျါခွံၬပၧၩႇ မၩထီၫထၪ့အ့ၪပၧၩပၥၭမၧၫ့ႇ မၩဂၧးခၧၫ့အ့ၪပၧၩ ဆၧဆူၩနဲၩ့နီၪလီၫႉ ကဆါဎြံၬနီၪ ထီးန့ထၬပဆၧမၪအ့ၬႇ ဖျါခွံၬပၧၩကိၭကၠၪဒ့ၭအကၠီၩ့နီၪ ပအီၪၥၭမၧၫ့ကိၭနံၩဖၧၩ့ယီၩ လဂၩဘၪလဂၩ ပကဘၪ ဖျါခွံၬလိၬၥၭအဆၧမၪ ကိၭကၠၪဒ့ၭအကၠီၩ့ ပူၬတပၠါမုနံၩ လၧ St. Peter ဝး ဖၧၩ့ၥၫ့ဎွၩ Leo ၁၄ ဂၩလဂၩ ဒၪခီၩ့လိၬၥၭလၧ ၦခမျၧးၥံၪအခံၫ့ ၥီၪ့ၥၫ့ထၬဆၧ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ
