နံၪ့၂၀၂၅နံၪ့ လၩအီတိၫဘၧၫ ၂၉ၥၫ့နီၪ ခးပယၩ့ၥၫ့ခိၪဒိၪလဖၪ ထုၬထၪ့လံၬ ဘၪထွ့ၫလၧ ခးပယၩ့ဖိၪ ၦဘၪကၪဘၪဂဲၩလဖၪအဂး ဆၧယၫ့ၥုၪ့ယၫ့ၥၭဒဲ ဆၧယိလါအဂဲးနီၪလီၫႉ
အဲၪကွံၩယူၭယၪ့ဘၪ ခးပယၩ့ဖိၪ အီၪလၧထံၫခးဖၧၩ့ဒဲ ထံၫယဲၩ့ခးယဲၩ့လဖၪၥံၪဧ့ လၧ ဆၧနိၫ့ ဆၧနၭဆၧၡၪ့ဆၧယၬ အီၪဝ့ၫဒၪအၪမၬ အခံၫ့ယီၩ ပနးခီၫ့ယီၩပအီၪလၧနၥံၪအကျၩ လန့ဘၪလါနၫ့ ပၥၭယီၩနီၪအီၪလၧနၥံၪကဖျိၪ့ဎးနီၪလီၫႉ ခးပယၩ့ ထၧၫ့ဘံၪ့ယၫ ၦခမျၧးလဖၪ ဘၪဒၪဆၧၫ့ယၫလၧ ဆၧဒုၭဆၧခၭႇ ဒဲ ဂၪ့ခိၪဆၧလၩ့အၪ့ယိၫ ဆၧနိၫ့ဆၧနၭဖၭဒိၪလဖၪနီၪလီၫႉ မွဲလၧဆၧလဖၪယီၩအကၠီၩ့ ထံၫခးခီၫ့ၡၩလၩ့ဆ့ၭလၩ့ယွၩဂီၩ့ ၡၩခမျၧးလဖၪဆ့ အၥုၪ့ၥၭကဲၩ့ဖၭ ကၠၭလိၬၥၭနီၪလီၫႉ ပဝ့ၫၥံၪအဂး မုနံၩလဖၪနီၪ ဎၧၫ့ဝ့ၫဒၪ ဒဲ မုနၩလဖၪနီၪ အခံၫ့ယံၭဝ့ၫဒၪ အၪမၬ လ့ၬနီၪလီၫႉ
ၡၩခမျၧးလဖၪ ဘၪစဲၪ့မံၩ့ဂၭဖျိၭဒဲ ၥၭဆၧဆၫလဖၪ
ခီၫလၧ ဆၧဒုၭဆၧခၭ စၭထၪ့အခံၫ့အိၩဒဲ ထီးမုဆၫကနံၩယီၩ ခးပယၩ့ဖိၪ၃ခွးဆါဆါနီၪ ဘၪခွံၬၡိၬထးအဂံၪ့အဎၫ့လဖၪဂီၩ့ ဘၪလီၩ့စဲၪ့မံၩ့ဂၭဖျိၭနီၪလီၫႉ ကနၩ့နၩ့ဘၪလီၩ့အီၪလၧၡိၬကျၩ ကနၩ့နၩ့ဘၪလီၩ့အီၪလၧ ဆံၭဖၧၩ့ဎုၬဖၧၩ့ႇ ကနၩ့နၩ့ ဘၪလီၩ့အီၪလၧၥၫ့ခၫကၠီး ဒဲ ကနၩ့နၩ့နီၪ ဘၪၥုၪ့လၫ့န့ကၠၩ့ဂီၩ့ ဘၪလီၩ့ဂၭဎ့ၬအီၪအၥၭဘဲၫနီၪလီၫႉ အဝ့ၫၥံၪအအီၪ ဆၫအၪ့ဆၫအီၩအီၪ အ့ၬႉ ဆၧဒူၩဆၧယးအီၪအ့ၬႉ ထၪ့ဘၪဆၧမၩလိၪအ့ၬႉ အဝ့ၫၥံၪယီၩ ဘၪလီၩ့ၥုၭအီၪအလး ကစီၪ့ ဂီၩ့ကစီၪ့ဒဲ ဘၪလီၩ့ယိၬန့ အဆၧထူၭဆၧလၧၫ့လဖၪ လကဘၭ ဘၪလီၩ့ယိၬန့ထဲၩ့ ၥၭဆၧဆၫ လဖၪဒံၭလီၫႉ
ၦမုၪၥံၪလဖၪဒဲ ဖိၪၥၪဆံၭဖိၪၥံၪ အၥၭဆၧဆၫ
အ့ၪမွဲဆၧဒုၭဆၧခၭ ကဲၪထၪ့ယူၭစွါဘဲၫ ၦလၧဘၪထိးၥၭဆၧဆၫအအၪထုၬနီၪ မွဲလၧ ၦမုၪလဖၪဒဲ ဖိၪဒံၪဖိၪၥၪလဖၪလီၫႉ ဖိၪၥၪအၪဒၪဆၧ ထၪ့ဘၪဆၧမၩလိၪလၧၩ့အ့ၬႉ အဝ့ၫၥံၪ အကၠီးလဖၪနီၪ လၩ့ဘျ့ၭလၩ့နူၬလူၬယူၭႉ ဖိၪၥၪကနၩ့နၩ့နီၪ အမိအဖါအီၪလၧၩ့အ့ၬႉ အဝ့ၫၥံၪ အဂး ထီလၧယၫနီၪ ထံၪဆါလၧၩ့အ့ၬႉ ကနၩ့နၩ့ ဒၪဘၪ ဆၧမၩၥံၫမၩဆၫဆၧလဖၪ လၧအဝ့ၫၥံၪ အမ့ၬၥၪဖၧၩ့နီၪလီၫႉ အၪဒၪဆၧနီၪ ဆၧအၪ့ဆၧအီၩအီၪအ့ၬႉ ဆီၪ့ချဲၫ့အ့ၬႉ အဝ့ၫၥံၪအၥၭဆၧ ဆၫလဖၪနီၪ လီၩဖျီၪထၪ့ဝ့ၫၥ့ၪလၧၩ့အ့ၬႉ ၦမုၪၥံၪလဖၪနီၪ အၥုၪ့ခါၥၭလၩ့ကၠၭလီၫႉ မွဲလၧဆၧဒုၭ ဆၧခၭအကၠီၩ့ ဘၪၥံၫဂီၩ့ ၥံၫစၪခွံၬ အဂံၪ့ဒီၪ့ဖိၪၥံၪအဂး အမ့ၬထံၫဘၪလၩ့ဝ့ၫႇ အၥၭဘၪဆၫဝ့ၫႇ ဖိၪၥၪလၧ အမိဖါလအီၪလၧၩ့ဘၪလဖၪနီၪ ၦမုၪၥံၪယီၩ ဘၪယိထွ့ၫဝ့ၫဒၪႇ ၦမုၪၥံၪနီၪ ဘၪၥၭမဲၪ ဝ့ၫလၧ ကဘၪထိးဖီၪ့ဆီၪ့ႇ လၧအခိၪ ဒဲ အဒီၪ့လအီၪဘၪ အလးပျၩ့တုၩ့ဖၧၩ့ႇ ၥံၫ့ဎွံၪဆရၫ လအီၪဘၪအဖၧၩ့ႇ ဘၪအီၪဖျဲၪထၪ့န့အဖိၪအဒံၪႇ လၧဆၧကၪဆၧဂဲၩဖၧၩ့ ဘၪယိထဲၩ့ခွါထဲၩ့ အဂံၪ့ဒီၪ့ဖိၪၥံၪ ဒဲ အဖိၪအဒံၪလဖၪႇ ဘၪအၪ့ကံၩ့ဘၩဆိၪဖၪဆၧ လၧဆၧခံၭကျၩ ဒဲ ၦအၥုၪ့ခါ ၥၭလၩ့ လဖၪနီၪဆ့ ၦမုၪၥံၪယီၩ ဘၪလီၩ့ဖ့ၪဂဲးဖ့ၪဘၭထဲၩ့ဝ့ၫနီၪလီၫႉ
အရ့ၩဒိၪထုၬ ၦမူၩဒၩအီၪလဖၪအကျၩ ဆၧနၪၥ့ၪလိၬၥၭလအီၪဘၪ
ဆၧဆၫအယိၬထုၬကမံၩ့နီၪ မွဲလၧအရ့ၩဒိၪထုၬ ၦမူၩဒၩအီၪလဖၪအကျၩ ဆၧနၪၥ့ၪလိၬ ၥၭဒဲ ဆၧဆူနဲၩလအီၪဘၪလီၫႉ လၧအဝ့ၫၥံၪအကျၩ ဆၧဂဲးဆါဘၭဆါအီၪကိၭဂၩလီၫႉ လါနၫ့ ကဂၩဒဲကဂၩ ခိၭနၪလိၬၥၭန့အ့ၬႉ နဲၩလိၬၥၭန့အ့ၬႉ ဆၧနီၪအကၠီၩ့ ဆၧမၩဆၧၩ့လဖၪ ဘၪထိး ဖိၭဘံၭအၥၭႇ ဆၧလ့ၩထၪ့လ့ၩထီၫလဖၪ အခံၫ့ဘၪယံၭနး ဒဲ ၡၩခီၫၡၩ စီၪဒီၩ့ဘၪခီၩ့လိၬၥၭ ဆၧမၩဆၧၩ့လဖၪဆ့ ဘၪထိးပဒၩ့ထၬအၥၭနီၪလီၫႉ အနီၪအခၫ ၡၩခရၧၫ့လၧ လပၪဘၪနးကဲၩ့ နီၪ လၧဆၧဆူၭဖၧၩ့ ဘၪထိးဆၧနိၫ့ဆၧနၭ အၪမၬလ့ၬနီၪလီၫႉ ကၥီၪ့လိၪလံၬအဂးႇ ကၥုၪ့ထၪ့ အထီလၧယၫဂ့ၩဂ့ၩအဂး ထိစိၩထၬဝ့ၫ ၥၭဘၪ့ဖိၪၥံၪလဖၪနီၪဆ့ အဆၧမံၪမးလဖၪ ဂၭဂီၩ့ဆိၫ့ ခွံၬဂီၩ့ ဘၪအီၪမၧၫ့အၥၭလၧ ဆၧၥၭမဲၪၥၭဖျဲၩ့ဖၧၩ့ႇ ဆၧၥုၪ့ထၪ့ၥၭထၪ့ဖၧၩ့ႇ ဆၧၥၭဂၭဂီၩ့ဖၧၩ့ ဒဲ ၥၭလၩ့ဆံၭလၩ့ယွါအဖၧၩ့နီၪလီၫႉ
အဝ့ၫၥံၪ အဆၧၥ့ၪဆၧဘၪလဖၪ ဘၪထိးဘိၭခါခွံၬအၥၭႇ အဆၧယိလါၥံၪလဖၪနီၪ ဘၪ ထိးဘၧၩ့လၩ့ခွံၬအၥၭႉ ကနၩ့နၩ့နီၪ ဘၪလ့ၩစဲၪ့ထၪ့လၧ ထံၫယဲၩ့ခးယဲၩ့ ကနၩ့နၩ့နီၪ လ့ၩစဲၪ့ထၪ့ လန့ဘၪဂီၩ့ လၧဆၧကယုကစုၩဖၧၩ့ အၥၭအုၭဝ့ၫဒၪ ဎ့ၭဎ့ၭဖိၪနီၪလီၫႉ
မုကိနံၩနီၪ ဘၪအီၪမၧၫ့ၥၭလၧ ဆၧကၪဆၧဂဲၩဒဲ ဆၧၡၪ့ဆၧနၭဖၧၩ့
ထံၫခးထၧၫ့ဘံၪ့ယၫအဖၧၩ့ ဆၧအနံၪ့အယၪလဖၪ ထၪ့အၪမၬလ့ၬႇ ဆၧဖံၭဆၧမၩလဖၪ လၩ့ၡၩႇ ၥိၪလဖၪဒဲ ၥံၪ့ဎွံၪဖၭစၧၩ့လဖၪ လၩ့ၡၩႇ မ့ၪဆ့ ဂဲၫကထံၪထံၪ ဂဲၫအ့ၬကထံၪထံၪႉ ဆၧၥၭ အုၭလဖၪယီၩ ဂံၪ့ဒီၪ့ကိၭဖျိၪ့ဒ့ၭအဂး မွဲကဲၪထၪ့ ဘဲၫထံၩၥိၭယူၭနီၪလီၫႉ
ဆၧၥၭမဲၪၥၭဖျဲၩ့လဖၪနီၪ အဝံစဲၩလၩ့ထၬအၥၭလၧပၥၭလၬဖၧၩ့ယူၭႉ လါနၫ့ ၦၡၩလဖၪ နီၪ ကဂၩဒဲကဂၩ မၩဆၧၩ့လိၬၥၭဘိၩ့ဒံၭႉ ပစူၪဖၧၩ့ဆၧလအီၪဘၪနးမံၩ့လါနၫ့ ပၥၭဖၧၩ့နီၪ လၧၫ့ဎွ့ၩဒၪလၧ ဆၧယၫ့ၥုၪ့ယၫ့ၥၭဘိၩ့ဒံၭလီၫႉ
ဆၧမၩဘၪလိၬထဲၩ့ဒဲ ဆၧဎူၫဆၧဎၩ့အဂး ၦဎြံၬဖိၪအဖျီၩ့
ဘဲၫယမွဲ ၦဎြံၬဖိၪကဂၩအၥိၭ ယမိအၪ့စၪ့ဘၪဆၧအၪ့စၪ့အီၪကမံၩ့နီၪလီၫႉ “ဆၧအထၧး အလၧးယီၩ ပကအီၪပထုၬခွံၬပၥ့ၪလဲၪ ဆၧဒုၭဆၧခၭလဖၪယီၩ ပကအီၪထီခွံၬပၥ့ၪလဲၪ?” ပက ကိၭဎီကၠၭမၬ ဂၪ့ခိၪချိၫ့ဖၧၩ့ ထၧၩ့ဆၧဒုၭဆၧခၭအီၪဘၪလၧၩ့စ့ၩ ဘဲၫနီၪလီၫဧၪ” လၧၦဎြံၬဖိၪ ဆၧဘိၪ့ဆၧဘၩဖၧၩ့ ပကဖီၩ့ဖျ့ၭထၪ့လၧ ဆၧနိၫ့ဆၧနၭဖၧၩ့အဂး ဖၧၩ့ၥၭအယီၫလဖၪနီၪ ဖ့ၪနဲၪ ထၬဝ့ၫအီၪအ့ၬႉ လါနၫ့ဂ့ၩ ဆၧဘၪလိၬဎွ့ၪဎီၩ့ထဲၩ့ ဆၧဘၠၩ့ထဲၩ့ ဒဲ ကလ့ၩစိၩလၧ ဆၧဎူၫဆၧဎၩ့ လဆိၩယၫအဂးနီၪ ဖ့ၪလၫ့ထၬ ဖၧၩ့ၥၭကယုကစုၩ အီၪဝ့ၫဒၪကမံၩ့နီၪလီၫႉ
လၧ၂ကီရံၫ့ ၅း၁၈ဖၧၩ့ “ဆၧထီးအလူၬဘၪဆဲၫ့လၧယွၩအမၩဘၪလိၬထဲၩ့ပၧၩ လၧအနၫ့ ဆါဒၪဝ့ၫ လၧယ့ၫၡူၬဎြံၬအကၠီၩ့နီၪ ဖ့ၪလၫ့ပၥီၪ့ဆၧ ၥၫ့ဆၧ ဘၪဆဲၫ့လၧဆၧဘၪလိၬထဲၩ့လီၫႉ” မူၩဒၩအယီၩ လမွဲဘၪဆၧဘိၪ့ဆၧဘၩကဖၨၪ အမူၩဒၩတၭ မွဲဒၪလၧ ၡၩလဖၪကြၨၭမၩဝ့ၫဒၪ မူၩဒၩနီၪလီၫႉ “ပမၩၥၭနၪ့ခွံၬပၥၭ ဆၧနိၫ့ဆၧနၭအဂဲးလဖၪဂီၩ့ ပကျဲၩ့မၭပၥၭဘဲၫ ဆၧကိၭမံၩ့နီၪ ဂ့ၩဝ့ၫဒၪထီးလူၬနဲၪ” ဘဲၫယီၩၥိၭနီၪ လမွဲဘၪတၭ ဆၧမၩဘၪလိၬထဲၩ့တၭ ဆၧမၩဘၪလိၬထဲၩ့ တၡါၡါနီၪ
– ပခိၭနၪအ့ၪ ၡၩလဂၩအဆၧၥၭမၧၫ့အဂဲး
– လၧၦအဘၪဂၪ့လဖၪကၠၧၫ့ကၠၧၫ့ ပဂၪ့ဖိၬအခဲၫ့
– ၡၩလဂၩကအီၪအၪ့ဘၪဂ့ၩဂ့ၩအဂး အလဂၩနီၪ ကဘၪထိးစၪအၥၭႇ ကဘၪထိးၡၪ့ ထိးနၭအၥၭလလိၪဘၪတၭ ၦကိၭဂၩဒ့ၭ ကန့ထၪ့ အဂ့ၩထုၬလဖၪအဂးနီၪ ပကဘၪကျ့ၭ စၨၭလီၩ့ဎွါဝ့ၫဒၪနီၪလီၫႉ လၧစမၭၥုၫ (၅:၉) ဖၧၩ့ ကဆါယွၩ စံၭထၬဝ့ၫ ၦမၩဘၪလိၬထဲၩ့ ဆၧလဖၪနီၪ အီၪမုၬဝ့ၫဒၪ အဂဲးဘဲၫယီၩ အဝ့ၫၥံၪ မိဘၪဆၧကိၭဝ့ၫလၧ ယွၩအဖိၪခွၫၥံၪ လီၫႉ
ဆၧဎူၫဆၧဎၩ့နီၪ မွဲဆၧကယုကစုၩအ့ၬႉ ဆၧဎူၫဆၧဎၩ့နီၪ မွဲလၧအၥၭမၧၫ့ဝ့ၫဒၪ ဆၧအီၪမၧၫ့ အီၪဂဲၩကမံၩ့လီၫႉ ဆၧၥံၫအလးနီၪ ဆၧမၧၫ့ႇ ဆၧမၩကၪထဲၩ့အလးနီၪ ဆၧလၩဆၧဖၩ့ႇ ဆၧအီၪ ထးန့ၫလဂၩအလးနီၪ ဆၧရွံထၪ့ထဲၩ့ဘဲၫဂံၪ့ဒီၪ့ဖိၪအၥိၭနီၪလီၫႉ
ဆၧယိလါ ဆၧချဲၩ့စိၩ
အခံၫ့အယီၩနီၪ မွဲပကဘၪထိးစၪခွံၬပၥၭအခံၫ့အ့ၬႉ အခံၫ့အယီၩ ပကဘၪမၩထၪ့ဆီၪ့ဆီၪ့အခံၫ့ နီၪလီၫႉ ပကဘၪလီၩ့ဎွါထဲၩ့ ဆၧယိလါ လၧဖံၫ့ချၪမုၬအဖၧၩ့နီၪလီၫႉ ဆၧဎူၫဆၧဎၩ့နီၪ ကဲၪထၪ့ ၥ့ၪလီၫႉ ဆၧမ့ၬလဲၩၥၭဂဲၫ့လဖၪနီၪ လူၬဘံၭခွံၬဘၪပၧၩလဂ့ၩႉ ဆၧၥၭဂၭဂီၩ့လဖၪနီၪ ထီးမၩနၧၩ့ ဘၪပၧၩလဂ့ၩႉ“ လၧပဆၧဂဲၩဝၭလဖၪအဖၧၩ့ ဆၧယၫ့ၥုၪ့ယၫ့ၥၭႇ ဆၧတီၩဆၧလီၩ့အဂး ချဲၩ့ ဎံၫချဲၩ့လၩဆၧႇ လအီၪပွံၭဘၪအဖၧၩ့ မၩထၪ့ဖျီၪဆၧဎူၫဆၧဎၩ့” ဆၧလဖၪယီၩ ပကမၩထၪ့ကၠၭ ကိၭဂၩဒ့ၭလါဆံၭႉ
လၧဆၧဘၪထံၭဘၪနဲၪ့ ဎိၩဎိၩဒိၪဒိၪအဖၫ့လၬ ပခးပယၩ့ယီၩ ဂဲထုၪ့ခွံလၫ့ထဲၩ့အၥၭ မွဲန့ဒၪဝ့ၫ ဖျဲၪဖျဲၪႉ ကၠၧၫ့ဒၪဆၧၥုၪ့ဆၧဒီၩ့လီၫ လကၭဘၪဒဲ လၧၥုၪ့ၥၭအၥၫ့ မွဲအၥၭဂဲၫမၧၫ့ထၪ့ထဲၩ့ဒၪဝ့ၫႉ “ဆၧဎူၫဆၧဎၩ့ ကအီၪထၪ့အဂး ပလထိးစၪခွံၬဘၪပၥၭအကၠီၩ့ ပဂဲၫထဲၩ့ထဲၩ့ လၧပဂံၪ့ပဎၫ့န့ဝ့ၫ ဒၪ” လၧပဖိၪပလံၩၥံၪအအီၪ ဆၧချဲၩ့ဘဲၫယီၩၥိၭလဖၪ မွဲအလူၥီၫထၪ့ဒၪဝ့ၫလါဆံၭႉ ကဆါယွၩ နီၪ မွဲဆိၪဂ့ၩဆိၪဘွၩလၩ့ဘၪနၥံၪဒဲ ပခးပယၩ့ယီၩလါဆံၭႉ
ခးပယၩ့ၥၫ့ခိၪဒိၪလဖၪ
