လၧဖျိၩ့ဆၨၩအခၫ့ထံၭၥၫ့ထၧၫ့ဖုဝဲဖျိၩ့ဖိၪနံၫဂၩ (၄)
ထၧၫ့ဖုဝဲထံၩၥိၭၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ႇ နံၩလၧအမုၬကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိဆုး အဲၪဒိၭလီၩဖ့ၪနဲၪဘၪနၥံၪ ၦဖျိၩ့ၡါဖိၪအခိၪတၩ့နီၪမွဲ ‘လၧဖျိၩ့ဆၨၩအခၫ့ထံၭၥၫ့ ထၧၫ့ဖုဝဲဖျိၩ့ဖိၪနံၫဂၩ’ ၡါဖိၪလၧအအီၪထး လဖၪနီၪလီၫႉ
ဖူၫစချိၪအဖိၪလံၩၥံၪ အၪ့ဎွံလၪ့ အချိၪနီၪ မယံၬဎွ့ပၥ့ၪလဲၪစွါဘဲၫ ဖူၫထိၭမဲၪဖါဖ့ၬထၬၥၭကျုၩအကုၬၥံၪလဖၪ ဂဲၫမၧၫ့ထၪ့ထဲၩ့ အထံၭအၥၫ့ယူၭနီၪလီၫႉ မွဲဆၧဘဲၫနီၪ ဖူၫစချိၪအဖိၪလံၩၥံၪလဖၪ မွဲလ့ၩလီၩ့ဎွါဖူၫထိၭမဲၪဖါအဖၧၩ့ၥၭ လဘၪလၧၩ့ဘၪနီၪလီၫႉ လၧခဲၫ့ထုၬ လၧအဝ့ၫၥံၪ ထီၩ့အလးနီၪ မၩအၪ့ခိၪလီၩ့ဎံၫဎုၭနီၪလီၫႉ မွဲဆၧဘဲၫနီၪ ဖူၫယီၩ ကိၭဝ့ၫအမံၩ့လၧ ဖူၫစချိၪနီၪလီၫႉ
ဖူၫထိၭမဲၪဖါအဖိၪလံၩၥံၪလဖၪ လ့ၩခီၫ ခိၭဖူၫစချိၪအဖိၪလံၩၥံၪခီၫ အခံၫ့ယံၬထၪ့အခၫ လၧခဲၫ့ထုၬ ဖူၫစချိၪအဖိၪလံၩၥံၪလဖၪ မွဲဂဲၫထီၩ့နးကၠၪလၧၩ့ဘိၭ ဆုးလ့ၩဝ့ၫလၧ အဖါၥၭဘီၩ့လ့ၩလီၩ့ဎွါထၬ လးကျဲၩ့လၧ အမံၩ့မွဲဝ့ၫ ထံၫဆ့ၬမ့ၬယွၩနီၪလီၫႉ ထီၩ့လၧထံၫဆ့ၭမ့ၬယွၩအခၫ ဖူၫထိၭမဲၪဖါ မၪလူၬအဖိၪလံၩၥံၪ ကဲ ဖိၪလံၩၥံၪဧ့ အီၪအၪ့ကၠၭ ယံၩယံၩၡီၩ့ၡီၩ့ မုၬမုၬလၩလၩနီၪလီၫႉ စၭထၪ့လၧ အထီနီၪဖူၫထိၭမဲၪဖါအဖိၪလံၩၥံၪလဖၪ အီၪၥၭမၧၫ့မၩအၪ့မၩအီၩလၧ ထံၫဆ့ၬမ့ၬယွၩ ထီးမုဆၫကနံၩယီၩနီၪလီၫႉ
အထီဘဲၫယီၩ ဖျိၩ့ဆၨၩလဖၪနီၪ ၦမွံၩၦၡါၥံၪလနၩ့နၩ့ နဲၩ့ထၬဝ့ၫဒၪ ဖူၫစချိၪအဖိၪလံၩၥံၪအကၠီၩ့ အခံၫ့ ဘၪအခၫ ဖူၫထိၭမဲၪဖါအဖိၪလံၩၥံၪကဂဲၫထဲၩ့ထဲၩ့လၧ ဖူၫစချိၪအဖိၪလံၩၥံၪအီၪတၡါအကၠီၩ့ နဲၩ့ထၪ့ယိလါဝ့ၫဒၪနီၪလီၫႉ ဖံၫဖူၫၥၭၡါၥံၪ လီၩယံၫယါ အ့ၪမွဲဖူၫထိၭမဲၪဖါ ကဂဲၫထဲၩ့ထီခိၬနီၪ ကမၩၥ့ၪယၫပၧၩလၧ ဖၧၩ့ၥၭမုဖၭဒိၪ ကဂဲၫအီၪထၪ့ႇ လိးဒဲၩယၬကၭ ကချဲၩ့ထၪ့အကၠီၩ့ လီၩထၬဝ့ၫအီၪနီၪလီၫႉ
ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ယအဲၪဒိၭလီၩအ့ၪဘၪနၥံၪ လၧဖျိၩ့ဆၨၩအခၫ့ထံၭၥၫ့ ထၧၫ့ဖုဝဲဖျိၩ့ဖိၪနံၫဂၩ ၡါဖိၪနီၪ မွဲဒၪထီးယီၩလီၫနဲၪႉ လၧခဲၫ့မုနွ့ၫ ယကအဲၪဒိၭလီၩဖ့ၪနဲၪဘၪနၥံၪ ၦဖျိၩ့ၡါဖိၪပၫလဲၪနီၪ အီၪခိၭ ခိၭနၪဘၪလၧ ဆၧမုၬလၩၥၭဎွံၪအဖၧၩ့ ကိၭဂၩဒ့ၭဆံၭႉ ဆၧခိးဆၧတၩႉ
