ဘၪနီၫလဲၪမိလၨဆၧချဲၩ့ဘၪလၩ့မါထၪ့နီၪ (၃)

ဘၪထွ့ၫလၧ မိလၨဆၧချဲၩ့နီၪ လၨဆၧချဲၩ့ကိၪ့ၥ့ၪ ယာမာမိုတို လီၩထၬဝ့ၫဒၪ လၧပၥၪလၧၩ့ဘၪ လံၩအီၪလၧၩ့အ့ၬႇ လၧပဂၭဖၭလၧၩ့ဘၪ ခးၥဲၫအီၪလၧၩ့အ့ၬႇ လၧပချဲၩ့လၧၩ့ဘၪ ဂၪ့ခိၪအီၪလၧၩ့အ့ၬ နီၪလီၫႉ ဆၧလၧလၨဆၧချဲၩ့နီၪ  လၩ့ၥၭဆုးလီၩ့ဝ့ၫတၡါလီၫႉ ၦၥိၩ့အၪဆၧချဲၩ့နီၪ အၪ့ယုခွံၬ ၦၥိၩ့ၡၩလၨဆၧချဲၩ့ၥ့ၪလါနၫ့ဂ့ၩ ထီးအလူၬ လမွဲဘၪလီၫႉ  ကြၨၭပယိအဒီၩ့အထ့ၭအဂ့ၩထုၬနီၪမွဲ ခိၪလၩဘွၩလၨဆၧချဲၩ့နီၪလီၫႉ  ခိၪလၩဘွၩဆၨၩဆၬနီၪ မွဲဒၪခိၪလၩဘွၩထံၫခးဆါဖိၪလါနၫ့ဂ့ၩ ခိၪလၩဘွၩလၨဆၧချဲၩ့နီၪ ဂဲၫကဲၪထၪ့ လၨဆၧချဲၩ့လၧ အဘၪၥိၩ့ထၪ့ ဂၪ့ခိၪထၧၫ့ဘံၪ့ယၫနီၪလီၫႉ ခိၪလၩဘွၩလၨဆၧချဲၩ့ လံၬလဲနီၪ မွဲဆၧကွ့ၭနဲၪ့ ဂ့ၩဒိၪဝ့ၫဒၪ တၡါလီၫႉ

ပကလီၩဖျိၩ့ဆၨၩအဂဲးဧၪႇ ဘုၭဒၭအဂဲးဧၪ စၭထၪ့လၧ ယၩနံၪ့ ၁၈ဒဲ ထီးထီၩ့စိၩမုဆၫကနံၩယီၩ အီၪဝ့ၫအလၧၫ့အဎွ့ၩနီၪလီၫႉ မွဲဆၧဘဲၫနီၪ ဘၪထွ့ၫဒံၭလၧ ဆၧၥိၩ့ထၪ့ၥ့ၪအဂဲးဒံၭနီၪလီၫႉ အနီၪတၭ လၨဆၧချဲၩ့ကမံၩ့ ကဆုးအီၪဂုးခၧၫ့နီၪ မွဲလဘၪထွ့ၫဘၪ ၡၩအဆၧဝံဆၧနၭဒဲ ဘၪထွ့ၫဝ့ၫတၡါလၧ ဆၨၩကဆၨၩ အဆၧၥ့ၪယၫနၪၥ့ၪထၪ့ထီၪ့ႇ ဆၨၩကဆၨၩ လၨဆၧချဲၩ့ လံၬလဲနီၪ ခမျၧးၥံၪအဂး အၥိၩ့ဂ့ၩဒိၪဝ့ၫဎွ့ပၥ့ၪလဲၪအဂဲးနီၪလီၫႉ မွဲဆၧဘဲၫနီၪ ဂၪ့ခိၪ ကုလၭၥၭမဂၭႇ ယူနဲစကိုအခရၧၫ့နးဆ့ ပကဘၪဆုးဖီၪ့ဂုးခၧၫ့ထၬ ပမိလၨဆၧချဲၩ့နီၪ မွဲဂၪ့ခိၪအီၪက့ၪပၭကၩဆၧမၩ မူၩဒၩကမံၩ့နီၪလီၫႉ

ၦဖျိၩ့ဆၨၩအဂး ဖျိၩ့လၨဆၧချဲၩ့နီၪ ပကဘၪၥီၪ့ဂု အမ့ၬယၫထုၬနီၪလီၫႉ ဖျိၩ့ခိၪနါၥံၪလဖၪနးဆ့ ဆၧၫ့ထီအၪ့လဲၩ့ထၪ့အၥၭနီၪ မွဲၦလၧအနၪဂ့ၩဂ့ၩအၥိၭ ကဘၪနဲၪအ့ၪ ဖျိၩ့ဆၨၩၥၫ့ဘၪ့လဖၪ ဖၧၩ့ၥၭအတီၩနီၪလီၫႉ စၭထၪ့ခီၫလၧ ဖိၬဘိၭအနံၪ့ ၁၉၈၀နီၪ ဖျိၩ့ၥံၪလၧအအီၪတဝၫ့လဖၪ ချဲၩ့ဖျိၩ့လၩ့ၡၩထၪ့နီၪလီၫႉ အၪဒၪဆၧ ဖျိၩ့လၧအီၪဝံးလဖၪနီၪဘိၭ မွဲချဲၩ့ဖျိၩ့ဆၧချဲၩ့လဘၪလၧၩ့ဘၪနီၪလီၫႉ မွဲဆၧဘၪဲၫနီၪ ပကဲၪထၧၫ့ဖုဝဲဖျိၩ့ဆၨၩဖိၪၥံၪနးဆ့ လၧဂၪ့ခိၪအကျၩ ဘဲၫၦဖျိၩ့ဆၨၩ ပလၨဆၧချဲၩ့ယီၩ လလၩ့မၭဘၪအဂး  ပၧၩမွဲဖျိၩ့ဆၨၩအကၠီၩ့ ပကဘၪဖီၪ့ဂုးခၧၫ့ထၬ ပမိလၨဆၧချဲၩ့နီၪ မွဲၦမူၩဒၩကိၭဂၩတၭ လၧဆၧအဲၪကွံၩဎိၩဒိၪအဖၧၩ့ ယအဲၪဒိၭဘၪပဂၨၪထၪ့ ဘၪနၥံၪလၧ လၧဆၧထံၪလၩ့ဒီၪလၩ့ဖၧၩ့ယီၩနီၪလီၫႉ