ဆၧဖ့ၪလၩဖ့ၪဖၩ့ၡီၩ့ ဆၧအီၪကီၪ့ဆရၫမုၪ မာဂရိတာ ဒေါ်တာအဂဲး

၂၀၂၅နံၪ့ လၩအီတိၫဘၧၫ ၁၉ၥၫ့ ခးၥဲၫထၧၫ့ဘံၪ့ယၫ ၦဆိၬၥၫထနၫအဘိၪ့မုနံၩဖၧၩ့ ဆၧမၩလၩမၩဖၩ့ၡီၩ့ ဆၧအီၪကီၪ့ဆရၫမုၪ မာဂရိတာ ဒေါ်တာ ဂဲၫထဲၩ့ဖီၪ့ထၪ့ဖံၭထၪ့ ယွၩအဆၧဖံၭဆၧမၩ ထၪ့ဘၭအနံၪ့၄၀ထီၫယူၩဘလံၫနီၪလီၫႉ ဆၧထံၪလၩ့ဒီၪလၩ့ယီၩနီၪ မၩဝ့ၫဒၪလၧ ဝံးတခိၩ့ ကၭၥလံၬဆၧအီၪကီၪ့ႇ ကြည့်မြင်တိုင်ဝံးႇ စိန့်ဂျိုးဇက် ၥရိၬဖၧၩ့နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲလၧစိန့်ဂျိုးဇက်ဆၧအီၪကီၪ့ မူၩဒၩအီၪ ၥၫ့ခၫဒိၪ Fr.Augustin မိုးဝင်းနီၪလီၫႉ လၧမံဆၩဆၧလုထၪ့ဖၧၩ့ ၥၫ့ခၫယီၩ စံၭဝ့ၫဒၪ “ဆရၫမုၪယီၩ ကြၨၭပဖ့ၪလၩဖ့ၪဖၩ့ဝ့ၫဒၪဒဲ ပကြၨၭစံၭခိးစံၭတၩဝ့ၫဒၪနီၪလီၫႉ ၦဆူနဲၩဖိၪၥံၪလဖၪဒဲ ဆၧအီၪကီၪ့ဆရၫႇမုၪလဖၪနီၪ မွဲကဘၪအၪ့န့အဒီၩ့အထ့ၬလၧ ဆရၫမုၪဖၭဒိၪ မာဂရိတာ ဒေါ်တာ အအီၪယီၩနီၪလီၫ” အဂဲး ၥၫ့ခၫ Fr.Augustin မိုးဝင်းစံၭဝ့ၫဒၪ ဘဲၫနီၪအၥိၭလီၫႉ ဆရၫမုၪဖၭဒိၪ မာဂရိတာ ဒေါ်တာယီၩနီၪ စၭထၪ့လၧ၁၉၈၀နံၪ့အခံၫ့အိၩ လ့ၩလီၩ့ဖီၪ့ထၪ့ဖံၭထၪ့ ယွၩအဆၧဖံၭဆၧမၩလၧ ကညင်ချောင်းတဝၫ့၊ ဗိုလ်တောင်ကျွန်း၊ ချောင်းသာ၊ အင်းစိန် ဒဲ တွံတေးလဖၪနီၪလီၫႉ အဝ့ၫယီၩ မွဲဆၧအီၪကီၪ့ဆရၫမုၪကဂၩ လကၭဘၪတၭ မွဲဒံၭလၧ ၦၥီၪ့လံၬဆရၫမုၪကဂၩဒံၭနီၪလီၫႉ လၧအဝ့ၫ လီၩ့မၩယွၩအဆၧဖံၭဆၧမၩအခံၫ့အထးဖၧၩ့ ခၫ့ထ့ၬပၫ့လဲၫအခံၫ့ ဘၪဒၪဆၧၫ့ယၫလၧ ဆၧၥၭမၧၫ့ဆၧလၩ့အၪ့ယိၫနီၪလီၫႉ လကၭဘၪ ဘၪထိးဆၧဆၫဆူၪဂိၬဒံၭနီၪလီၫႉ လါနၫ့အဝ့ၫယီၩ ထိးဆၧၫ့ထၬဝ့ၫ “လၧဆၧကၪဆၧဂဲၩ ဆၧၡၪ့ဆၧနၭအကျၩ ကအၪ့န့ထၪ့ဂဲးဘၭလၧ အဆၧဆူၩနဲၩဖၧၩ့ ဒဲ လၧၦဆူနဲၩဖိၪၥံၪအအီၪဂီၩ့ အီၪထးဝ့ၫဒၪအဆၧၥၭမၧၫ့ယီၩဆ့ ကဖ့ၪဆၧၫ့လၩ့အၥၭလၧ ယွၩအဂးအဂဲး အဝ့ၫယီၩ စံၭဝ့ၫဒၪဘဲၫယီၩအၥိၭနီၪလီၫ